Udo Z. Karzi

Pelukismu Agung... atawa Aidil? Hahaa...

2011-10-11T06:49:00.000-07:00

pelangi pelangi
alangkah indahmu
merah kuning hijau
di langit yang biru

pelukismu Agung...

MAKKUNG adu nyanyianni, Aidil, udo dangni Wan Agung, protes, "Ayin... ayin Agung. Pelukismu Aidil."

Hahaa...

Ya adu...

pelangi pelangi
alangkah indahmu
merah kuning hijau
di langit yang biru

pelukismu Aidil
siapa gerangan
pelangi pelangi
ciptaan Aidil

Hahaa... ngarang ngawur. Wat-wat gawoh.

Wan Agung

2011-07-04T01:37:00.000-07:00

GELARNI anakku sai nomor ruwa, adekni Aidil, nangon Raihan Herza Muzakki Liwa. Kidang, waktu bubat di Durianpayung, urauanni diganti: Wan Agung! Gelar di lamban riya, ani.

Keruwa, Sabtu, 2 Juli 2011 Wan Agung tepat ruwa tahun (laher 2 Juli 2009).

Nambi, Minggu, Juli 2001, sekam ruwa Aidil mit undangan kawinan. Di lamban, mamani, oma, rik maksuni, nyunjong pakai bagi-bagi kanikan jama kiri-kanan lamban. Yah, gantini perayaan ultah murah meriah.

Eehh... wat buwak ultah rik lilin muneh. Hadiah jak maksu. Nerima nihan, Maksu.

Selamat ulang tahun, Wan. Geluk balak rik tambah pintar yu.

Kidang, Udo Aidil sesera. Ani, "Ayin Wan. Aidil sai ulang tahun."

Aidil kan ultah kak Oktober nanti. "Ayin. Tanno," Aidil tetap ngotot.

Hahaa...

Lomba Ngewarnai

2011-06-26T07:10:00.000-07:00

FOTO-FOTO: LAMPUNG POST/ZAINUDDIN)

AIDIL nutuk Lomba Ngewarnai delom Lomba Kreativitas Dunia Anak Lampung Post, di Kantor Pemerinah Kota Bandar Lampung, Minggu, 26 Juni 2011. Kegiatan inji yaddo rangkaian Peringatan HUT ke-329 Bandar Lampung.

Yah, sekadar nutuk nyin meramiklah. Kik menang, induh...

'Pak Polantas' Mansa Piala

2011-06-12T22:29:00.000-07:00

SENANGON injuk biasani, rani Senin, 2 Mei 2011 sekirani jam 10, nyak ngitai Aidil mulang jak sekulani di Taman Kanak-kanak (TK) Putri Azizah. Sampai di TK, siswani adu luwar. Aidil tegar-tegar sambil ngusung piala.

"Piala beni sapa, Dil?" aku.

"Beni Aidil," ani.

"Ah, setemon," aku luwot.

Bu Nung, guru kelasni Aidil, cawa, "Ya, seno hadiah harapan III."

Rik-rikni Aidil ribut. "Aidil mansa... Aidil mansa...," ani tian beulang-ulang.

Kubaca di piala ditulis: Juara Harapan III Peragaan Busana Karnaval Hari Kartini TK Putri Azizah, 30 April 2011. Kaduni di tas, wat bungkusan hadiah muneh.

O...

"Wah, Aidil hebat," ani mamani Aidil mulang jak sekula ngeliak piala rik hadiahni Aidil.

Wah, Pak Polantas mansa piala rupani!

Aidil & Raihan: Foto-Foto

2011-04-06T23:01:00.000-07:00

Bang Irfan Anshory Mak Lagi

2011-03-17T01:06:00.000-07:00

Innalillahi wa inna ilaihi rajiun.

Mulang mit rahmatullah
Irfan Anshory
pada Selasa, 15 Maret 2011 pukul 5.30

Irfan Anshory (foto: Facebook)

Hara balakni kanjatku ngedengi kabarmu. Kik aga ngucakko sesol, hara gelukni Abang mit. Makkung waktuni niku ninggalko sekam sunyinni. Guai sa lagi melamon...

Kidang payu Abang, kekalau Allah swt. ngelapangko lapahanmu. Dua sekam kekalau Abang mangsa rang sai helai di redik Sai Kuasa. Amien.

Sekam sai... tinggal kekalau mangsa kekuatan muneh ngelajuko geguaian sai Abang ngemuakkoni.

Kejung ga warah kik aga ngucakko sapa rik api guaini Bang Irfan.

Berita ni wat di ija..., dija..., rik dija....

'Ngajar' Daleh 'Belajar' Nulis

2010-12-14T04:47:00.000-08:00

PENULISAN KREATIF. Workshop Penulisan Kreatif Tingkat SLTA se-Lampung sai digawiko Dinas Pendidikan Lampung rik Lampung Post di Bukit Mas, Bandar Lampung, Selasa, 14 Desember 2010. Mak kurang jak 100 siswa turuk acara sai dibuka Kepala Bidang Pendidikan Menengah dan Tinggi (Kabid Dikmenti) Dinas Pendidikan Lampung Agus Dwi Sunarti rik dihaderi Pemimpin Umum Lampung Post Bambang Eka Wijaya. Materi penulisan kreatif dikeniko Djadjat Sudradjat (Wakil Pemimpin Umum), Udo Z. Karzi (penyair, redaktur opini rik budaya), rik Dedi Kuspendi (konsultan perancang grafis). Moderator: Alhuda Muhajirin (redaktur pendidikan), Sri Wahyuni (asisten redaktur pendidikan), rik Armalia (SDM). (FOTO-FOTO: LAMPUNG POST/SYAIPULLOH)

Aidil di Family Day

2010-11-11T04:24:00.000-08:00

SEKAM telu, Aidil, mama ni, rik nyak nutuk acara Family Day Lampung Post di Krakatoa Nirwana Resort (tumbai: Kalianda Resort). Inji foto-foto ni Aidil nutuk lomba.

LOMBA LARI KARUNG: "Tegar, Dil. Eh, malah pema riya. Ya, tucer...."

LOMBA KELERENG-SUDU: "Waduh Dil, kelereng ni bang ticancan riya. Lapah pepelegohan muneh. Sai bareh adu mena..."

Mak menang... Kidang, sai penting riyang. Hahaaa...

"Aidil aga balon," ani Aidil.

"Kan mak menang, Dil?"

"Kidang Aidil aga balon...."

Ya adu, ngilu goh jama panitia. Untung panitia ni buyun.

Alhasil, "Ma, Aidil menang. Inji hadiah ni," Aidil ngejajakko balon ni jama mama ni.

Hahaa... Dasar sanak lunik.

Epak Tahun...

2010-10-28T04:45:00.000-07:00

AIDIL epak tahun rani ini, Kamis, 28 Oktober 2010.

Tian nyani uduk di lamban. Nyak hiruk jadi pembicara di Seminar Kebahasaan sai diguaiko Musyawarah Guru Mata Pelajaran (MGMP) Bahasa Indonesia se-Kabapaten Pesawaran di SMPN 2 Negerikaton, Pesawan antak jam telu dibi.

Ya, kebagian juga uduk di bingi ni.

Luar jak Sekula..

2010-09-01T03:50:00.001-07:00

TK Putri Azizah luar pukul 09.30. Injuk biasa ni, nyak sai nyusul ya.

Bebujukan. "Ayah, mit kantor, Yah," ani Aidil.

"Api guwai?"

"Ngeliak gambar."

"Gambar api."

"Gambar mubil."

"Mulang pai."

"Ngg... Mak aga. Mit kantor..."

Mak dibirik Aidil kik mak mit kantorku. Jadido, sekam ruwa mit kantor. Ngebuka interner nyepok-nyepok gambar mubil, gambar ni Aidil, rik bareh-bareh ni.

Petungga jama Wowok. Ngilu tulung foto. Inji foto-foto ni Aidil di kantor.

Kik waktu kuucakko jama mama ni, ani, "Aidil mulang pai mit lamban kik luar sekula. Dang jadi kebiasaan sampai mebalak. Singgah-singgah luar jak sekula...."

Temon muneh. Mak mehelau midor-midor makkung ganti kawai sekula.

Ekspresiku

2010-08-26T03:32:00.000-07:00

Nyak gering ekspresiku di fotoku inji. (Hahaa... narsis cutik mak api yu?). Foto inji kuakuk jak facebook jak acara Diskusi rik Buka Barong Seruit.com di Kampoeng Bamboe, Way Halim, Bandar Lampung, Rabu, 25 Agustus 2010. Sapa sai ngakuk foto ni nyak lupa. Nerima nihan.

Buka Inji, Sekam Aga Mulang

2010-08-19T05:34:00.000-07:00

ADU walu rani posa. Aidil rik Raihan kanjak semakkung posa mebeba'al. Sampai tanno maseh mebintok. Nambi Aidil tegar-tegar, tumbak muneh. Cukut ni mesakik, ani. Raihan seinginno ngebabalik riya pedomni, mak melelok.

Jeno barong jama Oma rik Titi -- renoAidil biasa ngurau Kiky, minan ni -- Aidil rik Raihan buayut jama Mbah ni di Kali Nangka.

"Raihan miwang, Ma, waktu diayutko Mbah," Aidil ngelapor jama mama ni.

"Aidil?" mama ni nanya.

"Aidil mak miwang!"

Raihan silat galah ni, ani sai ngayutko ni. Waduh... kalau Aidil-Raihan, tian ruwa, sekam sunyin ni kak Buka (Hari Raya Idul Fitri) ya.

Rencaka ni sekam pak manak aga mulang pekon pai Buka inji. Jeno nyak adu ngajuko cuti seminggu jak kantor.

Raihan ampai aga muwak ni mulang. Ngelebu. Padahal umor ni setahun lebeh.

Tanno, Raihan basa ni rajin nyesai (belajar lapah). Titaban mak aga lagi. Aga jelak riya.

"Induh, halok ya terok lapah tenggalan kak Buka. Sampai meruyuh-meruyuh," aku jama Ren.

"Halok."

Jadi, meruyuh uleh ni aga mepintar. Kekalau kidah kik reno....

Ultah di Lawok

2010-07-21T05:25:00.000-07:00

RAIHAN Herza Muzakki Liwa, sai laher 2 Juli 2009, ngerayako ulang tahun di lawok. Kebetulan mami ni Ariel ultah bulan Juli muneh. Jadi, Rey rik mami barong Udo Aidil, mama ni, oma, opa... sang keluarga balak mit Pantai Mutun, Minggu, 11 Juli ampai no. Nyak mak nutuk mani aga ngantor. Inji foto-foto ini tian.

Aidil Aga Jadi Juara

2010-07-14T05:25:00.000-07:00

"AIDIL mejong di hadap api di kudan?"

"Di hadap," ani Aidil.

"Ah, masa di hadap. Kik di hadap, sai ngehalang sai bareh ngeliak."

"Ah, mawatlah. Ibu Guru ni ngayun ya di kudan," ani mama ni.

Sapa gelar ni? Muhammad Aidil Affandy Liwa. Umor epak tahun kurang telu bulan. Ani Bu Guru, setemon ni Aidil kuruk play group gawoh. Kidang kasian. Umor ni nangon makkung epak tahun. Kidang badan ni sai paling balak di Kelompok A Kelas 0 lunik Taman Kanak-Kanak Putri Azizah.

Jumat, 9 Juli ampai no sekam telu manak mit sekula ni aga ngakuk kawai. Kidang kawai ni Aidil -- ukuran XL -- makkung jadi. Ani tian jak sekula, kanah tiantakko mit lamban. Kidang, titunggu-tunggu, kawai mak tiantak-antakko juga. Rani Senin, 12 Juli rani muwak ni sekula Aidil makai kawai jak lamban. Mulang ni kuliak adu makai seragam.

Jeno, Rabu, 14 Juli, Aidil makai kawai bebas luwot jak lamban. Kabar ni kantek-kantek ni sai bareh, adu mansa bagi seragam olahraga (tipakai rani unggal Sabtu). Aidil makkung. Ukuran XL ni makkung ngedok.

Sabar yu Dil. Sai penting rajin belajar. Semangat!

"Aidil aga jadi juara!" ani Aidil.

Hahaa... naiya reno Dil.

Kepala Daerah sai Ampai

2010-07-06T22:39:00.000-07:00

INJI pudak-pudak ni bupati/wali kota enom kabupaten/kota (Bandar Lampung, Lampung Selatan, Pesawaran, Way Kanan, Metro, rik Lampung Timur) hasil pemilihan kepala daerah (pilkada) bebarongan, Rabu, 30 Juni 2010.

Gambar kuakuk jak Lampung Post, Senin, 5 Juli 2010.

Raihan Setahun

2010-07-02T04:47:00.000-07:00

RAIHAN Herza Muzakki Liwa, adekni Aidil makkung lapah. Kidang adu gering hangkelut rik nyesai. Risok mak aga titaban. Kidang makkung dapok cecok kik mak begantung. Tititihko kidang risok mak aga.

Sesekali niru cawa. Tiap rani nyepok kicak rik nagu kucing. Kik ulun tuha, lagi nyancan buku atawa koran, hiruk muneh aga ngebaca. Hahaa... Udo Aidil goh makkung pandai ngebaca.

Rani inji, Jumat, 2 Juli 2010 umor ni pas setahun. Jeno mak rik Oma ni nyani mi uduk. Ya ngebagi kiri-kanan lamban.

Geluk balak yu.

Heran. Pilkada Helau Muneh Jadi Tontonan

2010-06-30T05:29:00.000-07:00

RANI inji, Rabu, 30 Juni 2010, enom kabupaten/kota di Lampung: Bandar Lampung, Metro, Lampung Selatan, Lampung Timur, Pesawaran, rik Way Kanan barong ngeguaiko pemilihan kepala daerah (pilkada).

Nyak niat jak awal mak aga mileh. Mak ngedok betik aga tipileh, ani atiku. Jadi pak mansa kartu pemilih rik undangan jak panitia pilkada Pesawaran, nyak mak mit TPS (rang ngeniko suara). Tian di lamban gawoh sai nyoblos.

Seradu tian mulang jak mileh, sekam ruwa Aidil mit rang cukor. Buwokku adu kejung ga perlu tipelok.

Kidang, rupa ni pilkada menarik muneh. Lamon kejutan. Calon unggulan wat sai kalah.

Injuk main bal di Piala Dunia 2010 di Afrika Selatan, pilkada ji rupa ni helau muneh "titonton".

Lamon sai Lupa

2010-06-28T06:17:00.000-07:00

JUNI serebok lagi bela. Cuaca mak nantu. Ani Badan Meteorologi Klimatologi dan Geofisika (BMKG), musim kemarau di Lampung tahun inji ingkah ruwa bulan, yaddo jak awal atawa pertengahan Juli sampai September kanah.

Serebok lagi, 30 Juni 2010, enom kabupaten/kota di tanoh Sang Bumi Ruwa Jurai, mileh kepala daerah (pilkada) barong. Ganti bulan, 2 Juli, Raihan umor ni genap setahun.

Nyak tambah tuha riya. Hamper lupa kik nyak ulang tahun (ulang tahun) 12 Juni 2010. Sepengetahuanku sai barong jama nyak ultah ni, Soni Elwina Asraf, rik sekantor rik Romadoni Yunanto, jejama alumni Teknokra.

Semanjang bulan Juni selain pilkada, rumpok hiruk uleh ni kasus video porno mirip Ariel, Luna Maya, rik Cut Tari, Piala Dunia, kontroversi Andi Nurpati, rik renglaya kirak di ipa-ipa.

Bulan Juni pemerai. Nyak jadi ingok puisi "Hujan Bulan Juni" ni Sapardi Djoko Damono sai terkenal. Kuterjemahko mit bahasa Lampung:

Terai Bulan Juni
Sapardi Djoko Damono

mak ngedok sai anjak tabahni
jak terai bulan Juni
diresiakoni tiak tiramni
jama kayu sai ngembang sedi

mak ngedik sai anjak bijakni
jak terai bulan Juni
dihapusni kas-kas cukutni
sai mejujut di renglaya sedi

mak ngedok sai anjak arifni
jak terai bulan Juni
ditagankoni sai mak keucakan
diisop bakak kayu kembang sedi

Mei Liwat... Terai Laju Riya

2010-05-31T04:56:00.001-07:00

ANI Badan Meteorologi Klimatologi dan Geofisika (BMKG), awal Mei mulai kemarau. Kidang, sampai Mei bela, terai maseh riya.

Ramalan BMKG goh risok mak tepat, apalagi teteduhni paranormal.

Ani jelma-jelma pintar, uleh ni efek rumah kaca atawa pemanasan global (global warming), iklim rik cuaca mak dapok titeduh lagi.

Penyana mepanas, tiba-tiba terai. Penyana aga terai kedok, kuk metiak cutik jak langek goh mawat.

Cuaca rik iklim mak ngedok atoran lagi!

Undangan, Kidang Mak Dacok Ratong

2010-05-27T02:37:00.000-07:00

DELOM minggu-minggu inji wat telu undangan mit nyak. Sai acara di lom kota riya, yaddo jak jak tim sukses ni calon wali kota Bandar Lampung Edy Sutrisno-Hantoni Hasan. Kuterima nambi. Acara ni: Pengumuman Pemenang Lomba Opini Edy Sutrisno rik pentas monolog Kenang-Kenangan Bebai sai Peliom Ireh karya W.S. Rendra, diusung Teater Satu di Taman Budaya Lampung (TBL), Sabtu, 29 Mei 2010. Acara inji, kik mak ngedok halangan, nyak ratong.

Kidang ruwa acara bareh ni di luar Lampung. Badan lagi mak sehat seradu jak kecelakaan, nyak mak dapok nutuk mit ruwa acara inji. Sai di Universitas Negeri Yogyakarta, Sabtu, 29 Mei 2010. Kegiatan ni Seminar Bahasa Daerah rik pengenian Hadiah Sastra Rancage 2010. Tahun inji jak Lampung, sastrawan Asarpin jama buku cerbun ni Cerita-Cerita jak Bandar Negeri Semuong (BE Press, 2009) sai ngena Rancage. Selengkap ni berita ni di ija.

Undangan bareh, jak alumni Teknokra di Jakarta. Tian nyani guai Re-launching Buku Teknokra, Jajak Langkah Pers Mahasiswa (Teknokra-Pustaka Labrak, April 2010), sai kebetulan kueditori barong Budisantoso Budiman di Jakarta, Sabtu, 5 Juni 2010. Anton (SCTV) adu nelepon langsung jak Jakarta.

"Yu, kik sehat nyak ratong," aku.

Kidang, repa kidah aga berangkat kik masih peincincut. Tumbak di renglaya, nyani geguaian muneh.

Payu, kekalau acara ni sukses.

Heran Nyak Mengapi

2010-05-23T07:24:00.000-07:00

HERAN nyak. Mengapi rumpok gering ireh kik sekam susah. Jak tumburan sa, SIM rik STNK makkung juga dikeniko pelisi jama nyak. Kadu ni, jeno di rani sekam reramikan ngeliakko lamban di Wismamas Kemiling -- akad ni adu rani Kemis, 20 Mei ampai no -- injuk ni pengembang ni seaga-aga ni ngalehko rang ni. Mak injuk denah sai mena, rang lamban sekam injuk ni tigeser mejauh redik rulah...

"Adu nasib..."

"Lain! Nangon rezeki ram."

Bos Bogor, Tagan Tekor Asal Kesohor

2010-05-18T05:55:00.000-07:00

NYAK ampai jak nelepon Pebatin Edi. Aga ngilu tulung.

Kidang, "Induh... mak ngedok bayangan ni... sekam kan ampai jadi jadi bos bogor...," ani.

Adui, bos bogor... laju ni, tagan tekor asal kesohor. Repa kidah?

Pameran Pembangunan Tikomersialko

2010-05-16T03:54:00.000-07:00

INDUH jak kesaka, gelar ni adu Pemeran Pembangunan Provinsi Lampung. Sunyin ni jelma Lampung adu pandai. Guai injimesti wat delom kalender kegiatan Agustusan di Lampung.

Rancangan Jembatan Selat Sunda

Waktu sekam di Pangkalan Bun, ibu kota Kabupaten Kotawaringin Barat (Kobar), Kalimantan Tengah tahun 2006-2008, nyak petungga jelma saijualan batu cincin atawa batu akik. Reno ya pandai nyak jak Lampung, ya cerita bahawa ya santor ratong mit PameranPembangunan di Bandar Lampung. "Dudi laris. Pameran ni meramik terus," ani.

Nyak muneh mangsa cerita bahawa peputaran ni duit di Pameran Pembangunan Lampung mebalak muneh. Wajar kik lamon sai nyiwa stand pameran kik pak sewa ni mahal. Mak ingkah jak lom Lampung gawoh, kidang jak ipa-ipa injuk jelma Pangkalan Bun sai kuceritako jeno.

Nyak sai semakkung ni mak pandai, rik risok malas mit Pameran uleh ni adu rutin unggal tahun; jadi bangga muneh.

Rupa ni Pameran Pembangunan adu ngetop di ipa-ipa, mak ingkah di Lampung.

Maka ni tekanjat waktu Pameran Pembangunan tiganti gelar ni jadi Lampung Fair. Lebeh tekanjat lagi, panitia aga ngakuk dana jak sai ratong. Sai ratong mit pameran wajib meli tiket. Rega ni Rp2.000/jelma rani Senin--Jumat rik Rp5.000/jelma pakai Sabtu-Minggu.

"Kik ram liak di daerah-daerah bareh sai gelar ni pameran pembangunan pasti wat tiket kuruk ni. Jadi ya wajar-wajar riya. Kidang sai jelas, makai rega tiket kuruk inji, guaian pameran aga lebeh uyun ni tibangko semakkung ni," ani Ketua Pelaksana Lampung Fair Sutono.

Ngawur! Pameran Pembangunan puluhan tahun jadi semacam pasar rakyat tahunan, tiba-tiba dicadangko uleh pemerintah provinsi (baca: panitia penyelenggara). Repa aga jadi pasar rakyat kik sai ratong musti ngebayar. Sai rugi juga -- kik sai ratong mangi -- ya jelas sai nyiwo stand pameran.

Sai aga ratong jelas miker-miker jama tiket sereno (tiitung unggal ulu); makkung biaya parkir ni. Kik pameran mangi, jelas duit sai mutar di pameran juga cutik.

Masa kik pejabat mak miker. Adu gelar ni keinggris-inggrisan, pejabat juga teruk untung balak jak guai inji. Rupa ni watak-watak "kapitalis" adu kuruk muneh di utok ni pejabat daerah Lampung. Pameran pembangunan unggal tahun tanno tikomersialko muneh.

Dasar kapitalis!

Jatah Urik

2010-05-01T21:38:00.000-07:00

UMOR tambah tuha riya. Setemon ni, umor alias jatah urik di dunia kurang terus.

Induh, wat guna ni api mawat urik terus. Injuk ani Ungu:

Wat kudo niku ngerasa
Hatimu hampa
Wat kudo niku ngerasa
Hatimu kosong

Ah, keliwat sentimentil. Sai benor injuk puisi sakaku (Udo Z. Karzi):

Mak Wat Kematian Sia-Sia
: tragedi sheila on 7

mak wat kematian sia-sia
kidang hurik harus tipejuangkon
kik pak keratongan tak pernah tikehagai
mani kehurikan nyata ni jak bangik ni
jak sai wat neram bayangkon

ah, nyata ni maut meredik nihan jak neram
mengapi mesti rabai pas ajal ratong
mani kehurikan nyata ni mak sehelau
api sai wat ram pikerkon

mak ngedok kematian sia-sia
kidang hurik mak harus nunda keberangkatan
mani kematian radu ngejelma perlawanan
pas keadilan jadi mainan
ram jelma lunik ingkah nerima nasib

repa pun hurik mesti tipejuangkon
-- kidang mak wat kematian sia-sia

bdl, november 2000

(Sabar yu, Tek, ani jelma sai induh sapa)

Jemoh...

2010-04-30T08:32:00.000-07:00

AH, mbuya ga. Injuk ni nyak serius ga ngelapahi kehurikan. Santai. Santai cutiklah. Api muneh sai aga tikejar. Kik sangon bagian, musti kagehan. Kidang kik lain aga beram, repa ya riya, ya beni rumpok.

Naiya geh!

Jemoh adu ganti bulan. 1 Mei 2010.

Mama Munyai, Ayah Munyai...

2010-04-29T01:14:00.000-07:00

"MAMA munyai, ayah munyai, meli kunci, meli motor, meli ruda,.... Rehan, mama, ayah, Aidil lapah-lapah pakai motor, mak kasi ngebut, kanah tumburan...." Induh pepira kali diulang-ulang Aidil cawa injuk seno.

Nyak ampai jak rapat. Wat sms ni Ren. Bunyi ni: "Aidil panas, mak aga mengan, mak aga nginom susu. Nanya motor riya."

Ah, Aidil. Sanak lunik mak kasi lamon ga pikeran. "Aidil meruyuh? Mengan, Dil. Motor ni maseh wat. Kanah tiuyunko... Mengan yu. Kik meruyuh ram mak dapok midor...," aku liwat telepon.

Aidil... Aidil... sanak pintar, kan serebok lagi sekula (TK).

Rei, Aidil, Anakku Kahut...

2010-04-28T02:45:00.001-07:00

HARA balak ni sesolku kik Rei, anakku sai keruwa, sampai wat api-api ni. Kidang besukor nihan jama Allah Swt. sai mekahut jama nyak, Rei, sekam seunyin ni, utama ni jama Rei, hinggo ni ya sehat munyaian mak api-api waktu sekam kecelakaan di hadap ni SDN 1 Langkapura Jalan Imam Bonjol, Jumat, 16 April 2010.

Kadu ni, halok ni oleh kahut ni Tuhan muneh, Aidil mak nutuk barong sekam waktu seno hinggo ni ya mak api-api. Mak kebayang jama nyak kik ya nutuk rik cecok di hadap ni motor waktu kejadian seno.

Sukor. Sukor nihan mak taru-taru...

Bala Ratong Mak Dacok Titulak

2010-04-27T05:19:00.000-07:00

RENO do, motor sekam telu manak, nyak, Ren, rik Raihan -- Aidil mak turuk, mani nutuk oma ni mit api ni Utie tian -- tumburan jama ruwa motor bareh di hadap SDN 1 Langkapura, Jalan Imam Bonjol, Bandar Lampung, Jumat, 16 April 2010 sekitar jam 4 dibi.

Ruwa cukutku rik culukku silat. Ren cukut kanan silat muneh. Nyak, epak bingi di RS Advent. Ren rawat jalan....

Syukor nihan Rei sai ampai 9 bulan, mak api-api. Pedehal, kik ani Ren, pudak ni kena aspal muneh.

Rei, Rei... pak rani inji nyak adu ngantor, kidang makkung dapok naban niku. Aduh anakku kahut...

Wat Wai di Renglaya, Bingung aga Mit Dipa Ya...

2010-04-14T05:27:00.000-07:00

BERANGKAT jak lamban aga mit kantor. Sekitar jam 14.30. (Sst, setemon ni telah. Jam kerjaku jak jam 12.00). Uleh ni terai kedok, nyak makai mantel. Kidang tembus juga kawaiku bosoh cutik di hadap. Makai ruda ruwa sih, makkung kebeli ruda pak.

LAMPUNG POST/M. REZA

Ruteku: Jalan Imam Bonjol -- Jalan Pramuka -- Jalan Zainal Abidin Pagar Alam -- Jalan Soekarno-Hatta. Lebeh kurang 1,5 km. Mak pira jauh setemon ni.

Terai kedok setemon ni biasa. Banjer juga biasa. Kidang, jenno ampai nyak miker, hara urak ni renglaya rik sistem drainase (renglaya ni wai) di Bandar Lampung. Masa di renglaya sai kuliwati renglaya aspal jadi halian. Wai tegedok dija, tegedok dudi sememanjang ni renglaya.

Drainase ni murak! Renglaya ni wai mak ngedok. Macet.

Wat wai di renglaya, kidang tian bingung aga mit dipa... Ya, adu midor-midor goh di renglaya aspal, kik mak pema di isan do. Nyadangko renglaya.

Mak Gayus...

2010-04-11T07:48:00.000-07:00

SAPA sai mak kenal Gayus Tambunan (Gayus Halomoan P. Tambunan). Pegawai pajak beumor 30 tahun, golongan III A inji tehantuk kasus markus (makelar kasus) pajak Rp28 miliar.

Lamon sai tekanjat. Repa kidah, gaji PNS golongan IIIA jama sakani beguai 0--10 tahun ingkah kekira ni hantara Rp1.655.800 sampai Rp1.869.300 unggal bulan.

Maka ni tanno wat joke ni:

Kik mak melamon kantek, gelar ni mak gaul.

Kik adu saka beguai, kidang mak mebatin-batin,
gelar ni... "mak Gayus".

Ah, kreatif juga sai nyani joke.

Geguaian Nyin Mak Pedom Dawah

2010-04-03T01:32:00.000-07:00

NYAK mak ngantor. Kidang jeno wat pelatihan jurnalistik di Majalah Republica FISIP Unila. Ya, sebagi ilmu jama sai bareh.

Ya, ilmu wat manfaat ni. Kekalau!

Adu mulang jak Unila, kidang wat cutik masalah. Nyak mansa sms jak Jogja, kidang aga ngebalos, pulsa bela. Ya, numpang nelepon jak kantorlah.

Jemoh pagi, Minggu, 4 April 2010 wat acara reuni Teknokra rik launching buku Teknokra, Jejak Langkah Pers Mahasiswa (Teknokra & Pustaka Labrak, Bandar Lampung, Maret 2010).

Teknokra per 1 Maret 2010 genap beumor 33 tahun. Selama kuliah di Unila, nyak rik pepira kantek sangon jak lamon ni minok di Teknokra. Enom tahun nyak aktif pers mahasiswa inji Teknokra (1991--1996) kutulis jadi judul Manusia Terkutuk Itu... sai wat di lom buku seno.

Penerbit Pustaka Labrak yaddo de penerbit sai sekam telu (Udo Z. Karzi, Y. Wibowo, rik Nugroho Este) cecokko awal tahun ini.

Nulis-nulis, ngeni pelatihan, nerbitko buku, kekala muneh sebebalak awak, ... api ya jadido. Yah, sekadar geguaian nyin mak pedom dawah.

Lehot

2010-03-31T07:23:00.000-07:00

"Wat lehot mawat?"

"Hana-hana ni lehot, geluk mulang!"

(Hehee... tiram ya?)

Aidil Aga Sekula...

2010-03-30T02:51:00.000-07:00

"AIDIL inji adu mebalak, Ma. Aidil aga sekula..." Induh, adu pepira kali Muhammad Aidil Affandy Liwa, anakku cawa jama mama ni, jama nyak, rik jama sai bareh-bareh ni.

Di bareh waktu, Aidil cawa, "Inji gelas Aidil pakai sekula." Atau, "Yah, meli tas pakai sekula."

Rupa ni terok nihan Aidil sekula. Nangon ya adu cukup umor kik aga sekula. Umor ni tanno adu aga telu setengah tahun. TK kelas nol lunik pai. Kik kuruk TK ni, 12 Juli 2010, umor ni di nana, epak tahun kurang telu bulan. Sesuailah. Malah kik aga play group pai injuk ni kebalakan. Dipa badan ni Aidil nangon mebalak.

Jadi ingok di Pangkalan Bun luwot. Aidil waktu lunik nangon risok "sekula" di SDN 1 Sidorejo. Kik minggu main-main di hadap ni sekula. Kidang kik minggu kuruk mit lingkungan sekula. Main, putar-putar, cengkelang di halaman ni sekula.

Kupiker wajar ya terok sekula. Tanno goh ya gering "ngebaca" rik ngegambar. Nyancan pen atau pensil rik nulisko ni adu menalom. Pedehal makkung nihan kik ngenal huruf. Ngitung goh maseh ngawur. Sai ruwa... tujuh delapan ... empat... sembilan.... Hahaa...

Ya, uleh ni seno, sekam telu mama ni mit Taman Kanak-Kanak (TK) Azizah di Perum Wismamas Kemiling Estate, Jalan Teuku Cik Di Tiro, Bandar Lampung, nambi, Senin, 29 Maret 2010. Ngadaftarko Aidil di kelas nol lunik. Rupa ni, wat enom calon siswa sai adu ngedaftar. Aidil pendaftar sai ke pitu.

Jak ngedaftar TK, aga mit toko ni Uthie di Telukbetung, terai kedok. Singgah pai mit Gramedia, kebetulan lagi wat bazar buku. Aidil mileh buku ni tenggalan. Kik biasa ni ya mileh buku mubil, tanno ya buku bareh. Halok mani ngedok buku mubil. Hehee.. Diakuk ni telu buku.

"Sai gawoh, Dil," aku.

Akher ni ya ngaku buku sai judul ni Hutan (Pullan).

Untung ni buku sai dipileh ni lain mubil.

Terai melana muneh. Ya, tepaksa makai mantel laju mit Teluk. Adek ni Aidil, Raihan Herza Muzakki Liwa adu mena barong oma ni....

Sai Mak Nulis, Mak Hak Tikenal

2010-02-16T00:43:00.000-08:00

Publish or perish. Wie schrijft die blijft.
Sai mak nulis, mak hak tikenal.

(ungkapan umum, kuakuk jak tulisan ni Alois A. Nugroho, Kompas, 16 Februari 2010)

PFISIP Ngilu P ni Lebon (1994)

2010-01-27T04:57:00.000-08:00

HIHIII... wat demo muneh pengalaman demo sewaktu mahasiswa. Sivitas akademika Persiapan Fakultas Ilmu Sosial dan Ilmu Politik (tisingkat PFISIP) Universitas Lampung demonstrasi -- setemon ni aksi mejong-mejong gawoh, maka ni keliakan mahasiswi ni sikop-sikop -- sawaktu Menteri Pendidikan dan Kebudayaan Wardiman Djojonegoro liwat di fakultas sekam. Inti: Ngilu P (persiapan) ni lebon jak FISIP. Nerima nihan jama Analis Zainal dan MAA Imam Santosa. Foto-foto inji tiakuk jak kiriman ni tian ruwa di Facebook.

Gus Dur Adu Mit...

2010-01-01T06:17:00.000-08:00

INNALILLAHI WA INNA ILAIHI RAJIUN. Mantan Presiden KH Abdurrahman Wahid, alias Gus Dur, Rabu (30/12) pukul 18.45, mak lagi di Rumah Sakit Cipto Mangunkusumo, Jakarta.

Induh api aga komentarku jama "guru bangsa", reno ya tijuluki. Bakas sai laher 4 Agustus 1940 di Jombang jama gelar Abdurrahman Addakhil inji keliwat lengkap sebagai jelma.

Wat sai cawa, ampai kerasa nihan penting ni Gus Dur jama negeri inji justru pas ya mak lagi. Jelma inji nangon hebat: api sai diucakko ni, api sai ditulis ni, api ya guai ni... Semangat kejelmaan, keislaman, rik keindonesia besai delom sunyinnya gerak-gerik ni. Gus Dur sai gigih ngejuangko demokrasi, penegakan hukum, keadilan dan hak asasi, rik kegegohan derajat delom kehurikan.

Temon, makkkung ngedok jelma sai ngegegohi Gus Dur. Selamat lapah Gus...

Nangguh*

2009-12-20T07:37:00.000-08:00

Sajak Iswadi Pratama

nyak adu ngekos rik begeluk lapah
kidang dang kik nyatat gelarku di rangok atawa
sesai batu. alamat muneh, mak kutinggalko
haguk niku

kak bingi kanah terai sai merapuh nerak
mit lom atimu, luardo serebok mit lepau
bingi aga ngebagi angi jama matamu sai rilau, kahut
waktu seno, sajakku dacok niku baca di helai bulung
sai basoh

kanah nyak aga ratong, kidang dang kik balak ga kehaga
sai kukejar lain kik rupa kepastian, kahut
kidang sangon reno bakas, musti wat sai
aga tisepok. daleh niku, musti wat sai dapok
titunggu

1994

* diterjemahko Udo Z. Karzi jak sajak "Pamit" karya ni Iswadi Pratama, tibacako semakkung Diskusi Bilik Jumpa Sastra (Bujusa) sai digawiko Unit Kegiatan Mahasiswa Bidang Seni (UKMBS) Unila, Kamis bingi, 17 Desember 2009.

Hijrah...

2009-12-19T02:35:00.000-08:00

Payu kidah ram maleh rik ninggalko guai sai mak ngedok angkit ni.

Hara lamon rancaka sai maseh tekacai.

Dang pedom terus. Minjak pai... nyin ram pehalu matarani

rik imbun sai maseh mekecah pakai ngebasuh alalung kamak

jak lom ati ram.

1 Muharram 1431 H/18 Desember 2009

Seni sai Keangian

2009-12-18T02:11:00.000-08:00

MENGAPI nasib kesenian di tanoh inji maseh riya keangian. "Kehaga sederhana ni seniman nyin karya ni tiapresiasi jama jelma lamon mak santor pehalu, api lagi kehaga nyin wat pasar siap jadi 'mesin' reproduksi rik distribusi karya-karya seni," ani Iswadi Pratama delom Diskusi Geliat Kesenian di Bumi Lampung, Sapa sai Peduli Bilik Jumpa Seniman Mahasiswa (Bijusa) guai ni Unit Kegiatan Mahasiswa Bidang Seni (UKMBS) Unila, Kamis, 17 Desember 2009 bingi.

Iswadi Pratama, Rahmat Sudirman, rik Khaidarmansyah (LAMPUNG POST/M. REZA)

Rupa ni seniman, pemerintah daerah, rik kalangan swasta maseh lapah tenggalan-tenggalan jama kepentingan masing-masing. Mak setunggaan. Maka, jadido kesenian jaoh jak kehurikan nyata ekonomi-politik; pejabat/birokrat ngerasa mak perlu ngeliak kesenian rik pengusaha ngerasa rugi kik aga nonton, api lagi kik aga nyumbang dana jama seniman.

Pedahal repa aga misahko kesenian (baca: kebudayaan) jama jelma. Mak kebayang jelma mak ngedok budaya, kuruk di lom ni kesenian!

Ah, mati sakik ni nasib kesenian. Mak ubah ni jama nasib ni kebudayaan sai mak wat kena iwoh!

Belajar Nulis, Ngasah Kepekaan

2009-12-13T07:05:00.000-08:00

NYAK mansa undangan jak Unit Kegiatan Mahasiswa Fakultas Forum Silaturrahmi dan Studi Islam (FOSSI) Fakultas Teknik Universitas Lampung (Unila) ngeni materi delom Pelatihan Jurnalis Intern di Gedung A FT Unila, Minggu, 13 Desember 2009.

Materi sai musti kuucakko Jurnalistik: Definisi & Sejarah. Salah setemon ni. Praktisi (wartawan) malah tikayun cawa teori! Materi praktis Langkah Nyusun Artikel malah diantakko dosen Bahasa Indonesia.

Kidang ya mak apilah. Nyak nawar jama panitia. Teori jurnalistik cutik, kadu ni kutambahko nulis di media massa.

Inti ni: Sunyi ni jelma pandai nulis. Kidang nulis di media massa, lamon atoran ni, di hantara ni, sesuai jama visi, misi rik karakter media; bahasa sai helau; tema spesifik rik aktual; rik gagasan orisinal (asli) lain niru.

Sai-sai ni cara jadi penulis yaddo... nulis! Dang rabai tikeritik.

Latihan nulis, setemon ni upaya ngasah kepekaan neram. Kepekaan yaddo modal penting penulis.

Cara bareh ngasah kepekaan, ngebaca, nonton tivi, ngicik, diskusi... Jak kurukan seno unyin ni, laher inspirasi rik ide. Kik adu mansa gagasan ya langsung sambar: tulis!

Catitan 2 Desember

2009-12-02T00:15:00.000-08:00

ISENG-ISENG gawoh. Ngebuka Wikipedia. 2 Desember yado rani ke-336 (ke-337 delam tahun kabisat) delam kalender Gregorian rik 29 rani lagi mit akher tahun.

Pepirira kejadian di tanggal inji, di hantara ni: 1804 - Napoleon Bonaparte ditahbisko jadi kaisar Perancis di katedral Notre Dame, Paris; 1915 - Albert Einstein ngepublikasiko teori ni tattang relativitas umum; 1988 - Benazir Bhutto dilantik jadi Perdana Menteri Pakistan, ya muwak ni perdana menteri besai di sai negara Islam.

Sai laher tanggal 2 Desember: 1968 - Lucy Liu, aktris AS; 1973 - Monica Seles, pemain tenis sai lahir di Serbia; rik 1981 - Britney Spears, penyanyi AS.

Gelar ni goh iseng-iseng. Rani inji, Raihan ulang bulan ke-5. Maksud ni Rehan umor ni lima bulan rani inji (ya laher 2 Juli 2009).

Ya, mak ngedok acara api-apilah. Dang hak ulang bulan, ulang tahun goh halok mak nyani acara api-api. Hehee....

Agak beda cutik jama Aidil, udo ni Rehan. Sa, unggal tanggal 28 Oktober unggal bulan sampai umor ni setahun, geguai ni mama ni atawa oma ni nyani kanikan cutik sai tibagi-bagiko mit kiri-kanan kebelah lamban. Reno lehot ni Nenek Encoh sai ngubati Aidil nyin munyaian.

Rehan, syukor munyayan. Kekalau munyaian terus. Geluk balak yu Rehan. Udo Aidil ngurai main bal atawo midor-midor.

Hara Lamon ni aga Jadi Amtenar

2009-11-29T01:50:00.000-08:00

MAK kurang jak 87 ribu pelamar nutuk tes calon pegawai negeri sipil daerah (CPNSD) rani inji (Minggu, 29 November 2009) di 14 kabupaten/kota di Lampung. Data inji nangon kurang valid uleh ni sai pelamar dapok gawoh ngedaftar di -- sampai epak kabupaten/kota. Pak reno, tetap riya inji nunjukko hara lamon ni kehaga ni rumpok aga jadi amtenar.

Rupa ni "priyayi" tetap jadi primadona di "negeri pengangguran" inji.

Pagi hayu nyak ngantakko Ren tes di SMPN 1 Bandar Lampung. Adu pepira kali ya nutuk ngedaftar jadi pegawai negeri kanjak tahun 2004, kecuali tahun 2006 rik 2007 mani ya rik Aidil nutuk nyak di Borneo. Sekitar jam 11 nyak barong Aidil, nyusul mama ni.

"Repa?"

"Kurang waktu ni. Kidang jam puluh lebih cutik adu lamon sai luar jak ruang tes. Ya kuisi unyin riya. Kan mak ngurani nilai," ani.

Alhasil... nyubai luwot. Kekalau nasib basa ni beram.

Kik ngedengiko rumpok kawa ngeni pitis sampat jut-jutan (sogok) jama panitia sai nerima CPNS, induh kidah. Ingkah Tuhan goh sai pandai. Sekam ingkah ngandalko usaha rik dua. Mak ngedok dana ni! Kik pak wat pitis ni, hara temadan ni tikeniko jama jelma sai nangon adu pebatin-batin alias pejabat.

FOTO-FOTO LAMPUNG POST

Keliwat idealis? Ah.... masa mak ngedok celah lagi pakai ni jelma jereh rik ... (astaghfirullah, lain kik takabur) jujur?

Sekali lagi: Usaha rik dua. Selebeh ni, kalau nasib lagi beram.... Amien ya Allah.

Ruwa Ketebah: Iduladha rik Jumatan

2009-11-27T00:38:00.000-08:00

TANGGAL 10 Dzulhijjah 1430 H. betepatan jama 27 November 2009. Reti ni Buka Haji (Hari Raya Iduladha) pas rani inji, Jumat. Reti ni wat ruwa ketebah, ketebah sembahyang Ied rik ketebah sembahyang Jumat.

REZEKI BUKA. Sanak sai ngumpulko koran pakai alas mejong seradu bubar sembahyang Ied. (LAMPUNG POST)

Sembayang Ied rik sembayang Jumat di Mesjid Baitul Amanah. Kebenoran khatib ni sai riya.

Isi ketebah mestilah ngebahas cerita rik hikmah seputar Iduladha. Paling mawat delom Iduladha wat ruwa ritual penting yaddo de: haji rik kurban.

Delom ibadah haji rik kurban unsur ikhlas, sabar, mak mudah nyerah, rik peduli lingkungan (sosial) sai penting ngarungi kehurikan sai latap di ganguan rik tantangan.

Idulkurban -- gelar bareh ni Iduladha -- reti ni ngeredikko badan rik ikhlas nutuk perintah rik ujian Allah. Setemon ni, jelma di keliwat lunik tibandingko jama kemahabalak ni Allah swt.

Jadi, tokko kik mepungah ga urik di dunia inji!

Latihan "Lalang-Miwang" ESQ

2009-11-23T04:37:00.001-08:00

PIPIRA kali nyak didaftarko kantor nutuk ESQ training, akher ni nyak nutuk juga.

Maka, Sabtu-Minggu, 21-22 November 2009, nyak rik Agung, kantek jak kantor turuk "memainan" ESQ di Hotel Sahid, Panjang.

Latihan lalang-miwang do sekam, lebeh jak seratus jelma sai turuk.

Kekalau wat guna ni.

Scooby Do rik Bebai Longan

2009-10-30T01:35:00.000-07:00

PAGI ji, injuk biasa ni nyak ngantakko Ren mit ngajar. Aidil sai santor aga nutuk, halok uleh ni mebuya di lamban riya nonton film seri Scooby Doo sambil lalang-lalang tenggalan.

Mani wat sai aga tifoto copy, singgah pai di rang foto copy. Kidang, waktu Ren adu cakak motor jak moto copy, wat mak-mak (induh kik muli, he...hee....) makai bekara kamak rik ipon kunjer, ngerediki sekam.

"Mahap, Bu. Nyak aga mit Rajabasa, ulun tuhaku mak lagi. Kidang ongkos kukurang... Nyak ngilu tambah Rp2.000," ani bebai seno sambil ngeliakko duit Rp1.000. Ditambahko ni muneh pepira kali, "Dang butong yu... Dang butong yu..."

Api muneh, ani atiku. Kidang nyak pema riya. Ren ngebuka tas ni kadu ni ngeniko Rp50 logam jama... induh sapa bebai seno.

Dang butong, dang butong, ani, kidang ya sai ngeribok ngeranuh. Kesol juga nyakku. Aga pak kusegung gawoh jelma seno.

"Adu... adu... Jelma longan ano," ani Ren ngehalang nyak.

Eh, bebai longan do halok. Malah ya butong-butong rik cawa ruta (maaf), "Kampang!" Induh pira kali.

Ya adu, kutarik gas ni motor. Lapah. Dasar longan maseh juga cawa, "Mit...mit..."

"Musti ni ikin ti keni jeno," aku.

Temon-temon longan.

Telu Tahun

2009-10-28T05:17:00.000-07:00

RANI inji Aidil genap telu tahun. Lamon cerita, kidang susah ngewarahko ni.

Mak ngedok acara api-api. Ingkah mama rik oma ni nyani sekunyit gawoh sai tibagi-bagiko
mit kiri-kana lamban rik sanak-muari.

Ya adu, selamat ultah, Aidil.

Kicik Bangik, Petungga Bang Bam, rik Halalbihalal

2009-09-30T06:55:00.000-07:00

RANI inji wat ruwa moment. Dibi sekitar jam pak dibi nyak ratong di acara Bincang Asyik Paris dan Islam di Toko Buku Gramedia rani inji.

Penulis buku Paris Lumire de L'Amor, Catatan Cinta dari Paris, Rosita Sihombing -- kantek jak koran Sumatera Post tumbai -- jadi pembicara barong jama inggoman ni, Patrick Monlouis rik jak penerbit Lingkar Pena sai cawa di hadap. Ketua Harian Dewan Kesenian Lampung (DKL) Syaiful Irba Tanpaka jadi moderator.

Nyak mak aga cerita lamon soal acara inji. Berita insya Allah dimuat koran. Buku inji diresensi Christian Heru di Lampung Post.

Ingkah wat kejutan cutik. Nyak petungga jama Bachtiar Amran Daeng Mannu (biasa ni ya diirau Bang Bam -- gelar sai dipakai ni sebagai initial di kak nulis berita).

Wartawan Kompas di Lampung tahun 1990-an inji do sai ngajar sekam (sanak-sanak Teknokra Unila) nulis berita atawa jurnalistik. Malah, seniorku injuk Machsus Thamrin, Maspril Aries, rik Iman Untung Slemet belajar langsung jama ya. Yah, semacam magang jama ya.

Adu saka nihan mak petungga ya ji kanjak ya kabar ni mansa kecelakaan hebat. Kik ani, ya sampai mak dapok cawa sampai 1,5 tahun saka ni. Tanno ya tinggal di Tanjungpriok, Jakarta. Cerita ni wat di ... (klik: Bang Bam, Sebuah Buku yang Tak Pernah Habis Dibaca).

Moment keruwa wat Halalbihalal di DKL di lamban ni Ketua Umum ni, Atu Ayi (Syafariah Widianti) sekitar jam 7,5 bingi. Barong jama Edy Samudra rik Anton Kurniawan kesipak petungga jama Atu Ayi ngucakko rencana aga mit Malaysia.

Yah, kekalau jadi. "Insya Allah. Kanah titulung," ani Atu Ayi.

Kekalau kidah!

Buka Balak

2009-09-18T02:03:00.000-07:00

Pahala Pahalu...

2009-08-22T04:21:00.000-07:00

PUASA yu. Nyin kuti mansa pahala, pahalu muneh...

Aqiqah

2009-08-17T05:06:00.001-07:00

Adek ni Muhammad Aidil Affandy Liwa
Laher di Bandar Lampung, 2 Juli 2009. ANAK ke ruwa ni Zulkarnain Zubairi-Reni Permatasari.

Rani inji (Minggu, 16 Agustus 2009)
gelar ni tikukuhko:

Raihan Herza Muzakki Liwa.

Kekalau jadi sanak hebat!

Rendra-Mbah Surip: Kawa Urik, Musti Kawa Mati Muneh...

2009-08-10T02:54:00.000-07:00

W.S. Rendra (Wahyu Sulaeman Rendra, laher sebagai Willibrordus Surendra Broto Rendra di Solo, Jawa Tengah, 7 November 1935 - mak lagi di Jakarta, 6 Agustus 2009 delom umor 73 tahun) yaddo dia penyair tekemu sai tijuluki si Burung Merak.

Mbah Surip (Urip Achmad Riyanto, laher di Mojokerto, Jawa Timur, 6 Mei 1949 – mak lagi di Jakarta, 4 Agustus 2009 delom umor 60 tahun) yaddo dia penyanyi Indonesia.

Ruwa jelma tekenal ji ngajarko lamon hal, utama ni soal kegigihan, konsistensi, rik kepedulian.

Mbah Surip rik Rendra ngajarko: Kawa urik, musti kawa mati muneh.

Kik Main Gegol, Repa Aga Profesional?

2009-07-28T05:01:00.000-07:00

MUTASI pejabat Pemkot Bandar Lampung nyani ribut. Wakil Wali Kota Bandar Lampung Kherlani (47) ngebetu tengah rik culuk kanan ni Sekretaris Kota (Sekkot) Sudarno Eddi (53) makai sepatu.

Kherlani dan Sudarno Eddi (LAMPUNG POST/DOK)

Kejadian seno di rang kerja ni Kherlani, Jalan Dr. Susilo, Telukbetung Utara, Senin (27-7), sekitar jam 08.45. Kepala Badan Kepegawaian Daerah (BKD) Bandar Lampung, Kusmardianto, ngeliak langsung aksi main betu seno.

Mak saka jak isan, Sudarno Eddi ngelaporko Kherlani mit Poltabes Bandar Lampung. Tuduhan ni guwai mak nyani kegeringan. Sudarno ngelapor mit pelisi dikawal lima anggota Satpol PP rik didampingi Kusmardianto.

Kacau... kacau... pemkot kena kuruk preman(isme)! Kik main gegol reno, repa aga profesional?

Raihan...

2009-07-26T06:23:00.000-07:00

ADEK ni Aidil mansa tambahan gelar luwot di hadap ni. Raihan... Lengkap ni jadi Raihan Herza Muzakki Liwa.

"Kejung ireh jadi ni," aku.

"Taganko!" ani Ren.

"Ngurau ni api?"

"Rai."

"Ya, adu kik reno."

Biadab!

2009-07-17T05:57:00.000-07:00

BOM ngeledak luwot di Hotel JW Marriot rik Ritz Carlton, Jakarta, Jumat (17/7/2009). Ledakan kesai di Hotel JW Marriott sekitar pukul 07.40 WIB. Pepira menit seradu ni ledakan atang muneh di Hotel Ritz Carlton.

Hotel JW Marriot rik Rits Carlton kas bom ngeledak. (RUMGAPRES/CAHYO BRURI SASMITO)

Pira ya riya korban, sapa riya sai jadi korban ni, turis atawa jelma ram tenggalan; tetap riya ini guwai sai mak ngedok rasa kejelmaan.

Biadab!

Selingkuh Kata #3

2009-07-16T08:17:00.000-07:00

LAMPUNG Ekspres ngegawiko Selingkuh Kata #3: Khazanah Budaya Lampung dalam Sastra dan Musik di Lamban Dinas ni Wali Kota Bandar Lampung, Rebu, 15 Juli 2009 bingi.

Pemimpin Redaksi Lampung Ekspres HM Harun Indrajaya ngebacako puisi Mak Dawah Mak Dibingi rik penyair Syaiful Irba Tanpaka ngebaca Sajak Angin seradu nyak ngebacako pepira sajak sai wat di buku Mak Dawah Mak Dibingi (BE Press, 2007).

Adu jak baca-baca puisi, gileran ni grup musik cetik sai dipimpin Entus Alrahfi ngemainko cetik sai tikolaborasiko jama musik modern. Terakhir, bedah buku rik apresiasi musik cetik. (FOTO-FOTO: LAMPUNG POST/M. REZA)

Herza Muzakki Liwa

2009-07-10T05:43:00.000-07:00

HERZA Muzakki Liwa. Seno gelar ni adek ni Muhammad Aidil Affandy Liwa.

Ya laher di Bandar Lampung, Kamis, 2 Juli 2009 pukul 02.30 WIB.

Kekalau jadi anak pintar, mak nyusahko ulun tuha, rik nyani mewuwahko dunia.

(Waduh, adu seminggu lebeh makkung wat foto juga!)

Indonesia Mileh Presiden

2009-07-08T00:42:00.000-07:00

Inji telu pasang kandidat presiden ya segaga kersi delom Pemilu Presiden rani inji, Rabu, 8 Juli 2009.

(jak LAMPUNG POST)

Injuk ni -- kik ngeliakko hasil quick count (itungan geluk) -- pasangan Susilo Bambang Yudhoyono-Boediono (nomor 2) menang telak tibandingko pasangan Megawati Soekarnoputri-Prabowo Subiakto (nomor 1) rik Jusuf Kalla-Wiranto (nomor 3).

Jadi, SBY presiden Indonesia luwot!

Adek ni Aidil Laher

2009-07-02T02:47:00.000-07:00

ADEK ni Aidil, laher di RS Advent, Bandar Lampung, Kamis, 2 Juli 2009.

Syukor nihan laher ni lancar-lancar riya. Anak pintar mak nyusahko ulun tuha. Sampai di Advent sekitar jam sai bingi, jam 02.30 WIB ya laher.

Bakas injuk Aidil. Rik main bal, dapok muneh rik rigu.

Muwak ni Aidil injuk sesera jama adek ni. Kidang seradu ni aga barong adek terus.

"Ma, Aidil sekolah ya. Bareng adek," ani.

Angka 39

2009-06-12T21:12:00.000-07:00

Wat sai ulang tahun rani inji.

Lamon Cerita Mak Dicatat...

2009-05-31T23:15:00.000-07:00

Mei liwat riya
Lamon cerita mak ticatat....

Cont(r)eng...

2009-04-09T01:18:00.000-07:00

CONTRENG... Pak salah nutukko Kamus Besar Bahasa Indonesia (KBBI) atawa ani pakar bahasa Indonesia, Komisi Pemilihan Umum (KPU) pe-de riya jama cawa: "Contreng!"

Halaman depan Lampung Post Edisi Pemilu Legislatif, Kamis, 9 April 2009.

Iklan Pemilu di TV sai nyosoalisasiko cara mileh delom Pemilu nyani Aidil, anakku sai ampai 2,5 tahun sampai paseh ngucakko, "Contreng."

Jak bingi cawa jama mama ni aga nutuk Titi (Kiky), mak su ni nyontreng rani inji. Kidang, ya batal nutuk mani wak maksu rik oma ni aga mit TPS terai.

Rani inji libur nasional mani jelma lamon ramik-ramik nyonteng. Jemoh musti ni libur muneh mani Paskah. Kidang Lampung Post ruwa rani libur seno malah terbit.

Rencaka aga midor mak jadi. Dipa rani jak pagi beberai riya.

Pemilu Legislatif, 9 April 2009. Nyak rik mama ni Aidil mak mileh. Mak terdaftar di Daftar Pemilih Tetap (DPT).

Sai-sai Kantek Mit...

2009-04-06T08:36:00.000-07:00

Sai-sai kantekku mit rik mak mungkin muloh luwot.

NYAK ingok nihan syair lagu Ujung Asal Pondok Gede ni Iwan Fals inji.

Tumbai nyak lagi di Lampung, mulai jak Iswadi Pratama rik Khaidir Asmuni mundor. Nyak lagi di Borneo, gantian Budi P. Hatees rik Teguh Prasetyo luar. Gileran nyak mulang, Ibram Haril, Yoso Mulyawan, rik tanno sai ampai nihan Rahmat Sudirman mit muneh. Induh sapa lagi.

Api aga cawaku? Senangon reji urik sa. Mak Dawah Mak Dibingi!

Sejarah Mak Jadi-Jadi

2009-04-01T09:57:00.000-07:00

Sejarah lain nambi, apa lagi tumbai
Sapa ya riya api ya riya guwai ni
Rani inji yaddo sejarah kak nanti
Kucuba nulis delom blog inji

Nyani tulisan sejarah mak jadi-jadi
Hihihiii...

(Syair Sejarah Mak Jadi-Jadi)

Lalang-Miwang

2009-03-18T09:57:00.000-07:00

AIDIL kik lalang... waya.

Kidang kak miwang, huu... murak ireh.

Wat pantun ni:

Lalang miwang
dipusok tahi manang

"Hii... bau,"
ani Aidil

Lalang luwot...

Wat Api Ya?*

2009-02-16T08:50:00.000-08:00

Wah, wat api ya? Bang blog inji mak keliakan posting-an ni?

* Semakkung posting inji, sunyin ni mak keliakan. Kidang, seradu ni, ampai nimbul.

Pepira Cerita

2009-02-09T06:42:00.000-08:00

SEBULAN lebeh nyak adu di Lampung. Aidil tian ruwa mama ni adu mena kanjak ruwa bulan sai mena, awal November 2008. Pepira cerita sai dapok kuwarahko dija. Kilu mahap kik serba mebuntak.

Aidil tanno megemuk juga. Bihom ni adu latap luwot. Mengan adu metelop luwot. Ayah adu mulang. Tiap rani aga midor terus. "Naik momi, naik momi...(maksud ni cakak mubil)" ani.

Rani Sabtu, nyak setemon ni libur mak kuruk kantor. Aidil terok midor. Ya adu, kuusung goh mit kantor. Ingkah wat Taslim, Fitri rik Sabam di redaksi. Sai bareh makkung ratong. Aduh, Aidil ... mak dapok pema. Nyak mak dapok kerja ngebuka komputer. Culuk ni otak-atik micit tombol komputer. Ya, mati komputer ni.

Mak dapok pema. Nyak basa ni nyetel musik, ya cakak keresi. Kerisi ni mutar-mutar (nangon dapok mutar). Uleh ni cukut ni makkung sampai di lantai. Waktu kursi ni geser, Aidil tumbak. Ya miwang, mesakik jelas kena dinding rik lantai lantor. Kucuba ngebuka salok ni ulu ni. Mak ada, malah tambah kuat miwang.

"Geluk mulang," ani Ren. "Aga ngantakko Utie tian mit Garuntang." (Eh ya, Utie ampai mansa adek bakas, laher di Rumah Sakit Urip Sumoharjo, Bandar Lampung, 31 Januari 2009 pukul 23.30 WIB.)

Biasa riya. Eh, rani Minggu ni Aidil mepanas. Ren butong-butong. Tundun ni Aidil mebayoh, ani.

Jeno Aidil adu bubat jama dr Baruddin di RS Advent. Adu nginom ubat ruwa kali, di rani rik dibi. Syukor panas ni adu regah. Adu merial luwot. Main-main.

* * *

Di kantor nyak mangsa tugas di kompartemen umum. Kidang, pepira kali ngeguaiko halaman pendidikan, halaman opini, rik koran minggu sewaktu redaktur ni cuti atau meruyuh.

***

Berita duka:

Hadiah Sastra Rancage 2009 mak tikeniko jama sastrawan Lampung. Nyak tehangos rasa ni! Selengkap ni baca dija.

***

Reno riya. Mak mekejung. Cerita kanah tilapok....

Muloh Rang Saka

2009-01-08T06:49:00.000-08:00

CERITA cutik pai.

Nyak di Lampung luwot tanno. Muloh di rang saka. Kuruk jak rani Selasa, 6 Januari 2008 ampai no.

Kalender 2008 Tekebok

2008-12-31T02:04:00.000-08:00

Kalender 2008 tanno tikebokko. Kamis, 31 Desember 2008.

Serebok lagi lembar sai ampai tibuka. Jumat, 1 Januari 2009.

Selamat tahun baru jama sunyin ni. Jejama ram ngejimpang mit masa sai jak uyun ni.

Kekalau krisis geluk liwat.

Amtenar

2008-12-29T08:59:00.000-08:00

NGELEKIK musim pendaftaran calon pegawai negeri sipil (CPNS). November-Desember 2008.

Pema-pema (pedahal setemon ni adu pandai sunyin), enom jelma jak Borneonews ngedaftar.

Telu di hantara ni terima. Kebetulan tian telu jak bagian redaksi sunyin: Andri Saputra, Tira Puspitasari (Pangkalan Bun) rik Imam Rosyidin (Lamandau).

Telu bareh ni, Ali Gusman, Puguh Santoso, rik Erlan mak lolos.

Jemoh diumumko di koran Borneonews.

Huu...

"Niat ni riya mak lurus. Repa aga terima," aku ngemainko Ali.

"Liak-liak Ali di luar. Dang-dang ya ..." lamon cawa ni Eko.

Hahaa... Maksud ni frustasi trus kuruk numbur-numbur mubil kik mak kuruk siring.

Wih, jadi amtenar. Selamat ngelapahi renglaya sai baru jama sai kena terima.

Bingi Tahun Baru Hijriah

2008-12-28T05:01:00.000-08:00

JEMOH 1 Muharram 1430 H.

Cerita-cinta jak Borneo gegoh gawoh.

Mesjid-mesjid di Pangkalan Bun wat muneh sai ngerayako ni.

Kidang nyak ya... mati lampu luwot di rangku.

Repa muneh. Pedahal, epak genset tambahan adu urik.

Tanno libur. Api kidah aga guwai?

Susah Nyunsung Rp200

2008-12-26T09:04:00.000-08:00

PEDAGANG di Kotawaringin (Borneo) sok-sok. Rupiah nangon hamper mak ngedok reti. Bukti ni nominal pecahan rupiah sai paling lunik Rp50.

Kik pak reno, Rp50 kan harus ni lagi dapok tipakai belanja. Kidang di rangku tinggal tanno, tukang jual mak nganggap duit receh wat. Santor tibulatko mit Rp500, Rp1.000, Rp1.500, Rp2.000, .... rik seterus ni.

Bupati Kobar netapko harga eceran tertinggi premium Rp5.800. Reti ni kan sai jualan bensin mak kasi ngeni rega lebih jak Rp5.800.

Nyata ni, rega ni premium di atas HET. Pengecer bensin maseh ngeregai bensin Rp6.000 per liter.

"Susah mangsa duit receh Rp200 pakai ulohan. Sai ngebeli muneh mak ngemasalahko ni," ani pengecer bensin sai di Jalan Iskandar, Pangkalan Bun.

Ani sapa mak masalah. Nyak risok ngemasalahko ni.

Sekali waktu nyak ngebeli amplop lunik.

"Seribu lima," ani sai ngejual.

"Nyak perlu sai gawoh. Pira?" aku.

Sai ngejual bingung. Ruwa ratus sai, reti ni.

Nyak kesol cetik, akher ni, nyak cawa, "Ya adu, ruwa gawoh."

Ruwa ya Rp400. Kidang, sunsung ni Rp500. Rupa ni, mak nihan ngedok duit di bah Rp500.

Kak belanja, pecohan Rp50, Rp100, Rp200 biasa ni tiikok pakai isolatif nyin jadi Rp500 atau Rp1.000.

Ah, temon-temon Pangkalan Bun.

Narsiss... (Borneonews Ruwa Tahun)

2008-12-22T02:10:00.000-08:00

RANI inji Borneonews persis umor ruwa tahun (22 Desember 2006-22 Desember 2008). Epak halaman khusus full color titerbitko pakai narsis-narsisan (cawa Lampung ni api ya?)

Sunyin ni kebagian titulis. Wat gambar ni muneh.

Nyak tenggalan barong rombongan kanjak 1 September 2006 adu di Pangkalan Bun. Ya, ruwa tahun lebeh.

Karu mansa kabar jak Eko. Ani, Revi jak SDM MI ngeni pandai nyak mulang mit Lampung kak tanggal 5 Januari 2009. Semakkung ni tanggal 4 ni, Denny Sinaga sai ngegantiko nyak ratong. Nyak muloh mit Lampung Post.

Inji gambar reramikan jelma Borneonews.

Jak kiri mit kanan baris atas: Eko Rahmawanto, Junaidi Effendi, Budi Handoko, Aji Sukaryo, Irwansyah, Bambang Andika, Bayu Saputra, Roni Dwi Yuswanto, Sapuani, Ali Gusman, rik Doyo Kunto Priyono. Baris keruwa (tengah): M. Abdul Fikar, Puguh Santoso, Eka Tommy, Oktasandri, Ersyad Yanuas Hasty, Mujianur, Lala Lesmana, Dodot Drajatnoto, Andro Desembery, Pujo Wicaksono, Andri Saputra, rik Muhammad Alwan. Baris paling bah: Zulkarnain Zubairi, Erlan, Neni Ningsih, R. Wana Widiastuty, Dhian Kurniawati, Oktrika Nugraheni, Tira Puspitasari, Waeti, Nur Budiwarti, Tovik, rik Suhermanto.

Sai mak ngedok di foto: Saur Hutabarat (pemimpin umum/redaksi), Ali Sadikin (pemimpin perusahaan), Dian Abdi Prasetyo (manager keuangan), Deny Parsaulian Sinaga, Rahmad Minarto, Muhidin, Rochmat Sutoyo, rik Sigit Yadi Cahya (Pangkalan Bun), Heryadi rik Ida Aryadi (Palangkaraya), Donny Harjo Saputro rik Pariyanto Marman (Sampit), Abdul Gofur (Kasongan), Akhdini (Kuala Pembuang), Marius Ernestus L.B. (Pulang Pisau), Imam Rosyidin (Lamandau), Rowi Krisna (Sukamara).

Jadi sai ingokan!

Kik Sanak Munakal, Masa Guru Mak Kasi Butong

2008-12-17T09:23:00.001-08:00

EDY Mulyana, guru sai nampar sanak sekula di SMA Kristen Palangkaraya lamon kena bela jak lamon jelma. Sai ngebela di hantara ni Dinas Pendidikan Palangkaraya, Persatuan Guru Republik Indonesia (PGRI) Kalteng, rik kepala sekula ni tenggalan.

Kabid SMP/SMA/SMK Dinas Pendidikan Palangkaraya Irus Lanen ngucakko api sai diguwaiko Edy Mulyana lain kekerasan, kidang upaya nguyunko sanak sekula nyin disiplin.... Dst. (Guru Edy Lamon Kena Bela, berita ni Heryadi di Borneonews jemoh, 18/12).

Repa kesetemonan ni, taganko tian sai wat wewenang sai ngurusko ni.

SEKULA KEBANJERAN: Warga sai musti ngebabai anak ni ilung sekula aga turuk ulangan umum uleh ni banjer sai kuruk mit sekula rik pemukiman di Kota Banjarmasin, Kalimantan Selatan, Selasa (16/12). (MI/DENNY SUSANTO)

Cerita tumbai. Nyak kuruk SD tahun 1977. Enom tahun sekula dasar. Nyak halok mawek kik menakal. Kidang, risok nyani guru kesol. Kena tampar wat. Kena bebas wat. Kena tayar ilung luar kelas wat muneh.

Kantek-kentek sekula reno menuh wat kena betu oleh ni guru.

Kidang, seingokku mak pernah guru kuadukon sekam jama ulun tuha. Ulun tuha juga mak wat ratong mit sekulo butong-butong jama guru. Apalagi kik ngaduko guru jama pelisi. Mak nihan wat.

Sekam -- injuk ni sadar -- guru nangon guwai ni ngedidik. Nampar, mitit, atawa ngebetu sanak sekula sai nakal injuk sekam sebagian jak pendidikan. Mak ngedok masalah.

Nangon mak ngedok cerita muneh di nana guru nyiksa sanak sekula. Apalagi kik nyani sanak sekula katan-katan atawa mebayoh-bayoh badan ni.

Tanno?

Sanak sekula tanno keliwat manja. Masa kik tibutongi cutik (titampar) ngadu jama ulun tuha. Ulun tuha mincak-mincak di sekula. Wat muneh sampai ngadu mit pelisi.

Ah, hara susah ni jadi guru. Serba salah muneh. Dipemako riya sanak ni ngilu ampun... menakal dipa budol muneh.

Lain soal kik guru sai nyani siswa ngandung atawa mati. Kik guru mak bemoral ya musti tiselko.

Ngegetas. Ah, Ingokan...

2008-12-14T08:07:00.000-08:00

PEHALU foto inji nyak jadi ingok waktu lunik di pekon. Ngegetas pari di sabah.

PARI DARAK: Jelma di Dusun Parangkampeng, Kecamatan Teweh Tengah, Kabupaten Barito Utara, Kalimantan Tengah ngegetas pari darak atawa gunung varietas lokal jenis Talun, akhir Maret 2008. (ANTARA/KASRIADI)

Rupa ni jelma Dayak di Kalteng makai getas muneh pakai melok pari injuk ram di pekon.

Hara adu sakaku mak ngeliak ulun ngegetas (makai getas). Sai lamon injuk di Jawa, tian makai sabit ngakuk pari.

Ah, sekati jak kukuk di Liwa tahun 1994, sekam mak ngedok sabah lagi. Sunyin ni radu kirak.

Sebareh jak lebon lamban, lamon muneh jelma sai kelebonan sabah uleh ni kukuk.

Ah, ingokan!

333-3*

2008-12-10T08:10:00.000-08:00

RENCAKA aga mepoh. Kidang, minjak kawasan. Seno muneh miyah uleh ni sms jak 3355: kredit RpXXX pada rek 1 TB xxx935 tgl 10/12/2008 jam 11:11:36..., dst ni. Insentif kuruk.

Kidang maseh memalasan, pedahal adu jam 12 liwat. Alhasil, jak mandi berangkat mit ATM Mandiri kadu ni mit BRI ngirim mit Lampung. Hamper jam 1 di rani. Nyak mangsa nomor 333. Antik juga. Nomor inji dikeniko bapak sai ngejaga di redik rang ngakuk nomor. Semakkung ni nyak ngeprint nomor 347.

Jak jam sai. Nyak midor-midor pai. Singgah di warnet serebok sekitar 45 menit. Ngupi pai muneh di kebelah kantor BRI. Mesaka muneh. Nomor antre 333 ampai mangsa gileran jam 3.

Induh muneh rani inji lamon angka telu ni. SMS jak 3355. Nomor 333. Jam telu.

Rani ini, Rebu, 10 Desember 2008, Ren ultah. "Adu kikirimko kado ni liwat BRI," aku.

"Ah...," ani di telepon.

Ya, nangon kiriman biasa gawoh.

-------------------
* Inji iseng gawoh. Dang muneh percaya mistik. Apalagi kik masang buntut.

Malam Minggu. Jemoh Perai. Sawai Buka Haji. Ya, Reno Riya...

2008-12-06T05:54:00.000-08:00

MALAM Minggu. Jemoh perai. Sawai Buka Haji. Hari Raya Idul Adha, ani tian.

Ya reno riya. Gugul. Mak ngedok acara api-api.

Api lagi nyak tenggalanan. Aidil rik mama ni di pekon.

Api aga guwai kidah kik ngurung badan di lamban.

Refleksi! Refleksi! Refleksiiiiii...!

Santor. Induh api lagi sai mesti tiiwohko.

Kangen Band rik Wali Band, Tian Ratong

2008-12-01T07:39:00.000-08:00

JELMA Kotawaringin (Timur rik Barat) gering muneh ngeratongko artis.

Foto-foto Andri Saputra/Borneonews

Nambi bingi, 30 November gileran ni Band Wali rik Kangen Band sai manggung di Stadion Sampuraga, Pangkalan Bun, Kobar.

Nutukko laporan ni wartawan Borneonews Andri Saputra (Nyak repa aga nonton, ngantor goh nyak mawat mani sakik ipon), Kangen Band rik Wali nyani hiruk Kota Pangkalan Bun.

Kangen Band sai beanggota Andika (vokal), Dody (gitar), Tara (gitar), Lim (drum), rik Novry (bass) cakak panggung pukul 21.00 WIB langsung manasko stadion jama pepira single hits ni tian.

Maka, penuntun larut barong lagu-lagu Tentang Aku, Kau, dan Dia, Selingkuh, Cinta yang Sempurna, Bintang 14 Hari, Yolanda, rik Kembali Pulang.

Seradu Kangen Band, tampil Wali sai terdiri jak Faank (vokal), Apoy (gitar), Tomi (drum), Ovie (keyboard & synt), rik Nunu (bass) ngusung lagu-lagu jak album, Egokah Aku.

Kidang, Lain Rojali...

2008-11-28T09:02:00.000-08:00

MINGGU inji ruwa rombongan jak pekon, Lampung, ratong mit Pangkalan atawa Kotawaringin Barat. Kidang, lain Rojali (rombongan jak Liwa) Hehhee....

TRANSMIGRAN JAK LAMPUNG: Bupati Kobar Ujang Iskandar (kiri) diriki Kepala Disnakertrans Kamusni (keruwa jak kiri) nyalami 25 KK transmigran jak Lampung Selatan waktu acara penyambutan di Balai Latihan Kerja (BLK), jeno. (BORNEO/ANDRI SAPUTRA)

Rombongan kesai, Kangen Band (barong jama Wali) sai aga manggung di Stadion Sampuraga, Minggu, 30 November 2008 bingi.

Rombongan keruwa, 25 kepala keluarga (103 jelma) jak Lampung Selatan sai jadi transmigran di Kobar.

Barong jama transmigran jak daerah bareh, tian aga tinggal di Kobar. Wat 150 unit lamban di permukiman transmigrasi di Kumai Seberang, Kelurahan Kumai Hilir, Kecamatan Kumai, Kobar siap titugui.

Jadi, jelma Lampung di Kobar nambah luwot.

Telu Kabar jak Telu Rang

2008-11-26T08:16:00.000-08:00

JAK Bandar Lampung, nyak mangsa cerita Aidil pedom relom. Hamper jam puluh dibingi ampai hinok.

Nginjam gambar cover buku kumpulan cerpen ni Korrie Layun Rampan. Nyak nangon basa ni tiram jama anak-kajong. Sukor-sukor kik wat sai aga ngeni buku ni.

Nulung Is, mamak ni, turuk muneh ngebengkel motor. Pudak, culuk, cukut, kawai alom-alom latap di oli. Tihalang malah butong-butong, ani mama ni.

Aduh... Aidil. Mak nihan dapok pema.

Kidang, nurut Ren, Aidil riyang becong. Lalang-lalang. Radu jak ngebengkel, Aidil cawa, "Dah... dah...." Maksud ni motor ni adu buyun luwot.

Aidil, Aidil. Nyani ayah tambah tiram riya.

Kabar sai paling ampai, tian jak Jakarta (MI) mak telaju mit Borneonews. Krisis keuangan global rupa ni nyampai muneh di MI rik Borneonews. Pitis ni mak mungkin ngirimko jelma Jakarta mit Borneo.

Kantor ingkah perlu nambah sai asisten redaktur magang rik ngerekrut telu reporter tambahan.

Reno cerita jak Pemimpin Perusahaan Ali Sadikin sai basa ni di Pangkalan Bun barong jama Menager Keuangan Dian Abdi Prasetyo.

Waduh, kacau pembukuan. Reti ni lunik kehalokan ni nyak muloh mit Lampung delom waktu redik inji. Nutukko surat tugas sampai 6 Mei 2009. Kik reno cerita ni, dacok-dacok nyak di Borneo tilapok luwot.

Serba salah!

Wajah Deportan (jak hudannur.blogspot.com)

Kabar sai lagi, jak Banjarmasin. Email jak Hudan Nur, penyair Banjarbaru, Kalimantan Selatan ngucakko sajak-sajakku kuruk di buku Wajah Deportan, Antologi Puisi Penulis Muda Lintas Provinsi 2009 barong 37 penyair bareh jak macom-macom provinsi. Nyak tecantum jak Kotawaringin Barat, Kalteng. Rencaka ni, antologi inji aga tiluncurko tahun 2009 nanti.

Hahaa... nyak akher ni tibaiat jadi penyair Kalteng. Kebetulan nyak tenggalanan jak Kalteng.

Halok Uleh ni Tiram...

2008-11-15T07:52:00.000-08:00

NYAK tenggalanan luwot di Pangkalan Bun. Aidil rik mama ni tinggal di Lampung.

Aidil maseh risok nyapok nyak. "Ayah... ayah...," ani kik wat bunyi ni motor.

Nyak berangkat jak lamban di Kemiling jam wali dibingi, Rabu (5/11) bingi. Nyak cakak motor makai jas terai. Injuk biasa ni Aidil mak aga salaman. Kucium goh mak aga. Dadah juga mak dinggok ni.

Mak miwang waktu nyak aga berangkat. Kidang, ani mama ni, Aidil 'ngamuk' waktu nyak adu mit.

Jak keruwa, Aidil meruyuh. Bucor. Bingi ni mutah mising. Badan ni wat bintik-bintik suluh. Mak aga mengan.

Halok, tiram jama ayah. Kidang repa, nyak kerja.

Syukordo rani inji Aidil mulai aga mengan, mak bucor lagi seradu jak bubat jama Dokter Barudin nambi. Mulai riyang luwot pak badan ni lagi lemas. Apilagi Uthie, kakak ni ratong jeno di rani.

Kekalau geluk sihat. Ayah beguwai di Borneo, Dil.

Dipa Riya Mak Masalah

2008-11-07T02:07:00.000-08:00

NYAK ampai sampai di Pangkalan Bun jak Lampung nambi jam 12.10 WIB. Pas nyak regah di Bandara Iskandar, rombongan haji jak Kobar ampai siap-siap berangkat mit Solo makai pesawat Linus Airways sai kutumpangi.

Nyak tenggalan sai muloh mit Borneo. Aidil rik mama ni tinggal pai di Lampung nunggu tes CPNSD, 30 November. Seradu ni, semeliak di keadaan.

Kidang, bedua kalau Ren terima.

Kabar-kabar nyak muloh mit Lampung injuk ni mak jadi tahun inji. Reno ani Mas Aji. Induh kik tahun hadap.

Ah, dipa ya riya, mak masalah.

Negeri Asal Kangen Band

2008-11-01T10:25:00.000-07:00

bintang terlihat terang
saat dirimu datang
cinta yang dulu hilang
kini kembali pulang

lihatlah dia mulai bernyanyi
coba merangkai mimpi
cinta yang dulu pergi
kini datang kembali

wajahmu mengingatku
dengan kekasihku dulu
wajahmu mengingatkan
dengan masa laluku

reff
kekasih yang dulu hilang
kini dia tlah kembali pulang
akan kubawa dia terbang
damai bersama bintang

kekasih yang dulu hilang
kini dia tlah kembali pulang
betapa senang kudendangkan
dan takkan ku lepaskan

wajahmu mengingatkanku
dengan kekasihku dulu
wajahmu mengingatkanku
dengan masa laluku

Lagu Kembali Pulang, Kangen Band

JEMOH sekam telu mulang mit Lampung, negeri asal Kangen Band seradu jak ngebaca novel ni Rosita Sihombing, Luka di Champs Elysees (Lingkar Pena Publishing House, Jakarta, 2008) sai jaoh-jaoh mit Paris, muloh luwot mit Lampung.

Muloh Luwot.

Bukaan CPNSD di Lampung

2008-10-31T08:57:00.000-07:00

UNCUK ni bulan Oktober 2008. Bulan inji bela. Api aga rencaka? Guwai sa rutin riya. Kidang, induh aga seuncukan ni.

"4bng tlp khp n!e az da pendafttr an cpnsd skrg jg by k!ky." Kalimat SMS inji luar jak HP-ku pas kuurikko mulang jak sembahyang Jumat. Temon-temon kacau bahasa SMS inji. Pantas gawoh Pusat Bahasa ngeribok ngeranuh jama bahasa elektronik inji.

Repa aga makai bahasa Indonesia sai helau kik reno. Cadang-cadang bahasa Indonesia, ani tian.

Ya adulah, inji masalah bareh. Ani Kiky, Lampung nerima CPNSD (calon pegawai negeri sipil daerah). Pendaftaran 3-8 November 2008. Tiumuko di koran rani inji.

Ya, sekam telu musti mulang mit Lampung kik reno. Tahun ampai no, Ren mak turuk ngedaftar guru PNS. Tahun inji nyubai pai. Kintu nihan mangsa bagian. Kekalau.

Ya, rani Minggu (2/11) sekam mulang mit Lampung.

Ruwa...

2008-10-28T18:01:00.000-07:00

"DUAA (ruwa)...," ani Aidil.

Adu ruwa rani Aidil di rani-rani ngilu ruwa lilin tiurikko. Adu ruwa rani listrik di lamban mati. Lain uleh ni mangsa gileran jak PLN. Kidang, lantai ruwa rang kos sekam konslet, mak dapok urik.

Ruwa, ani Aidil. Aidil nangon ulang tahun sai ke ruwa rani ini Selasa, 28 Oktober 2008.

Pak listrik mati, wai muneh macet, pagi-pagi (setemon ni kawasan muneh) sekam telu manak mit pasang. "Aga nyani sekunyit," ani.

Ingkah ngeni tetangga kebelah lamban, counter di bah, Mbak Widi, Mbak Tini, rik Epenk tian.

Selamat ultah, Aidil. Selamat Sumpah Pemuda muneh yu.

Kehurikan

2008-10-15T10:49:00.000-07:00

induh

mak pasti

halok

nunggu

Belajar Sabar

2008-10-06T07:48:00.000-07:00

HARA susah ni jadi jelma sabar. Jak risok ni, sadar mak sadar, emosi ngeledak mak dacok titahan.

Nyesol kak adu. Kidang, kejadian ngebekas katan. Pak lunik ya.

Ah... Kekalau mak sampai cadang ati.

Mangi...

2008-10-04T06:33:00.000-07:00

"DUNIA maya basa ni mangi," ani Benybee di ShoutMix.

Mangi. Jelma kelamonan basa ni mulang mit pekon masing-masing. Ingkah sekam goh sai mak mulang. Adu ruwa kali Buka sekam telu manak di Pangkalan Bun.

Ya, nangon mangi. Buka di Pangkalan Bun mangi muneh. Seradu jak tekebah Sembahyang Id di pepira rang ya adu. Mak ngedok acara khusus Buka.

Kik aga nutuk jelma ramik mit Pantai Kubu rik Pantai Teluk Bogam. Yah, paling rang wisata sai ramik.

Injuk tahun ampai no, sai Sembayang Id nyak gawoh. Aidil rik mama ni di lamban riya. Mulang jak sembayang, singgah mit api ni Eko, laju mit lamban ni Mas Aji, terakhir reramikan mit lamban ni Pak Rasyid. Pak Rasyid ngeguwaiko open house Buka.

Mulang ni mutar-mutar Pangkalan Bun. Ampai goh sampai di lamban, terai ratong.

Rani keruwa Buka. Silaturrahmi mit lamban ni Abang Heryamin tian di Kelurahan Baru. Inggoman ni adu mit pasar bedagang. Di lamban ingkah ya rik telu anak-anak ni.

Wah...

Adu. Dibi ni nyak adu ngantor. Jemoh koran terbit.

Kesimpulan ni: mangi!

Brillante Award

2008-10-03T09:00:00.000-07:00

INDUH, mak pandai-pandai, Sigid ngeni nyak Brillante Award semakkung Buka (lengkap ni di ija).

Ya, kuakuk riya. Gambar ni mehelau. Nerima nihan.

Kidang syarat ni, nyak musti ngelajuko Brillante Award ini jama pitu blog sai tinomineko.

Inji pitu jelma sia kupileh sai kupiker pantas nerima Brillante Award.

@ Abah Oryza

@ Denny Ardiansyah

@ Eko Sugiarto

@ Dian Hartati

@ Fina Sato

@ Hudan Nur

@ Simon S. Hutagalung

Tian sanak ngurai sai hebat. Sukses pakai ni tian.

Buak Buka*

2008-09-29T06:24:00.000-07:00

Pebangik-bangik buak Buka
Tikanik barong sanak-muari
Jejama ram ngetokko dusa
Nyin helau ngeliak pudak ni

: Jejama ram semahapan yu!

* kik aga nyecas, klik goh gambar ni nyin mebalak

Mak Ngedok Liyom Mani Mejereh Mebugu Malas Muneh

2008-09-28T20:21:00.000-07:00

RUPA ni injuk nasib ni dana beras untuk keluarga miskin (raskin), bantuan langsung tunai (BLT) rik Inpres Desa Tertinggal (IDT), adu saka rumpok nyepok jekat kak redik-redik Buka Balak (Hari Raya Idul Fitri).

Tanno ji mak perlu liyom-liyom ngaku mejereh. Soal ni ngaku mebatin, mak kebagian IDT, raskin, IDT atawa kik tanno musim ni... jakat.

Maka ni kik wat lamban sai bakal aga bagi-bagi jekat, lamon jelma sai nunggu kanjak subuh. Kak adu mulai seageh jekat sa, segaga. Syukor-syukor nihan mak terjadi injuk di Pasuruan sai nganik jelma 21 mak lagi.

Nunggu zakat tibagiko. (BORNEO/TIRA PUSPITASARI)

Fiil? Mak ngedok rega ni badan kik masalah duit atawa barang.

Kanik akal juga!

Dang injuk ulun Lampung, ngilu ya gengsi, liyomlah, acak maling nyik mak kepandaian. Ya, fiil pesenggiri sai salah.

Setemon ni, helau muneh ram wat fiil pesenggiri nyin ram rerasa. Mak buyun ngilu-ngilu dana (jekat, BLT, IDT, atawa api gawoh). Lain hak pema-pema ngakuk barang ni rumpok. Kidang, repa cara ni nyim ram mebatin. Kik mebatin masa kik ngilu-ngilu jekat.

Nyin mebatin ya beguwai senemon. Mak kasi memalasan.

Jak tumbai nangon jak helau ni ngeni kik jak ngilu. Culuk di atas, lain culuk di bah.

Kidang, realitas sosial jelma keramikan? Ah, ram mak ngedok liyom lagi mani mejereh mebugu malas muneh.

Buka Serebok Lagi...

2008-09-26T10:58:00.000-07:00

BUKA serebok lagi. Adu 50 jelma mak lagi waktu aga mulang delom telu rani terakher, kanjak seminggu semakkung Hari Raya Idul Fitri. Tian mak lagi uleh ni kecelakaan mubil, motor, rik kapal di renglaya.

Sekura (Foto: Eka Fendiaspara, ku akuk jak ija)

Buka serebok lagi. Mak ni ruwa sanak sai maseh balita (bah lima tahun) ditinjuk Satpol PP mani kepandaian ngejual Mansion House, inoman beakohol. Kajong ni adu mena lijung induh mit dipa.

Buka serebok lagi. Sai batin tambah gering ngetok-tokko duit. Sai jereh tatap riya susah. Korupsi telaju riya. Maling-maling tambah rajin. Lamon jelma mak rabai ga jama dusa.

Buka serebok lagi. Hara lamon ni ironi kehurikan di negeri inji.

Ultra Milk, Astaga Naga....

2008-09-25T09:12:00.000-07:00

ASTAGA naga. Susu Ultra tekuruk di daftar kanikan sai bahaya mani wat kandungan melamin. Wat unsur ni sai tiratongko jak China.

Pedahal nyak rik Ren risok ngebeli rik nganik ni.

Waduh... kekalau mak bahaya jama sekam. Kekalau jadi ubatlah. Kidang, tokko kik meli luwot.

Nyak mak pandai kik susu inji kanikan impor. Penyanaku sanian delom negeri.

Nangon musti pestiti kik belanja. Di ija, Pangkalan Bun atawa Kalimantan umum ni lamon kanikan rik barang impor, utama ni jak Malaysia.

Pedahal pepira waktu sai radu semakkung ribut-ribut kanikan sai bebahaya jak China, ram ngehirukko banjer kanikan jak Malaysia.

Lain hak uleh ni menyuwoh jama Malaysia (kebetulan waktu seno lagi kontroversi soal lagu Rasa Sayange, reog, rik angklung sai diklaim Malaysia budaya ni tian), kidang kanikan impor jak Malaysia no mak helau pakai kesehatan.

Sai lagi, lamon kanikan sai mak makai zat pewarna alami. Maka ni, musti pestiti nihan.

Aneh! Caleg kok Mangsa Dana BLT

2008-09-20T05:35:00.001-07:00

INJI judul berita HL Halaman Kotawaringin Barat Borneonews rani inji (Sabtu, 20/9).

Ya reno do. Hasil verifikasi rumah tangga sasaran (RTS) pakai nerima bantuan langsung tunai (BLT) ngawur.

Contoh ni di Pekon Teluk Bogam, Kecamatan Kumai, Kobar. Telu jelma RTS sai mebatin jadi sai mangsa BLT. Malah sai di hantara ni calon legislatif (caleg) jak sai partai politik..

"Masa wat caleg jadi jelma sai nerima BLT. Kik mejereh dang jadi caleg geh," ani jelma sai mak aga tiucakko gelar ni.

Aidil Pintar Rajin Sekula (Sai Bareh Libur)

2008-09-15T09:17:00.000-07:00

SEKULA di Kotawaringin Barat libur semasa Ramadan rik tilapok kak Buka. Sebagai genti ni sekula ngeguwaiko kegiatan keagamaan injuk pesantren kilat (sanlat) rik sanak sekula belajar tenggalan di lamban.

Seno keputusan ni Dinas Pendidikan Kotawaringin Barat.

Jadido, 40 rani sanak sekula libur.

Otonomi daerah! Setiap daerah bida-bida.

Kik aku, api guwai ngeliburko sanak sekula. Pangkalan Bun sai nangon mangi tambah angi. Mak ngedok sanak sai makai seragam mit rik mulang sekula.

Induh kik sai bareh, sai jelas paling riyang uleh ni sanak sekula libur malah Aidil.

Unggal rani Aidil bebas 'sekula' di SDN 1 Sidorejo rik SDN 4 Sidorejo sai redik lamban.

"Sukula, Dil...," aku.

Maka, unggal rani sekam ruwa main di lapangan sekula, lapah di koridor ni sekula, atau sesekali Aidil ngetuk-ngetuk rangok ni kelas sai tekunci rik nyuba ngebuka ni.

Sunyin ni gedung tikelilingi. Main kelereng-kelerengan makai wah ni kayu sai gugor. Ngakuk pampang ni kayu pakai ngawil-ngawilan. Ngemainko wah ni mengkudu. Ngunduh wah ni ceri... lamon di tengebah ni sekula.

Kik sai bareh libur, Aidil malah rajin sekula.

Di lamban, Aidil ngilu pen rik kertas ngilu tigambarko mubil kik mak nyoret-nyerot kertas. Kekala seprai juga kena coret. Kik makkung cukup, koran, majalah, rik sesai muneh jadi sasaran oretan ni Aidil.

Aidil tanno gering ngeliak gambar motor rik mubil, sebareh jak sanak lunik. Di koran, majalah, atawa tivi.

Jak pagi mak aga mengan. Nutuk posa. Ampai aga nganik tengah rani kak jak mulang 'sekula'.

Wawancara (Narsis!)

2008-09-07T09:41:00.000-07:00

AR Tadilaga (Kelas III SDN 2 Sidorejo, Kobar) rik Dhiya Zahra (Kelas 2 SDN 7 Mendawai) ngwawancai nyak di Kantor Borneonews, Sabtu (6/9).

Hasil ni timuat di Rubrik Media Anak Borneonews, Minggu (7/9). Selengkap ni di ija.

Narsis!

Oedin Gubernur Lampung (Luwot)

2008-09-04T08:40:00.000-07:00

OEDIN (Sjachroedin Z.P.) injuk ni hamper pasti jadi Gubernur Lampung luwot.

Hitungan geluk (quick qount) Lembaga Survei Indonesia nunjukko pasangan Sjachroedin Z.P.-Joko Umar Said (PDIP rik pepira partai lunik) menang telak 42% delom pemilehan Guburnur Lampung sai ditutuk pitu pasang calon, nambi (3/9).

Sjahroedin Z.P. (ANTARA/TRIONO SUBAGYO)

Tian ruwa ngalahko Zulkifli Anwar-Akhmadi (PKS-PAN) 15,45%; Muhajir Utomo-Andi Arief (independen) 3,42%; Alzier Dianis Thabrani-Bambang Sudibyo (Partai Golkar, PKB, rik PPP) 19,83%; Oemarson-Thomas Aziz Riska (Koalisi Lampung Bersatu Peduli Demokrasi dan Pembangunan) 5,65%; Andy Achmad Sampurna Jaya-Suparjo (Partai Demokrat-PBR) 10,10%; rik Sofyan Jacoeb-Bambang Waluyo Utomo (independen) 2,30%.

Lamon sai yakin Oedin bakal menang. Kidang, termasuk nyak, mak nyangka ya menang langsung sai putaran gawoh.

Tanno, tinggal nunggu pengesahan jak KPU Lampung goh.

Hebat...

Posa Sekam Telu

2008-09-02T08:57:00.000-07:00

RANI keruwa posa.

Sekam telu manak sekitar pukul 10.00 WIB aga midor sambil nyepok-nyepok. Nyak rik Aidil adu mena regah (lamban di lantai ruwa). Ren lagi ngeraduko guwai ngerangko kawai.

Terai regah. Batal.

Kedugok, nyak pedom. Aidil main riya.

Sekitar jam 1. Sekam telu regah luwot. Nyepok minyak telon, entrostop, kaset VCD, sani ni gulai, rik pembukaan.

Ampai mansa minyak telon, entrostop, rik kaset VCD, terai ratong luwot.

Main-main jama Aidil.

Pasar Wadai Ramadan di Lapangan Tugu, Pangkalan Bun. (BORNEO/TIRA PUSPITASARI)

Mak ketahan kedugok, pedom luwot. Aidil maseh main.

Diminjakko Ren. Adu jam telu, ani.

Mata maseh mebiak. Kidang musti ngantor.

Semakkung ilung kantor, sekam telu nyepok gulai rik pembukaan pai.

Mulang jak kantor adu aga buka.

Seranian Aidil mak pedom. Main riya.

Nangon Lamon Alasan kik Malas

2008-08-31T09:15:00.000-07:00

BINGI inji, Minggu (31/8), muwak ni sembahyang Teraweh. Muwak ni muneh sawor. Jemoh posa.

PAWAI OBOR: Ratusan sanak utusan pepira surau pawai obor nyambut bulan Ramadan, Sabtu (30/8) bingi. Pawai diinisiasi takmir Masjid Istiqomah Madurejo, Pangkalan Bun timulai jak Kelurahan Madurejo dan berakher di halaman Kantor Kelurahan Madurejo. (BORNEO/TIRA PUSPITASARI)

Mama ni Aidil dilamban riya. Aidil mak dapot titinggalko tenggalan.

Kik aga turuk Teraweh, wat Musola Mujahidin di hadap ni kantor nihan. Wat muneh Mesjid Mujahidin, redik ireh jama kantor.

Kidang, guwai melamon. Rik, kurasa (mak kuliakko) musola latap nihan. Inji biasa ni reno. Mak kebagian rang lagi di musola.

Hehehee... ah, nangon lamon alasan kik malas.

Hahaa... Tokoh

2008-08-28T09:11:00.000-07:00

SERANI semakkung acara, Rabu (19/8), nyak mangsa undangan ni.

"Nyak mak dapok ratong. Mak ngedok ongkos...," aku jama Hera, Sekretaris Pemred Lampung Post sai jadi Panitia Peluncuran Buku 100 Tokoh Terkemuka Lampung.

Acara ni di Graha Wangsa, Bandar Lampung, Kemis (20/8) bingi.

Di bingi ni sekitar jam siwa ratong SMS jak Ila: "Weh, 100 tokoh tiurau cakak panggung. Kak Jul mana?"

Ya, adu kutelepon gawoh Illa nanya repa acara ni. Ampai nihan adu, ani.

Klik dija kik aga ngebaca berita ni.

Wat pepira sms rik buku tamu di blog muneh ngucakko selamat... jadi tokoh Lampung.

Hahaa... tokoh.

Jadi?

Ratong Luwot

2008-08-26T09:08:00.000-07:00

MAK kerasa, bulan Ramadan ratong luwot.

Mulai Senin, 1 September 2008 barong jama 1 Ramadan 1429 Hijriah.

Sekam telu manak jak Pangkalan Bun sai betik ngucakko:

Marhaban ya Ramadan. Selamat ngejalani ibadah posa. Kekalau ram tekuruk sai mansa hikmah posa.

Posa yu. Dang kik bebuhungan pak ingkah Allah Swt sai pandai ram posa api mawat.