Listrik, Parah Becong

KIK PLN janji, dang percaya. Mesti buhung. Ani, listrik di Pangkalan Bun mak aga -- paling mawat mak risok ga -- mati jak bulan Juli inji.

Nyata ni, lain hak bekurang mati ni. Malah nambah.

Tanno, 1 : 1 (sai banding sai). Reti ni, serani mati serani urik atawa bingi inji urik, jemoh bingi mati. Rani inji urik di rani jemoh mati.

Malah, lebeh nyata ni. Jak risok ni mati jak urik ni.

Parah... separah-parah ni listrik di daerah bareh, jak parah ni listrik Pangkalan Bun.

Parah becong!

Mak Kesampaian...

JAOH-JAOH jak Pangkalan Bun mulang mit Lampung.

Sate ompong (Foto jak ija)

"Pokok ni nyak aga sate Ompong, bakso soni, bakso urip, es Kampung Baru, empek-empek Beringin, burung Dara Mas Yanto...," ani Ren.

Sunyin ni mak ngedok di Borneo!

Kidang, mati temadan. Sunyin ni mak kesampaian. Telu rani di Bandung. Pepira rani di Bandar Lampung tiselingi mit Liwa telu rani muneh sampai mulang mit Pangkalan Bun, injuk ni waktu ruwa minggu mak kerasa.

Sunyin ni kanik'an baik sai adu tibimbing-bimbing jak Kotawaringin mak kesipak ticecas.

Sekali waktu, aga singgah di Sate Ompong, eh... kepagian makkung buka.

Mati balak ni sesol. Kidang mak ulah dia.

"Ah, Abang sibuk tenggalan riya," ribok ni Ren.

Yaa.... Kekalau kak mulang luwot.

Peratong jak Pekon

LAPAHAN jak pekon. Ingkah bahan ingokan. Ngindang lupa.



Foto-foto keluarga (1) Uthie, mak, nyak, Ren, rik bak, (2) Aidil ditaban mak, (3) jak kiri mit kanan kakak ni Aidil, yaddo Revi, Yolda, Ulfa, rik (di hadap) Abid.

Instrospeksi, Instrospeksi...

SERADU jak nerbitko buku puisi Mak Dawah Mak Dibingi (rasa ni mak mungkin nyak lupa jama jelma sai bejasa ngelaherko buku inji, utama ni jama Y. Wibowo, Budi Hatees, rik Irfan Anshory)

Seradu jak nerima Hadiah Sastra Rancage 2008

Seradu jak Syukuran Rancage Sastra Lampung

Seradu jak mulang pekon

Tanno masa ni pema pai serebok, introspeksi... introspeksi!

Sebareh jak ngucakko selamat rik muji; lamon wada dan lamon kurukan. "Helau kik karyamu mak sekadar bebahasa Lampung. Usahako ngebekom tafsir sastra Lampung," ani Iswadi.

"Lampung rik kelampungan dapok jadi perspektif delom karya," cawa ni Dirman.

Sai penting, dang sampai lupa badan injuk ani Budi.

Kantek-kantek rik puari lamon ngingokko.

Nerima nihan jama Iswadi Pratama, Isbedy Stiawan, Anshori Djausal, Geri Sugiran, Edy Samudera Kertagama, Soemandjaja, Djadjat Sudradjat, Bambang Eka Wijaya, Sabam Sinaga, ... sunyin ni.

Tinggal Buya ni

TANNO nyak -- sekam telu manak -- basa ni kebuyaan jak lapah jawoh.

12 Juni pas rani ulang tahunku, sekam berangkat cakak Linus ilung Jakarta. Jak ija langsung mit Bandung. 14 Juni nerima Hadiah Sastera Rancage di Aula Unpad.

Penyair Y Wibowo rik Ferdinand Indiarto, kantek jak Lampung ratong muneh pagi ni semakkung berangkat mit Unpad.

Sesuai kesepakatan, nyak sai ngeni sambutan ngewakili sai nerima Rancage tahun ini. Api sai kuucakko waktu maju mit hadap, induh nyak lupa. Inti ni, hara balak ni beterima ni kebudayaan Lampung (kuruk muneh Sunda, Jawa, rik Bali) jama Yayasan Kebudayaan Rancage sai digagas Ajib Rosidi, sai mak taru ngeniko Hadiah Sastra Rancage kanjak 1989.

Mani Bowo, ampai sampai Sabtu pagi. Sekam ampai mulang mit Lampung Minggu dibingi. Ampai sampai di Bandar Lampung Senin (16/6) pagi.

Mulang mit Liwa, Lampung Barat, Jumat (20/6). Mak dapok mesaka mani wat acara luwot di Bandar Lampung, Minggu (22/6) pagi sekam muloh mit Karang.

Nyak di Acara Syukuran Rancage di Lampung Post, Selasa (24/6). (Foto Erick di blog ni)

Selasa (24/6) bingi, wat acara Syukuran atas Diterima ni Hadiah Sastra Lampung Rancage 2008 di Aula Harian Lampung Post. (Hasil diskusi titulis delom ruwa tulisan di Apresiasi di ija rik inji).

Kasian Aidil. Di bis jak Jakarta ilung Bandung ya mutah. Cakak Damri jak Bandung ilung Bandar Lampung mutah. Mulang-mit Liwa mutah muneh.

Kidang, waktu rani Kemis pagi tiantakko mit dokter langganan saka ni Aidil di Way Halim, dr Barudin, ani Aidil mak api-api. Ingkah mebuya gawoh cutik.

Di Karang rik di Liwa Aidil riyang ireh. Lamon pori. Jadi, meramik. Nangon kegeringan ni dikelilingi sanak lamon.

Kemis (26/6) di rani sekam adu sampai di Pangkalan Bun. Minok pai sebingi di Jakarta sambil ngakuk tiket pesawat jama Ethie di Media Indonesia.

Mulang Pekon mit Lampung

JEMOH, Kemis, 12 Juni 2008. Nyak ulang tahun setemon ni. Kidang, sekam telu malah lapah. Nyak cuti antak 25 Juni 2008.

Sekitar ruwa minggu. Berangkat jak Pangkalan Bun Kemis pukul 14.30 WIB ilung Jakarta langsung mit Bandung.

Sabtu, 14 Juni 2008 nerima Hadiah Sastera Rancage di Aula Sanusi Hardjadinata Universitas Padjadjaran (Unpad) Jl Dipati Ukur 35, Bandung.

Ampai laju mit Bandar Lampung rik (insya Allah) mulang pekon mit Liwa.

Adu Mangsa Tiket

TIKET pesawat Linus pakai sekam telu manak kambor ilung Jakarta adu dikeniko Mbak Memey jeno. Tanggal 12 Juni 2008.

Kidang, Aidil kanjak nambi mepanas badan ini. Kidang panas ni regah-cakak. Jeno diantakko Roni pakai mubil kantor bubat mit Dokter Agus. Rani terai terus jak pagi.

Ani dokter, halok kena Malaria. Temon nihan pas tiperiksa rah ni. Positif. Aidil kena Malaria.

Kidang, jak dokter Aidil injuk langsung munyai. Ruyuh injuk mak dirasa ni.

Ya, kekalau geluk munyai ya Dil. Ram aga mulang mit Lampung. Midor-midor mit Bandung muneh. Kadu ni laju mit Liwa.

Petungga Oma, Opa, Utie, Mami, Papi, Datuk, Andung, Abid, Ulfa, adek....

"He ehh..," ani Aidil cunggok-cunggok.

Mak Ngedok Angkot di Ija

RIBUT-RIBUT rega BBM cakak, rega ni barang-barang cakak, kadu ni supir-supir nuntut ngilu ongkos cakak muneh.

Di Pangkalan Bun biasa gawoh. BBM cakak, rega barang cakak, rik ongkos angkot cakak, sunyin ni pema-pema riya.

Supir angkot tinggal nelpelko selebaran di kaca rangok ni: Ongkos umum Rp2.500 Pelajar Rp1.500. Cakak jak Rp2.000 rik Rp1.000.

Mak ngedok demo, mak ngedok protes, mak ngedok pembahasan DPRD rik Pemkab Kobar, mak ngedok SK Bupati.

Heran?

"Dipa wat angkot di Pangkalan Bun. Sunyin ni adu ngeredik (motor)," ani Ali Gusman.

Setemon ni angkot wat. Kidang cutik. Penumpang ni cutik muneh.

Nyak goh risok jadi penumpang angkot tenggalanan kak aga berangkat mit kantor, kik mak lapah cukut.

Sai lamon ojek.

Sai repot, kik mak ngedok kendaraan kak meruyuh aga mit rumah sakit. Angkot jarang-jarang mit dudi. Kadu ni kik mulang, jelas mak ngedok angkot. Kik aga pehalu angkot musti lapah pai. Kidang, mesaka muneh nunggu angkot mak liwat-liwat.

Angkot kalah ulih ni ojek.

Adipura Keruwa pakai Pangkalan Bun

PANGKALAN Bun mangsa Adipura delom kategori kota lunik sai keruwa kali ni.




Piala Adipura dikeniko diterima langsung ulih ni Bupati Kotawaringin Barat Ujang Iskandar di Istana Negara, Jakarta, Kemis (5/6).

Inji foto-foto Pangkalan Bun ni wartawan Borneonews Rahmad Minarto.

Adu Tiram Ireh

RANI inji sekam telu manak musti ni adu berangkat mulang. Jemoh pagi adu nyampai di Lampung. Kidang, injuk posting sai mena, ram ingkah berencaka, Tuhan sai nantuko ni....

Jan pering pakai nyebak (ngakuk memis jak anau) aga nyani gula suluh di Seranggas, Liwa. (Foto tiakuk jak ija)

Jadwal berubah. Berangkat jak Pangkalan Bun, Kemis (12/6) langsung mit Bandung. Sabtu (14/6) jam 09.00-12.00 WIB ni nerima Hadiah Sastera Rancage di Aula Univesitas Padjadjaran Bandung.

Ampai laju mit Lampung.

Adu pepira kali titunda-tunda. Kekalau mak berubah lagi.

Adu tiram ireh jama Lampung.