Ulang Bulan (Lain Ulang Tahun)

AIDIL, anakku, pas lima bulan rani inji.

Sanak uyun nangon wat (tisaniko) tradisi tenggalan tiap tanggal 28 unggal bulan: Nyani kanikan pengeni jama kiri-kanan lamban (bahasa Jawa ni 'among-among').

Pengeni ni Aidil 'ulang bulan'. Mbak ni di Teluk sai ngayun ni.

"Aidil kan pengeni," ani Ren.

Wat-wat gawoh. Kidang, mehelau muneh sekadar ngeni sedekah jama kiri-kanan lamban.

Sanak Lunik Gawoh Pandai

JAOH-JAOH studi banding mit Palangkaraya, ibukota ni Provinsi Kalimantan Tengah rik Surakarta, Jawa Tengah, anggota DPRD Kotawaringin Barat ingkah ngucakko:

Pengawas Bank Perkreditan Rakyat (BPR) Marunting Sejahtera musti jelma sai wat disiplin ilmu di bidang perbankan.

Oaah... kik ingkah seno, sanak lunik gawoh pandai.

Nanjar, Gegoh jama Kebiasaan di Pekon

BINGI inji, sekam mangsa undangan, jak Yayan mit lamban ni sai kebetulan ke belah ni kantor. Bak ni aga umroh.

Acara ni jak Isya, ani Yayan.

Maka, selepas Isya sekam sang kantor mit lamban ni Yayan unyin. Pas sekam adu kuruk rik mejong sila injuk aga ngakan mengan kik di pekon, mak saka, luar kanikan (mi-gulai).

Kidang sumang cutik. Kik di pekon, tanjar lamon mi rik gulai ni, delom acara syukuran bingi inji, wat pinggan sai ngisi rendang, pinggan ngisi kerupuk, sang bayuk mi, rik aqua gelas.

Setemon ni gegoh jama di pekon.

Penyanaku aga bedua pai injuk di pekon. Bang langsung mengan.

"O, dija mengan pai, ampai bedua ya," Edy, rik nanya.

"Bedua rik Yasinan ni radu jeno bakda Magrib," ani jelma sai.

Oooo.... Rupa ni Yayan sengaja ngucak acara ni jak Isya mani pandai sekam kerja.

Wah, ratong ingkah mengan gawoh. Musti ni kan nutuk bedua. Repa muneh?

Kota Lunik rik Mangi

INJI gerbang ni Pangkalan Bun, rangku tanno "ngabdi" mintarko ulun lamon. Borneonews (Media Group) terbit di kota lunik bin mangi inji. Kidang, asyik riya. Lamon sai sikop-sikop... (rang rik jelma ni). Repa nyak mak kebangikan? Hahahaa...

Solidaritas..., Sunyin ni Buhung

INJI gedung SMA Abdi, Pangkalan Bun sai kena suwah, 12 Maret sa.

Sampai tanno, mak ngedok ngeni tenulung jama sekula ini.

Mak ngedok sai tegerak ati ni ngeliak sanak sekula susah belajar mani kelas kena suwah.

Dinas Pendidikan dan Bagian Kesejahteran Pemerintah Kabupaten Kotawaringin Barat malah injuk mak ngedok inisiatif aga nulung SMA inji. Lepas culuk.

Dipa pejabat, wakil rakyat, partai politik sai hiruk kak meredik pemilu sa kidah?

Solidaritas, kesetiakawanan sosial, ngupayako kepentingan rakyat di atas kepentingan tenggalan rik kelompok; sunyin ni buhung.

Sai nyata, anggota DPRD yang (mak) terhormat, basa ni midor-midor makai duit ni jelma lamon.

Gedung sekula kena suwah. Nyata kidang mak ngedok sai ngeliak.

Haban ni Anggota Dewan, Dipa ya Riya, Gegoh

ANGGOTA DPRD Kotawaringin Barat studi banding mit Solo, Jawa Tengah rik Palangkaraya, ibukota ni Provinsi Kalimantan Tengah. Aga belajar nyani Rancangan Peraturan Daerah (Raperda) Badan Usaha Milik Daerah (BUMD) rik Raperda Bank Perkreditan Rakyat (BPR).

Ah, alasan gawoh nyin dacok midor ngebelako duit ram, ulun lamon.

Kik anggota Dewan wat akal, mak perlu lapah mit luar daerah. Tanno kan zaman informasi, zaman internet, zaman globalisasi. Informasi api sai mak dapok tisepok?

Kik mawat, DPRD Kobar tinggal ngangkat staf ahli. Nyak aga muneh kik dikehagako tian. Hehehee....

Kidang, dasar anggota Dewan, cicak pintar kidang budol.

Anggota Dewan ugu. Mak dipa-ipa.

Reji Cerita ni...

WAT bebai sai. Kajong ni ngerantau jaoh. Anak ni telu. Sai tuha, bakas gering main bal. Sai nomor ruwa bakas muneh, pintar main kelereng. Sai bungsu, bebai balak awak.

Sai rani, sai balak awak, becerita.

Reji cerita ni:

Wat bebai sai. Kajong ni ngerantau jaoh. Anak ni telu. Sai tuha, bakas gering main bal. Sai nomor ruwa bakas muneh, pintar main kelereng. Sai bungsu, bebai balak awak.

Sai rani, sai balak awak, becerita.

Reji cerita ni:

Wat bebai sai. Kajong ni ngerantau jaoh. Anak ni telu. Sai tuha, bakas gering main bal. Sai nomor ruwa bakas muneh, pintar main kelereng. Sai bungsu, bebai balak awak.

Sai rani, sai balak awak, becerita.

Reji cerita ni...

Imunisasi, Terai Kedok

AIDIL imunisasi dibi inji (Selasa, 20/3).

"Terai kedok. Tepaksa nyarter angkot mit dr Baruddin Hasyim," ani Ren liwat telepon.

Mustinya nambi, Senin (19/3) tiantakko dokter. Kidang, nambi libur nasional mani Hari Raya Nyepi.

Ren ngucakko, Aidil tanno adu pintar protes. Mekik-mekik kik mak setuju. Kik pandai adu pandai cawa, halok ya cawa, "Enggok, enggok..."

Jeno, waktu aga berangkat mit dokter, mak aga tipakaiko sweeter ni. Cakak mubil, Aidil mak makai kawai kedol. Dipa terai kedok becong. Ah, sanak upi...

Temon do, jam sebelas dibingi minjak, miwang-miwang kik pak adu ditaban Oma ni. Ampai pema rik dapok pedom jam sai seradu tigedapi minyak telon rik ya metuk-metuk.

Aduh Nak, dang mak nutuk cawa kidah.

Tekebok Luwot! Tekebok Luwot!

TEKEBOK luwot! Tekebok luwot!

Masa rapat dengar pendapat (hearing) soal Walet rik rapat Rancangan Peraturan Daerah (Raperda) di Gedung DPRD ngebok rangok.

Pejabat rik legislator di Kotawaringin Barat temon-temon mak ngereti injuk ni.

Inji reaksi ni ulun-ulun:

Kepala dinas/instansi, tekuruk anggota DPRD Kotawaringin Barat mak profesional rik mak paham peraturan perundang-undangan. Salah kaprah kik ngilak jak wartawan. Wartawan kan tugas ni nyampaiko informasi jama publik. Kepala dinas muneh tugas ni ngelayani publik.
Aneh! Pak Ujang (Bupati Kotawaringin Barat Ujang Iskandar) goh ngebuka jama pers. Sai ngejabat rik anggota Dewak malah hiruk ngebok banguk.
Wartawan behak class action. Ram aga gugat kik reno terus.

-- ani Wahyudi Abdirun, Ketua PWI Kalimantan Tengah

TEKEBOK: Hearing anggota DPRD jama pejabat Kotawaringin Barat, masa kik santor ngebok rangok. (Borneonews/Budi Surakhmat)

Kik pak sibuk becong, pejabat musti nyedia waktu pakai ni wartawan. Wartawan harus tilayani. Tugas wartawan juga penting.
Kepala dinas rik anggota DPRD sedia ni ngeliak ratong ni wartawan jak segi sai nyancan amanah ni rakyat. Mani, informasi sai tidapok, aga tisampaiko luwot mit rakyat. Wartawan beguai pakai kepentingan publik. Di ija, wat hak-hak ni publik jama informasi.

-- ani Ruslan Abdul Ghani, Ketua PWI Kotawaringin Timur

Sekam ngilu pejabat rik angota Dewan ngebuka. Tanno, sunyin ni musti tranparan. Dang lagi nyingker jak wartawan. Ram laher di zaman informasi. Kik kepala dinas masih ngebok banguk, reti ni mundor ni Pemerintah Kabupaten KOtawaringin Barat.

-- ani Andi Darmaji, Ketua PWI Kotawaringin Barat

Bupati mak wat ngeni instruksi jama kepala dinas ngebok banguk. Bupati terok ngebuka muneh, mak ngebok informasi. Sekam sadar fungsi ni pers ngeni informasi, ngedidik, ngehibut, rik kontrol sosial. Ingkah, sekam ngilu berita ni imbang (balance).

-- ani M Makmur, Kabag Humas Pemkab Kotawaringin Barat

Tikus Ngedandan Tau

INJUK tikus ngedandan tau.

Reti ni, kehaga ngehelaui blog inji, malah kirak bin cadang.

SMA Abdi Kena Suwah

TANNO nangon penerai. Kidang, apui sai nyuwah mak mileh musim.

SMA Abdi Jalan Pasanah, Kelurahan Sidorejo, Kecamatan Arut Selatan, Pangkalan Bun bela kena suwah, Selasa (13/3) dibingi.

Apui nyuwah kanjak pukul 20.15 WIB mak dapok tihalangi.

Enom kelas, sai lamban sai ngejaga sekola, ruwa laboratorium kimia rik komputer bela. Sai sisa ingkah sai unit kantor guru, lamban ni kepala sekula, rik pitu unit komputer.

"Kanah riya nyak mak dapok cawa," ani Kepala SMA Abdi Wajib Tati sambil bebisok pas ditanya wartawan.

Siswa-siswa jelas sedih. "Sekola sekam kena suwah. Padahal, ujian tinggal pepira rani lagi," ani Yohanes Bona, siswa kelas III SMA Abdi.

Foto-foto: Borneonews/Andri Saputra rik Budi Surakhmat

Orangutan Pori Ram, Dang Protes!

Presiden Orangutan Foundation International (OFI) Prof Dr Birute Mary Galdikas (Borneonews/Waeti)


ADU 35 tahun ia ninggalko Kanada, netop di Kotawaringin Barat (Kobar). Muwak ni ya neliti kehurikan rik ekologi orangutan (Pongo pygmaeus). Sampai tanno, Prof Dr Birute Mary Galdikas sai ngejabat Presiden Orangutan Foundation International (OFI), maseh ngabdiko badan delom usaha ngelestariko orangutan.

Reporter Borneonews Waeti ngewawancarai ni.

"Penting. Mereka itu saudara sepupu manusia. Red generic mereka 97,5% sama seperti kita. Mereka juga memiliki fungsi untuk menyebarkan biji di hutan. Sebab, banyak jenis biji buah yang tidak hancur. Mereka telan biji, lalu mengeluarkannya lagi melalui tinjanya. 70% biji yang mereka telan tidak hancur," ani Galdikas delom bahasa Indonesia.

Mustinya, adu. Konteks sai diucakko Galdikas yaddo hasil penelitian (reseach) injuk Charles Darwin ngucakko kera tuyuk turing ni jelma. Injikan wat kaitan ni jama ilmu pengetahuan (science).

Kidang, dasar... oh, Pangkalan Bun. Lamon sai lucu-lucu.

Cawa ni Galdiknas mangsa reaksi jak partai politik (parpol) rik organisasi keagamaan di Kotawaringin Barat.

Ketua MUI Muhammad Chabib ngehimbau umat Islam mak kena pengaruh.

"MUI ngeharap ulun-ulun pagun ngeyakini jelma di yaddo de Bani Adam (keturunan ni Nabi Adam). Delom Alqur'an, tikisahko di zaman Nabi Musa, nangon wat jelma sai tikutuk jadi kera. Kidang, lain kera sai jadi jelma," ani Chabib.

Lebih emosi lagi: "Seno lebeh ga. Sekam ngecam nihan. Sekam mak setuju. Cawa seno dapok ngamakko pemikeran ni ulun lamon rik dapok ngegirok aqidah neram," ani Ketua Partai Kebangkitan Bangsa (PKB) Kobar Jamaluddin.

Gileran ni Ketua Partai Persatuan Pembangunan (PPP) Kobar Rahmat Hidayat sai cawa: "Paham seno paham teori Darwin. Api sai diucakko Galdikas nyinggung ulun lamon, khusus ni umat beragama. Tuyuk turing ram Nabi Adam. Ram lain keturunan kera. Paham ini musti tilurusko. Bahaya nihan."

Naif. Temon-temon naif!

Beda! Jelas beda konteks ni. Galdikas cawa berdasarkan riset (sains), sementara Chabib, Jamaluddin, rik Rahmat nyucakko keyakinan agama. Ya, mak nyambunglah...

Kik Galdikas titanya, jelas ya juga wat keyakinan tenggalan soal jelma rik kejelmaan.

Timbangan ni seno, berita tanggapan sai disani Budi Surakhmat inji mak timuat di Borneonews. Maka ni timuat di blog ini gawoh. Tantu, tisesuaiko jama kepentingan per-blog-an. Pakai bahasa Lampung lagi. Hahahaa..

Payu ram lalang kidah.

Mitos Ulun Lampung?

Jak ipa asal ni ulun Lampung?

Pagaruyung
Tulangbawang
Gunung Pesagi
Sekala Brak
Buay Belunguh
Buay Lapah di Way
Buay Nyerupa
Buay Pernong
Anak Mentuha
Buay Bulan
Tumi
Krui
Belalau
Way Kanan
Abung
Sungkay
Menggala
Pubian
Semaka
Komering
Kalianda
Melinting
Ighau
Kuntara Raja Niti
Piil pesenggiri
Juluk adok
Nemui nyimah
Nengah nyappur
Sakai sambayan
Warahan
Dadi
Pepancor
Hahiwang
Wayak
Repong
Damar
Kahwa
Lada
Kaganga
Harakuning
Pekontebu
Sekuraan
Nyambai
Canggot bagha
...

Sunyin ni
ingkah mitos?
Mak wat nyata?
Ah...

Sai Penting...

"DANG nulis sai sedih-sedih terus geh," ani Budi Hatees.

Kepiker juga, api ya nyak risok nulis sai sakik-sakit di blog inji. Kidang, kujawab juga, "Mawek juga. Kik ngerti bahasa Lampung, dacok-dacok lalang-lalang ngebaca blog inji. Lamon juga cerita lucu ni...."

Dasar ngeyel.

Terserah do. Sai jelas, tanno ji atiku basa ni muhanjak nihan.

Nyak ampai sampai di Buun sekira ni pukul 11.30 WIB jeno. Jak mulang pekon. Petungga Ren rik Aidil.

Laju mit Liwa, Lampung Barat, jama Doni, Y. Wibowo, Galih Priadi SS, Max Muri, Budi Hatees, rik nyak ngerencakako nyani buku antologi puisi bebarong tattang Lampung Barat.

Sunyin ni munyayan. Seno sai penting.