Labels

Thursday, June 28, 2007

Mikerko Badan Tenggalan

ULAH ni pejabat rik anggota legislator -- mak ngedok kekecualian Kotawaringin Barat -- nambah layau.

Gedung DPRD Kotawaringin Barat. (Borneonews/Budi Surakhmat)

"Anggota Dewan Rituk Mikerko Badan Tenggalan, Gedung DPRD Jadi Mangi", seno judul berita HL (headline) sai kusani di halaman Kotawaringin Barat.

Anggota Dewan guwai ni ingkah midor-midor gawoh makai duit ni jelma lamon.

MANGI. Sai ruang komisi ni DPRD Kumai keliakan mangi. (Borneonews/Budi Surakhmat)


Terakhir, pitu anggota DPRD Kotawaringin Barat, yaddo de Rahmat Hidayat (Komisi A), Nur Hidayah, Silvariani, dan Jaya Nurdin Karim (Komisi B), Aminullah, Kaspul Anwar, dan Abdul Kadir Hasan (Komisi C) nutuk Pendidikan dan Latihan (Diklat) Tata Pemerintahan di Bandung, Jawa Barat. Berangkat nambi, Kemis (27/6).

Keliakan nihan, mak siap jadi wakil rakyat sai ani undang-undang nyancan fungsi legislasi, budget, rik pengawan.

* * *

Ah, induh ah....

Tanno, nyak tiram. Ampai pedom jam 9.00 WIB jeno pagi. Padahal guwai kantor radu jak pukul 01.00 WIB. Minjak dibi becong.

Lupa kik mak diingokko Ren. Rani inji tanggal 28 Juni 2007. Aidil ulang bulan (baca: tradisi ni Aidil tenggalan). Reti ni, genap walu bulan (Aidil laher, 28 Oktober 2006).

Met ulang bulan, Aidil. Geluk mebalak rik pintar yu.

Serebok lagi nyak mulang mit Lampung.

Monday, June 25, 2007

Mit Dipa Kidah?

NYAK setemon ni tetap semangat nulis masalah kelampungan, terutama sai wat kaitan ni jama seni-budaya.

Kupikir koran sai paling pas ngeakomodasi tulisanku ya Harian Lampung Post, Bandar Lampung. Sai bareh ni, kan nyak kas rik sampai tanno maseh ticatat wartawan Lampung Post. Wat jadi redaktur opini ni.

Sai-sai ni koran sai kuharapko ngembangko kebudayaan Lampung ya Lampung Post sebagai koran ni ulun Lampung.

Kidang nyak heran, tiap kali nyak ngirim mati saka mak timuat-muat. Timuat juga akher ni. Adu mesaka pai. Rik, santor nyani nyak sangsai. Tulisanku mak utuh. Ngedit seaga-aga ni.

Repa muneh?

Kik reji kan ngelemohko semangatku nulis mit Lampung Post. Kidang kik mak Lampung Post, mit dipa kidah?

Soal ni, nyak maseh lamon harap jama Lampung Post.

Thursday, June 21, 2007

Jelma Nomor Sai di Kotawaringin Barat

ADU saka mak nulis jelma nomor sai di Kotawaringin Barat.

Ujang Iskandar gelar ni. Lamon juga sai muji-muji ni. Pembangunan Kotawaringin Barat maju kanjak dipimpin Ujang, ani tian.

Aduh, sayang ni nyak kerja di koran. Jadi, pandai gawoh ngewada. Hehehe...

Kesai, lamon rencana balak sai mak jelas 'keberpihakan ni' jama jelma lamon, injuk nyani Pangkalan Bun Park, pullan kota, rik sai ampai, aga ngebeli kapal kargo.

Kerua, penyataan-pernyataan sai aneh bin lucu mak kalah jama aneh bin lucu ni jama bawahan ni di dinas/instansi rik anggota DPRD.

Terakhir, Ujang Iskandar cawa: "Sampai tanno urusan pemerintahan jak kabupaten mit pekon makkung dapok latap dikeniko. Penyelenggaraan otonomi pemerintahan pekon maseh tekendala SDM ni sai murak."

Sai bareh halok mak nyambung. Kidang kan seurak-urak ni nyak kan tamatan Jurusan Ilmu Pemerintahan. Cutik-cutik kan maseh wat ilmu sai ngelekok di uluku.

Reji, nututko teori ilmu pemerintahan, delom sejarah ketatanegaraan Indonesia, otonomi pekon termasuk otonomi asli sai adu wat semakkung Indonesia merdeka.

Kik reno, pernyataan Pak Bupati sai aga ngeniko kewenangan (urusan pemerintahan) termasuk ngawur.

Ketelu, ... kanah nyepok pai api lagi wada ni Ujang.

Friday, June 15, 2007

Selamatan Kantor

WAT selamatan di kantor Borneonews selepas Jumatan.

Kidang, nyak mak pandai. Pengumuman sai titempel di sesai redik telepon mak kuliah rik waktu Beny cawa ngucakko ni, nyak mak nengi muneh.

Jadi, bablas pedom di mess antak dibi.

Ya... mak kebagian.

Tuesday, June 12, 2007

Met Ultah Ayah!


Met ULTAH Ayah!
Aidil doakan
smoga ber+
takwa, pinter,
sayang+cinta
AIDIL=MAMA:*

Pengirim:
*Permata*
+6281541514xxx

Pusat pesan
+62816124

Dikirim:
12-Jun-2007
02:16:31

(sms jak Ren, kajongku)

SMS bareh jak Kholid Lubis, Lampung jeno di rani. Sai bareh ni, syukor, mak pandai. Hehehee....

Kidang, jam lima dibi rupa ni rik jak Borneonews pandai jak Ethie, nyak ulang tahun.

Yah, kena deh. Gelepung rik telui ceplok di uluku. Tepaksa mandi dibi.