Labels

Tuesday, July 31, 2007

Komunitas Awan Senja

DELOM pertemuan di Aula Madrasah Tsanawiyah Negeri (MTsN) Kumai, Selasa (31/7), siswa jak enom sekula menengah di sepakat nyani Komunitas Awan Senja.







Kanjak muwak ni nyak mit Pangkalan Bun, nyak agak resah. Soal ni, Kotawaringin Barat jauh jak kegiatan sastra-seni-budaya. Kecuali konser musik.

Kasi tiucakko mak ngedok sai gelar ni penyair, sastrawan, atawa seniman di Kotawaringin Barat.

Kidang, kudengi-dengi, setemon ni wat potensi. Mujor nihan petungga jama Willy Eddy, guru bahasa Indonesia di MTsN Kumai.

Jak kicikan sekam ruwa, sepakat sepakat nyani wadah kreativitas.

Jadilah, Komunitas Awan Senja.

Ketua ni M Azhari dari SMAN 1 Kumai.

"Nyak ngeharap kegiatan injuk ini dapok terus wat," ani Willy.

Jadwal ni lumayan juga, seminggu sekali. Reti ni tiap rani Selasa jak rani inji, nyak musti nyiapko waktu aktif di komunitas. Injuk guru.

Yah, pakai ngisi waktu nyin Kotawaringin mak kerasa mangi ga.

Nangon, perlu proses sai mekejuk guwai inji aga wat wah ini.

Kidang, mak api-api. Kekalau wat laher penyair atawa sastrawan jak Kotawaringin.

Foto-Foto: Borneonews/Waeti

Friday, July 27, 2007

Yayae


KEPALA Kejaksaan Negeri (Kajari) Pangkalan Bun sai ampai, Yayae. Ya ngegantiko Kajari sai saka Nego Y. Abel sai timutasi mit Kejari Palangkaraya.

Bebai kelaheran Kuala Kapuas, 1958 inji semakkung ni Kepala Bagian Tata Usaha (Kabag TU) Kejasaan Tinggi Kalimantan Tengah (Kalteng).

Ya dilantik jadi Kajari Pangkalan Bun uleh Kepala Kejaksaan Tinggi (Kajati) Kalimantan Tengah (Kalteng) Harry Hermansyah, 23 Juli ke saka ji.

Jama ya ram buharap nyecokko hukum di Kabupaten Kotawaringin Barat (Kobar), sebareh jak kepelisian rik pengadilan.

Thursday, July 26, 2007

Meruyuh Beliasan

PANTAS Aidil mak mbangik mengan. Jeno pagi, waktu mama ni ngebuka kawai ni aga tiganti, ya ngeliak badan ni Aidil wat bintik-bintik suluh rapal.

"Mit rumah sakit pagi ji juga," ani Ren.

Temon do. Nyak mak ngebantah. Jak mandi, nyak langsung nginjam motor kantor.

Mit Rumah Sakit Umum Daerah (RSUD) Sultan Imanuddin, Pangkalan Bun.

Ani dr. Ari, sai mriksa, Aidil kena beliasan (bahasa Indonesia: campak).

Kidang, Aidil tetap riya injuk mak ngerasa meruyuh. Mak pira rewel, malah lalang-lalang. Padahal, ulun tuha sai kena belias goh, musti mak tantu rasa ni badan.

Aidil...

Wednesday, July 25, 2007

Kangian

AIDIL, miwang terus kik nyak aga mit kantor atau kik ya minjak jak pedom ngehalu ayah ni mak ngedok.

"Kasian. Aidil halok kangian. Di Lampung kan biasa meramik," ani Ren.

"Ayah mit kantor yu. Aidil pedom gawoh. Kanah ayah mulang," Nyak risok cawa nyin Aidil tenang kak aga berangkat atawa kak nelepon jak kantor mit lamban.

Tenang, Dil. Sanak uyun. Geluk balak nyin dapok nutuk ayah.

Monday, July 23, 2007

Rani Keruwa

Rani kerua sekam telu manak di Pangkalan Bun.

"Api ani kajong jama Pangkalan Bun?" ani Mas Pras nambi.

"Makkung ngedok!" aku.

Rani ini jawab ni luwar: mangi!

Adu kusangko.

Rani kerua. Ngurai Aidil rik mak ni midor. Singgah mit api ni Eko, rik sai paling redik minok ni pai. Kadu ni mit kantor rik Depot Mini. Serebok gawoh. Mulang gawoh.

Terai lumayan kedok.

Pas legau, tabung gas adu diantakko Roni, kidang makkung tipasangko jama kompos ni. Roni lupa ngusung obeng.

Maseh terai, nyak disusul Kombes sekitar pukul 16.30 WIB. Rapat di kantor. Jam enom Ren SMS ngucakko Aidil mising miwang. Tahi ni wat rah. Aidil miwang riya. Lemas riya.

Wah, lepas Magrib, nginjam mubil kantor distirko Yanuar, pakai ngantakko Aidil mit Dokter Agus ... (lupa gelar kudan ni).

Ani dokter, ingkah kebuyaan rik halok salah ni susu ni. Aidil kan mudah alergi.

Kidang, dasar Aidil. Kik tiurau midor, ruyuh injuk mak dirasa ni.

Sanak pintar!

Sunday, July 22, 2007

Sekam Telu Manak

SEKAM telu manak tanno ngumpul di Pangkalan Bun.

Minggu, 22 Juli 2007 sekitar pukul 14.00 WIB, Trigana Air sai sekam tumpangi tangkop di Bandara Iskandar, Pangkalan Bun. Muwak ni anakku Aidil rik mak ni, Reni ngilikko Bumi Marunting Aji.

Semangkung ni nyangkut lima rani di Jakarta. Sekam berangkat jak Lampung barong bak rik mak jak Liwa rani Selasa (17/7). Penyana berangkat rani Sabtu, pas ngakuk tiket ni di Media, nyata ni kambor tanggal 22.

Syukor nihan Aidil riyang-riyang riya di renglaya. Ingkah pudak ni bela dikeroh agas selagi di Jakarta.

Kalau ya nahan. Sihat selamat terus. Amien.

Tuesday, July 03, 2007

Wat-wat Gawoh*

WAT-WAT gawoh. Temon-temon wat-wat gawoh. Bebai tuha kena perkosa meranai.

Induh api sai wat di utok ni Enteng, 19. Masa muli tumbai alias bebai tuha, Kartini, 70, diperkosa ni.

Kartini nangon janda mani kajong ni adu mak lagi rik anak-anak ni adu belamban sunyin. Kidang repa muneh, masa bebai tuha.

Tebukti merkosa Kartini di lamban ni kajjong seno di Pekon Tanjung Beringin, Kecamatan Lamandau, Lamandau, Kalimantan Tengah, 11 Februari 2007 jam siwa dibingi, Majelis Hakim Pengadilan Negeri (PN) Kotawaringin Barat sai diketuai Muhammad Razzad jama anggota Viktor Suryadipta rik Mulyawan monis Enteng enom tahun kurungan.

Jak hampang ni tinimbang tuntutan Jaksa Didik Adyono 12 tahun kurungan.

"Kuterima putusan seno, Pak Hakim," ani Enteng ragu.

Wah, dang titirulah.

* Nginjam pai gelar ni rubrik Lampung Post.

Sunday, July 01, 2007

Ingok Nyak Yu! Petua Tahan...

BORNEONEWS nangon koran baru di wilayah Kotawaringin (enom kabupaten di Kalimantan Tengah). Terbit kanjak, 22 Desember 2006, umor ni ampai enom bulan lebeh.

Liwat moto 'Suara Rakyat Kalimantan' sai diusung ni, Borneonews beusaha kritis-analitis delom berita-berita ni.

Judul-judul berita injuk: 'Bupati Bersikukuh Beli Kapal Bekas', 'Anggota Dewan Sibuk Pikirkan Diri Sendiri, Gedung DPRD Jadi Sepi' atawa 'LPMP Provinsi Kalteng Sesalkan Diknas Kobar Soal Keterlambatan Gaji Guru Bantu', jelas nyani panas cuping ni pejabat.

Wat pepira kali pejabat mak aga cawa, lijung kik aga ditunggi wartawan, wat muneh sai ngebutongi wartawan Borneonews.

Yah, maseh wajar asal mak ngedok 'kekerasan fisik' atawa intimidasi.

Kidang sai dialami koresponden Borneonews di Kabupaten Lamandau Pujo Wicaksono adu keliwatan.

Cerita ni, Pujo ngewancarai Kasubdin Pengairan Dinas Pekerjaan Umum (PU) Lamandau Petua Tahan, Sabtu (30/6).

Waktu ditanya Pujo api tujuan ni inventarisasi aset pengairan, Kasubdin butong-butong.

"Aga ngetas nyak ya! Kok nanya ni detil nihan, injuk jaksa riya," ani Petua Tahan injuk sai ditiruko Pujo.

Mak cukup seno, Petua langsung ngerampas catatan Pujo. Kadu ni, sang lembar catatan wawancara disarakko ni rik dilelok-lelok ni.

"Ingok nyak yu. Nyak Petua Tahan," ani sambil nepuk dada ni.

Keliwatan!

Ketua Persatuan Wartawan Indonesia (PWI) Lamandau Musa Reban ingkah nyesolko kejadian seno.

"Guwai seno kuruk kategori pelecehan jama profesi wartawan. Sunyin ni pejabat musti ngereti rik pandai tugas rik tanggung jawab sai disuhun pers," ani.

Repa kelajuan ni?