Labels

Sunday, December 31, 2006

Bekorban do kik Mak Aga Jadi Korban

IDUL Adha (Buka Haji) seredikan jama Tahun Baru 2007: Minggu, 31 Desember 2006 rik Senin, 1 Januari 2007.

Catatan akher tahun*, latap di tragedi!

Kukuk, banjer, longsong, rik kecelakaan di ipa-ipa.

JUMAT (29/12) dibingi mak ngedok api-api. Pangkalan Bun injuk biasa ni, mangi. Koran terbit injuk biasa ni. Isi ni rencana Idul Adha rik acara tahun baruan.

Aduuh... kabar urak ratong tengah rani ni Sabtu (30/12).

Metro TV ngeberitako, Kapal Motor Senopati jurusan Kumai, Kalimantan Tengah - Pelabuhan Tanjung Emas Semarang, sai kena umbak di di perairan sekitar Pulau Mandalika, Jepara, Jumat (29/12) pukul 23.15 WIB, Sabtu (30/12) tengah bingi sekitar pukul 01.00 WIB kelop.

Informasi resmi inji jak Komandan Keamanan Laut TNI AL Jepara Serka Ali Imron.

Makkung ngedok sai pandai. Sekam juga ampai pandai pas ngeliak Metro TV. Padahal, kik ani Erlan, staf sirkulasi Borneonews, sengin no nangon wat sai ngeni pandai liwat SMS mit ya. Kidang waktu seno makkung dapok tipastiko.

Sunyin ni wartawan tikerahko mit Kumai. Mantau situasi. Andri Saputra, wartawan Borneonews, kesipak ngeni laporan mit Metro TV. Kidang, informasi sai lengkap soal kapal sai kelom, termasuk hasil evakuasi ni justru jak Semarang, sai jak redik ni jak lokasi ni kejadian.

Kik catatan muwak ni wat 200 penumpang rik 27 awal kapal di KM Senopati. Kidang, catatan jak Pelabuhan Panglima Utar, Kumai penumpang ni lebeh jak 500-an lebeh.

Data sai diluarko posko utama di Pangkalan Udara (Lanud) Ahmad Yani, Semarang, Minggu (31/12) tercatat 120 jelma kabar ni selamat. Jumlah inji nambah luwot 125 jelma.

Laporan sai diterima Direktorat Kesatuan Penjagaan Laut dan Pantai (KPLP) Ditjen Perhubungan Laut, nyatat 177 jelma selamat jak kelop ni PT Prima Vista no.

Umbak balak rik melanggar nyusahko nyepok korban.

Umbak balak rik melanggar juga nyani nasib ni KM Epoksi milik H. Afif sai berangkat jak Jepara mit Pulau Karimunjawa, Jumat (29/12) pukul 07.00 WIB, mak kepandaian.

Natal, Idul Adha, Tahun Baru sai latap di bencana. Waktu ni nihan ram bepiker. Api nihan dusa ram? Maseh kudo ram mak sadar-sadar?

Pengorbanan ni tian sai jadi korban -- injuk ani khotib Salat Id di Masjid Agung, Pangkalan Bun jeno pagi -- kalau beguna jama kemaslahatan umat. "Kik mak ada bekorban, rak juga sai ngerasako sara ni. Injuk kik ram mak aga bekorban herta nulung jelma jereh, ram juga sai aga jadi korban ni ketimpangan sosial-ekonomi...."

Dang ingkah mikerko badan tenggalan. Pikerko rik tulung sai bareh, ulun bareh, lingkungan.

Bekorban do kik mak aga jadi korban.

--------------

* Pepira rani nyak mak dacok ngeblog mani jaringan internet kanjak Selasa macet. Kukuk di Taiwan nyadangko serat optik dilom lawok.

Tuesday, December 26, 2006

Mulang Pagi Luwot

MULANG pagi luwot.

Borneonews adu ngebalikko dunia.

Bingi jadi rani. Rani jadi bingi.

Monday, December 25, 2006

Kimutmu Tor Nihan

MINJAK pagi-pagi. Eh, setemon ni kawasan juga.

Sabun mandi adu aga bela. Mit Supermarket Pelangi pai semakkung mit kantor.

Langsung geh, kerja... Ampai serebok adu metoh.

Jak mengan, malah kedugok. Yah, pedom pai serebok di kersi di kantor.

Minjak-minjak adu Bang (Azan) Asyar.

Nelepon mit Lampung.

Aidil basa ni main-main. Ya nangon biasa ngemainko banguk ni. Injuk aga cawa.

"Aidil adu pintar cawa," ani mama ni. Ngucakko: mama, mamam, nggok.

Pakai bahasa ni upi: Miwang.

Eh, kimutmu tor nihan, Nak.

Sanak pintar.

Aidil, basa api?

Ayah tiram.

Sunday, December 24, 2006

Tilelejuko Pedom

JEMOH, Senin (25/9) Natal.

Koran mak terbit.

Reti ni, rani inji ngebalos dendam. Istirahat pai.

Tilelejuko pedom.

Saturday, December 23, 2006

Tinggal Telu

EDISI Minggu terbit mawat?"

"Terbit."

Maka ni, bingi ji mak sepedoman luwot nyiapkan terbitkan koran jemoh.

Sawai Natalan. Injuk Deny rik sai bareh mulang. Henri ampai ratong tanggal 27 nanti. Ngunyaiko mata ni jak operasi.

Tenaga editor tinggal telu. Nyak, Eko, rik pemred.

Terbit juga.

Friday, December 22, 2006

Harian Borneonews

UPI sai adu saka titunggu laher juga rani inji.

Harian Borneonews muak ni terbit di Pangkalan Bun, Jumat, 22 Desember 2006.

Nyak rik kantek-kantek di Pangkalan Bun kanjak 3 September. Reti ni, hamper epak bulan sekam, jak Media Indonesia rik Lampung Post (Media Group) barong jama Tanjung Lingga Group nyiapko surat kabar kesai di Kabupaten Kotawaringin Barat, Kalimantan Tengah.


Koran Borneonews terbit 16 halaman. Urut-urutan ni Halaman Hadap, Dinamika Borneo, Borneo 24 Jam, Polkan & HAM, Ekonomi & Bisnis, Olahraga (2), Kotawaringin Barat (2), Tambun Bungai, Opini, Analisis, Pendidikan & Kesehatan, Internasional, rik Indonesia 24 Jam.

Borneonews.

Thursday, December 21, 2006

Begeluk Ngejar Tayang

JEMOH, Jumat, 22 Desember 2006 Harian Borneonews resmi ti-launching.

Sunyin ni ngebut ngeraduko guwai.

Siip do.

Wednesday, December 20, 2006

Buya Becong

UOH.... Tengah jam lagi mak jam ruwa belas dibingi.

Guwaiku makkung radu. Ruwa halaman Kotawaringin Barat. Ampai sai halaman, seno goh sempurna.

Mak kerasa beguai sampai-sampai lupa ngurikko HP. Ren ngehubungi, nyak mak pandai.

Uoh.... Makkung radu. Kidang, buya becong. Taru pai. Jemoh pagi tilajuko.

Reti ni ruwa halaman lagi sai musti kukerjakan pakai edisi 22 Desember: Halaman Kotawaringin Barat sai lagi rik Nusantara.

Utokko adu panas. Istirahat pai.

Tuesday, December 19, 2006

Mulai Hiruk

LAUNCHING koran Borneonews tambah redik.

Saur Hutabarat, Pemimpin Umum Media Indonesia sekaligus Pemimpin Umum Borneonews ratong nambi, Senin (18/9) di rani. Langsung rapat.

"Tano ram fokus isi koran persiapan launching ini," ani nambi.

Maka, rani inji sekam mulai hiruk.

Sai mena, nyiapkan edisi khusus (suplemen) pak halaman. Inji aga tibarongko jama 16 halaman edisi perdana 22 Desember 2006.

"Dri... Dri... ini wawancara jama Ketua DPRD dan Bupati kurang kejung. Wawancara luwot."

"Tanno?"

"Naiya, tanno. Titunggu."

(Pause)

"Ponsel ni bupati mak dapok tihubungi."

"Cuba luwot."

(Pause)

"Sapa sai wawancara jama Kepala Dinas Pendidikan?"

"Ayo, ngaku."

"Geluk kidah."

....

"Wah, manajemen liputan perlu tiuyunko."

....

Hiruk geh.

Monday, December 18, 2006

Wat Api?



WAT api?

Dang mudah singkuh
kidah

....

Sunday, December 17, 2006

Muhammad Aidil Affandy Liwa

MUHAMMAD Aidil Affandy Liwa. Inji ganti ni gelar ni anakku.

Gelar ni sai mena -- mak perlu kuucakko luwot -- keliwat biak, ani tian. Mak ketahan ngusung ni, anakku meruyuh terus.

Ya, nyak percaya riya.

Kasian nangon Aidil, ampai umor sebulan lebeh, adu epak kali luar-kuruk rumah sakit.

Ruwa minggu jak Aidil laher, nyak mit Pangkalan Bun luwot. Kurang lebih sebulan nyak di Lampung, nunggu Ren ngelaher. Soal ni, penyana laher 18 Oktober, bang laher 28 Oktober 2006.

Waktu kutinggal, Aidil sehat.

Kidang pepira minggu nyak di Pangkalan Bun, nyak mangsa kabar jak Ren, Aidil kuruk Rumah Sakit Advent.

Munyai. Mulang.

Mak saka, kuruk Advent luwot.

Waduh, nyak adu hingam.

Syukor munyai.

Kidang, meruyuh luwot.

Halok mani meliyom jama Advent, Aidil tiusung mit RS Immanuel. Di udi mak diurusko tian. Ingkah mani -- mahap SARA -- beagama Islam. Tiusung mit RS Urip Sumoharjo.

Bingi seno, nyak ada mak tahan, nyak cawa jama Pemred, anakku kuruk rumah sakit luwot. "Yu. Cawa pai jama SDM Media," ani Kohar.

Ani Revi jak SDM Media, "Mak masalah. Repa ani pemred."

Bingi seno nyak langsung ngehubungi, Bambang jak Tanjung Lingga sai biasa ngurusko tiket pesawat sekam. Kidang, kik jemoh ni Kemis mak ngedok. Mak api-api berangkat rani Jumat (1/12).

Mulang do nyak, sampai di Lampung Sabtu (2/12) pagi. Bak rik Mak basa ni di Karang. Nangon tian kukeni pandai.


Aidil adu mulang Jumat di rani.

Syukur do.

Nyak adu tenang.

Ee..., Sabtu di rani, Ren ngehubungi HP-ku. Nyak basa ni midor ngeliakko Perum Puri Tirtayasa jama bak. Rencana nangon aga ngeridit lamban di san. Nanyako seno.

Aidil mising-mising terus jak jam 12 di rani.

Hiruk sekam aga ngubati ni. Muak ni mit Bidan Halimah. Mak di lamban. Makkung mulang. Tiusung mit Rumah Bersalin Sartika, Gedongair. Di udi malah dikayun tian mit rumah sakit.

Ya, mit RS Advent luwot.

Ruwa rani, sehat. Mulang.

Kidang, maseh wat masalah. Aidil risok kerabaian. Mata ni ngeliak mit atas terus.

Saran ni, Tedy, om ni Aidil, ngurau 'jelma pintar': Roni Sutan Angguan. Kebetulan, rupa ni nyak nangon radu risok petungga ya di acara-acara seni tradisi Lampung. Ya, juga ngajar di D3 Bahasa dan Sastra Lampung Unila rik risok barong Syafril Yamin mit DKL.

Ani, nangon wat sai ngeganggu ni. Aidil telu rani diubati ni.

Kadu ni jak Liwa, bak tian mangsa ubat muneh. Diantakko mak mit Karang.

Syukor munyai. Aidil tenang.

Nyak tanno di Pangkalan Bun. Nyepok rezeki.

Sehat terus yu Aidil kahut.

Saturday, December 16, 2006

Siap-siap Launching

NYAK di Pangkalan Bun luwot jak nambi, Jumat (15/12).

Sampai tengah rani, langsung beguai nerbitko koran antak pagi.

Mangsa kabar kurang mebangik jak Lampung -- anakku Aidil cutik mepingol, ani mama ni -- nyani nyak mak semangat.

(Ya Allah, kilu nihan sehat rik selamatko keluargaku.)

Untung malam minggu, koran mak terbit.

Kidang, tanno sekam siap-siap launching, 22 Desember nanti.

Saturday, December 09, 2006

Makkung Siap Lamon Cerita

NYAK di Lampung. Adu puluh rani.

Anakku meruyuh. Sampai epak kali kuruk rumah sakit. Adu munyai. Tanno basa ni ngulohko sihat ni.

Mit Pangkalan Bun, Jumat (15/12). Ngeliakko keadaan pai.

Ah, nyak makkung siap lamon cerita.

Thursday, November 30, 2006

Geluk Munyai yu, Nak

NYAK mulang mit Lampung pai jemoh, Jumat (1/12).

Nyilau Aiken.

Kasian anakku, Aiken. Ampai umor sebulan, radu telu kali kuruk rumah sakit. Telu kali muneh tiimpus.

Geluk munyai yu, Nak.

Monday, November 27, 2006

Nyastra?


NYASTRA? Dipa tulisan sastra ni.

Abah Oryza ngewada nyak.

Tee...taaap! Nyak maseh nyastra kok.

Kegeringanku jama sastra-budaya wat di cabiklunik.blogspot.com. Isi ni dokumentasi tulisanku (sastra-budaya-sosial-politik).


Nangon kurang produktif. Pangkalan Bun mangi jak komunitas rik guwai seni/sastra.

Setemon ni mak masalah. Karya sastra kan guai tenggalan.




Kidang, kik wat sai bareh ni, kan dapok bagi-bagi cerita proses kreatif, ngewada, atawa... lamonlah; injuk di Lampung. Iklim sastra Lampung mehelau. Perlu tipupuk terus.

Sai jelas, nyak tetap nulis ... api riya. Mak kecuali sastra.

Reno do, Abah.

Friday, November 24, 2006

I'm not a Monkey

Judul: I'm not a Monkey/Foto: Amril Nuryan

Nangon lain ciguk kok! Kilu mahap kik wat sai kesinggung. Ya, halok wat sai mirip...

Wednesday, November 22, 2006

Mak Ngedok sai Murah di Ija

AGA ngirim SMS, mak ngedok pulsa. Tepaksa, nyepok pai. Ampai petungga counter mejawoh cutik jak kantor.

Ngilu sai 25.000.

"Pira?" aku.

"Lima puluh ribu," ani.

"Mahal ireh? Lain ruwa puluh walu?"

"Cakak. Mak ngedok barang ni. Nambi ya."

"Kik 50 pira? Lima ngepuluh telu."

"Wallah, ya radu...."

Tepaksa juga. Masa aga maleh mit counter bareh.

Ah, Pangkalan Bun.

Mak ngedok sai murah di ija...

Tuesday, November 21, 2006

Telu Rani... Listrik Mati

CILAKA...

Masa listrik kantor mati jak rani Sabtu (19/11) dibi sampai Selasa (21/11/ di rani.

Listrik di Pangkalan Bun nangon risok mati. Gileran!

Kidang, trapo di gardu sai arus ni mit kantor meletus. Kik pak sai bareh urik, kantor mati.

Telu rani mak dacok api-api. Api mak kacau.

Friday, November 17, 2006

Sang Tiak Wai

sang tiak wai

jak sang pampang

pak cutik

ngeni reti

Thursday, November 16, 2006

Mudah Ga Cawa Mawat

INDUH muneh.

Nyak ngebaca koran lokal kok melamon sai ngucak mawat.

Nara sumber ni pejabat daerah.

Api maksud ni kik mak ngemudahko cawa: mak pandai, mawat titinuk, mak betanggung jawab....

Ngekasko culuk!

Gileran jelma lunik sai titanya, jawab ni: mawat ngedok pitis, mak ngedok daya, mak dapok bubat....

Mejereh daleh mebugu!

Api guna ni koran kik mak dapok nulung sai perlu titulung.

Ingkah jadi saksi atawa ngabdi jama kepentingan ni jelma balak kudo?

Dang mudah ga cawa mawat kidah.

Wednesday, November 15, 2006

Basa ni Mangi


NYAK aga cawa api?

Pangkalan Bun!

Uuoooo...h....

Reti ni?

Basa ni mangi.

Seradu terai.

Rani inji.

Tuesday, November 14, 2006

Asok IIung Lebon

ASOK mulai nipis ilung lebon di Pangkalan Bun. Adu pepira rani terai.

Ingkah Minggu (13/11) mak terai. Halok mani dibi ni sekam telu (nyak, Rahmat, rik Yogi) ratong.

Selamat beguai luwot di Borneo.

Hehehee...

Monday, November 13, 2006

Kitai Nyak di Kumai

SMS ni Eko, siap-siap cakak biduk, jadi nyata.

Sekam (nyak rik Rahmat) berangkat jak Bandar Lampung cakak travel Purnagama mit Bakauheni rani Jumat (10/11) sekitar jam puluh setengah. Jak Bakauheni nyambung pakai kapal cepat. Sampai di Media Indonesia sekitar jam epak setengah dibi.

Ngakuk tiket pesawat Jakarta-Semarang jak SDM Media.

Minok pai di Jakarta sebingi.

Pagi ni (Sabtu, 11/11) mit Bandara Soekarno-Hatta. Di udi, Prayogi, rik artistik jak Media adu nunggu aga barong berangkat mit Pangkalan Bun. Ya ngegantiko Erlon sai aga ngurusko wisuda ni di Jakarta sekitar sebulanan.

Kambor do sekam telu (nyak, Rahmat, rik Prayogi) ilung Semarang.
Eehhh... pesawat latap. Antak Minggu. Senin, induh wat induh mawat.

Reno ani Sikin, sai biasa ngurusko tiket sekam di Bandara Ahmad Yani, Semarang.

Kik kesetemonan ni, induh... Sekam percaya riya. Tian jak Pangkalan Bun injuk Eko, Efenk, rik Pemred ngucakko, "Dang aga. Minok pai gawoh di Semarang. Jemoh pakai pesawat."

Kidang... tanggung. Sekam tepaksa cakak kapal lawok gawoh.

Nunggu sampai jam ruwa, mit Kampus I IAIN Walisongo pai nunggu rani. Kebetulan wat acara temu pengarang, ani Rosidi, kenalan penulis di Semarang. Kidang, acara ni ampai mulai jam ruwa. Sekam ikah turuk acara reuni alumni surat kabar mahasiswa Amanat IAIN Walisongi.

Sekitar jam sai di rani ilung Pelabuhan Tanjung Emas mani di karcis titulis pukul 14.00 WIB. Nyata ni, ampai berangkat jam lima setengah.

"Selamat jalan. Tetalunan, redik Kalimantan wat badai tsunami," ani Efenk pakai telepon.

"Api. Tsunami damai?" aku.

"Badai tsunami."

"Amien."

Kapal Dharma Kencana I sai sekam tumpangi latap. Kik ya wai, cucung nihan. Hamper kelimpahan.
Kamar-kamar, hadap, kudan, pingger kiri-kanan, datas-debah, malah sampai dek rang ni kendaraan latap di jelma. Di bingi, susah liwat. Rumpok pedom malang-melintang. Ngelangkah cutik goh reti ni ngelangkahi rumpok sai pedom.

Biadab! Temon-temon mak ngedok kejelmaan. Cakak kapal injuk di bui. Mengan ruwa kali ngantri pakai tiket kapal sebagai bukti. Persis injuk di penjara.

Payu... bedua gawoh kalau selamat sampai tujuan.

Syukor do, lawok ni tenong. Hampir mak ngedok umbak balak. Sebingian nyak pedom. Uleh ni pel Antimo ruwa sai kukanik semakung berangkat.

Kidang, temon-temon kacau. Kapal lebeh kapasitas tetap lapah riya. Waahh....

Sekam di kudan luar kamar. Bingi kengisonan. Rani kepanasan.

Lapahan sekitar 22 jam. Jak Sabtu (11/11) jam lima setengah dibi sampai Minggu (12/11) jam ruwa setengah di rani.

Lapahan sai mebuya nihan.

Kidang bakas sai cawa jama sekam di kapal: Jawa-Kalimantan meredik. Liak gawoh. Jeno di tanoh Jawa, tanno adu keliakan tanoh Kalimantan.
Sekam pema riya. Longan, pikerku, reji saka ni lapah tiucakko meredik.

Pas adu kuruk di Way Arut. Muwak ni sinyal timbul-lebon. Kala lancar ku-SMS Efenk: Kitai sekam di Kumai.

Jam ruwa, ani sekam. Kidang, ampai dapok regah jak Dharma Kencana II jam telu kurang. Rangok di kapai pakai macet pai.

Temon-temon lapahan sai bekesan.

Ha?

Tuesday, November 07, 2006

Kena Cancel

NYAK adu nangguh jama jelma lamban. Ngantak motor injaman mit Budi. Nangguh muneh jala tian.

Kadu ni, cacak angkot nyambung Damri mit kantor travel Purnagama di Jalan Kartini, di hadap ni Artomoro.

Ehh... wat SMS: Zul cancel.

Jak Rahmat.

Jelas ni, urung kambor mit Pangkalan Bun rani Rebu. Kena cancel rani Sabtu. Mak ngedok pesawat rik kapal lawok sai ilung Pangkalan Bun rani seni. Api lagi kik mak masalah asok.

Reti ni temon do ani Eko, mit Bun tengah bulan November gawoh. Temon do. Tengah ni November.

Hikmah ni: Rupa ni Aiken maseh tiram jama bak ni.

Kebetulan kik reno.

Sunday, November 05, 2006

Tiram Mak Radu

RAMADAN liwat. Buka adu bela. Tiram mak radu.

Kidang, adu waktu ni. Sawai nyak berangkat mit Pangkalan Bun luwot.

Mit Jakarta Selasa (7/11). Minok sebingi pai, Rabu (8/11) ni ampai laju mit Borneo.

Saturday, November 04, 2006

Cakak Biduk?

SIAP-SIAP cakak jung mit Pangkalan Bun. Pesawat mak dacok lapah uleh ni asok.

SMS ni Eko jak Borneo nyani nyak lalang.

Kubalos: Cakak biduk? Acak di Lampung gawoh kik reno....

Rencana awal ni nyak berangkat mit Pangkalan Bun, 1 November. Lagi tiram jama anak-kajong, tiubah tanggal 6. Kadu ni mani mesin cetak Lampung Post cadang tiubah luwot tanggal 8. Jak Lampung barong Rahmat Hidayat (Bagian Percetakan), berangkat serani semakkung ni.

Rupa ni Kalimantan maseh asokan. Maseh kemarau reti ni.

Lampung malah radu terai pepira rani. Malah, rani Kemis (2/11), terai campor angin puyuh. Ratusan lamban di Bandar Lampung cadang.

Lampung tanno ngehadapi musibah ampai, banjer, tanoh terbang, rik angin ribut.

Siklus bencana kebarongan jama ganti ni musim.

Tuesday, October 31, 2006

Ucakan Selamat jama Aiken

MUHAMMAD Aiken Agaputra Liwa, lahir di Bandar Lampung, Sabtu, 28 Oktober 2006 (5 Syawal 1427 Hijriah).

Sai saka titungu, adu ratong. Selepas subuh, tepat ni pukul 05.00 WIB, ya laher ngeliak dunia.

Selamat! Ucakan ratong jak ipa-ipa. Di bah ji sebagian ni:

Selamat bebahagia. Kalau jadi berkah, rejeki, rik sai ngusung tentram jama ulun tuha ni. Amin yaa rabbal alamin. Kilu mahap makkung kesipak nyilau. (Akmal)

Alhamdulillahi rabbil 'alamin. Kalau jadi anak shaleh. Robbi 'awzidbi an asykuro ni'm an'amta alayya wa ala waalidayya waan a'mal tardlohu waadhilni birohmatika fii ibadikash shalihin. Amin ya rabbal 'alamin. (Abdul Kohar)

Selamat atas laher ni anak kesai. (Eko Rahmawanto)

Selamat atas laher ni anak kesai. Kalau sehat rik beguna jama agama, bangsa, rik ulun tuha. Sekam juga ngucakko Selamat Idul Fitri, kilu mahap laher batin. (Erawansyah)

Selamat bahagia jama kurnia ni Sai Pengasut. Kalau jadi pengikok sai mak bukak rik lekang sekekejung mi urik. Amin. (Asnan)

Selamat jama laher ni anak kesai. Kalau sihat selal rik jadi anak shaleh rik beguna jama bangsa rik negara. Amin. (Revi)
Alhamdulillah selamat jama Udo Zul. Kalau Aiken Agaputra Liwa jadi dzuriyah toyyibah (generasi sai uyun), soleh, rik mujahit.... Gelar ni mehelau nihan. Gelar Agaputra api tiakuk jak Aga Khan? Injuk ni langsung nyani puisi ne. Hehehe.... (Ade Alawi)

Selamat. Laher dipa rik rad mulang mit lamban kudo? (Chairul Anwar)

Selamat ya Udo Zul. Kalau keratongan ni jadi cahya jama ram sunyin ni. (Heri Wardoyo)

Alhamdulillah. Selamat yu. Sai penting sehat rik mak ngedok gelar Eko di ya. (Henri Siagian)

Akher ni... sai titunggu ratong. Selamat! (Erlon R. Siahaan)

Selamat atas laher ni tamong Aiken. Kekalau sihat wal afiat. Rik, selamat Hari Raya Idul Fitri. (Edi Yusuf)

Selamat. Kalau jadi anak sai sholeh sai bebakti jama keruwa ulun tuha ni, agama, bangsa rik negara.
Zul, insya Allah, nyak nyusul. Tinggal nunggu rani ni. (Afrizal)

Selamat atas laher ni uyung, Tuhan sai Maha Penyayang ngeberkati keluarga sunyin ni. Amin. (Saur Hutabarat)

Alhamdulillah. Syukur tiucakko mit hadirat Allah Swt. Sekam sekeluarga ngucakko, 'Selamat'. (A. Fauzie Nurdin)

Selamat. Kanah sekam ratong mit Advent. (Budi Hutasuhut)

Selamat ya Zul, akher ni sai titunggu-tunggu ratong juga di tengah keluarga. Sekali lagi, selamat. Kalau jadi anak sai uyun di tengah-tengah keluarga, umat, bangsa, rik sai ngusung perdamaian dunia. (Sabam Sinaga)

Alhamdulillah, akhirnya 'Kak Julnya' wat anak. Kalau jadi anak sholeh rik bebakti jama ulun tuha. (Fadilasari)

Selamat! (Iskak Susanto)

Selamat Zuluk. Kalau ananda jadi anak sholeh. Rejeki ni ayah ni jadi tambah mantap. (Iskandar Zulkarnain)

Alhamdulillah. Selamat ya Do mangsa uyung. Kalau jadi anak sai sholeh rik bebakti jama ulun tuha. Sekali lagi selamat. Kapan syukuran ni? (Romadoni Yunanto)

Selamat. Kalau jadi anak sai beguna rik bebakti jama ulun tuha rik agama. (M. Natsir)

Selamat ya Udo. Kalau jadi anak sai sholeh rik bebakti jama keruwa ulun tuha, agama, rik bangsa. Amien ya Robb. (Asnia Pane)

Alhamdulillah. Selamat rik kekalau jadi anak sholeh. Kilu mahap lahir batin. (Damanhuri)

Selamat yu atas laher ni uyung. Kalau jadi anak sai sholeh. (Basuki Rahmat)

Selamat jadi bak. Kalau nanti jadi pahlawan Liwa. (Binhad Nurrahmat)

Zul, selamat yu atas kelahiran uyung tercinta. Kalau tuwoh jadi anak sai pintar rik buyun. (Djadjat Sudradjat)

Saturday, October 28, 2006

Muhammad Aiken Agaputra Liwa

28 OKTOBER.

Paling mawat, nyak nyatat ruwa momentum bersejarah.

Kesai, 28 Oktober 1928. Di nana, muli-meranai ngikrarko "Sumpah Pemuda". Bunyi ni muli-meranai Indonesia ngaku sai tanah-way, sai bangsa, sai bahasa: Indonesia!

Keruwa, pitu ngepuluh walu tahun kadu ni, di Bandar Lampung, Sabtu, 28 Oktober 2006 barong jama 5 Syawal 1427 Hijriah, anakku laher.


Tepat pukul 05.00 WIB kajongku, Ren, ngelaherko uyung di Rumah Sakit Advent, Bandar Lampung. Tirujuk jak Rumah Bersalin Sartika mit Advent tengah bingi. Padahal, kuruk Sartika pukul jak Jumat sekitar jam ruwa dibi.

Muhammad Aiken Agaputra Liwa
gelar ni!

Nyin jadi ulun (marga) Liwa sai wat gigih rik mampu ngejunjung harapan ni ulun lamon. Kekalau... Du'a sa mak putus.

Mati anjak ni atiku tanno.

Jadi ayah ni Aiken!

Sunday, October 22, 2006

Kalau Sihat Selamat Sunyin ni

PEMERINTAH adu mutusko Buka (Hari Raya Idul Fitri) 1 Syawal 1427 Hijriah kala rani Selasa, 24 Oktober.

Buka balak!

Kidang nyak di lamban riya.

Basa ni nunggu...

Lamon sai kutunggu. Lamon sai nunggu.

Kilu dua kalau sihat selamat sunyin ni.

Saturday, October 21, 2006

Ramadan Aga Bela

RAMADAN serebok lagi bela. Reti ni Buka ni adu aga.

PP Muhammadiyah malah adu netapko Idul Fitri rani Senin, 23 Oktober. Sai bareh ni lagi nunggu
hasil ru'yatul hilal (pemantauan langsung bulan), sidang isbat, rik penetapan Idulfitri 1427 Hijriah sai aga diucakko Menteri Agama M. Maftuh Basyuni, Minggu (22-10).

Tergantung ketetapan ni: Senin atawa Selasa.

Kapan ya riya buka, sekam (nyak rik keluarga) ngucakko:

Selamat Hari Lebaran 1 Syawal 1427 H
Taqobbalallah wa minna minkum minal'aidzin wal faidzin
Mahap atas sunyin ni khilaf rik salah.

Jejama neram ngecahko ati. Nyin fitri. Kadu ni, bebarong ram ngelangkah...

Seradu buka!

Friday, October 20, 2006

Lain Uncuk ni Kemarau


BANDAR Lampung nangon terai delom telu rani Selasa-Kamis, 17-19 Oktober. Sai paling kedok Selasa, nyani banjer terai Kota Tapis Berseri. Banjer uleh ni siring latap di sampah.

Kidang, terai lain hak nandako musim penerai.

Ani Kepala Badan Meteorologi dan Geofisika (BMG) Radin Inten II Lampung, Bambang Nova Setyanto, akhir Oktober sampai pertengahan November ingkah terai tentatif. "Terai injuk inji wat sekali atawa ruwa kali di Bandar Lampung. Kidang, inji makkung kuruk mit musim penerai." (Lampung Post, 18 Oktober 2006)

Bambang ngekekirako terai di Bandar Lampung ampai akhir November sampai minggu kerua Desember. Kik wilayah barat Lampung, akhir Oktober hingga pertengahan November mulai kuruk musim penerai.

Prakiraan awal musim penerai 2006 rik 2007 di provinsi Lampung tebagi pak:

Kesai, minggu kerua Oktober sampai minggu kesai November, terai di wilayah bagian barat (Tanggamus bagian barat, Lampung Barat, Way Kanan bagian barat, rik Lampung Utara bagian barat).

Kerua, minggu kesai sampai ketelu November, terai di wilayah Way Kanan bagian timur, Lampung Utara bagian timur, Tulangbawang bagian barat, Lampung Tengah bagian barat, rik Lampung Tengah bagian tengah.

Ketelu, minggu kedua November hingga minggu kesai November terai di wilayah Lampung Timur, Metro, rik Lampung Tengah bagian timur."

Keepak, minggu kerua November hingga minggu kesai Desember terai di wilayah Lampung Timur, Metro, dan Lampung Tengah bagian timur.

Tuesday, October 17, 2006

Ditagu Terai


KAPAL ngerapot di Pelabuhan Bakauheni Selasa, 17 Oktober 2006 sekitar pukul 02.45 WIB.

Damri sai kutumpangi begerak. Kuruk Lampung!

Sampai di lamban Kemiling jam enom kurang pagi.

Kedugok, nyak pedom. Ren mit sekula.

Kala minjak tengah rani, terai kedok. Injuk nagu nyak, "Ampai sampai kudo?"

Radu mesaka kemarau, terai jadi rahmat nihan.

Sunday, October 15, 2006

Mulang

Lampung...

Nyak jemoh mulang.

Adu mak ketahan.

Saturday, October 14, 2006

Mak Fokus Lagi


PIKIRENKU adu becabang.

Rasa ni mak di Pangkalan Bun lagi.

Malam minggu ui...

Senin nyak mulang.

Mit Lampung!

Petungga....

Friday, October 13, 2006

Asok Nangon Longan

ASOK nangon longan.

Nambi subuh sekam mak dapok mulang mit hotel. Asok ni kedol becong. Epenk sai nyetir mak dapol ngeliak renglaya. Batas ni tengliak ingkah ruwa jangkal, ani Rahmad. Kik aku, paling sang jangkal. Jak aga numbur tugu, acak mutar mit mess gawoh. Pedom ramik-ramik di udi.


Asok nangon longan.

Pullan Dongi Dongi di kawasan Taman Nasional Lore Lindu, Poso, Sulawesi Selatan kena suwah, awal pekan inji. Uleh ni seno, Poso muneh kena serangan asok kedol.

Asok nangon longan.

Malaysia, Singapura, rik Thailan protes mani darak rik pullan Sumatera sai kena suwah
nyani asok kambor mit negara ni tian.

Asok nangon longan.

Wednesday, October 11, 2006

Kobarko Sumangat



BORNEONEWS nangon makkung terbit.

Kidang, beguai musti rajin.

"Jaga motivasi. Dang kendor," ani Pemred.

Kobarko sumangat!



Heh...

Kebetulan, sekam tanno basa ni di Kabupaten Kotawaringin Barat (tisingkat Kobar!), Kalimantan Tengah. Ibu kota ni Pangkalan Bun, rang ni Borneonews aga terbit.

Jadi, kik pak asok kedol, tetap riya:



Sumangat ber-KOBAR-KOBAR.

Kobar!

Lambar!

Bar!

r!

Tuesday, October 10, 2006

Iisee...ppa

ASOK maseh mekedol di Pangkalan Bun. Sai paling parah di ibukota ni Kalimantan Tengah, Palangkaraya.

Mulai rani inji, Rabu, 10 Oktober, sunyin ni sekula di Pangkalan Bun libur. Agak telat tibandingko di Palangkaraya sai adu libur kanjak rua minggu semakkung ni.

Parah. Ulun-ulun mulai miker aga maleh jak Kalimantan mit rang sai lebeh sehat.

Kidang sekam, malah ratong mit Pangkalan Bun. Nyepok asok. Hahahaa...

Tiap rani mulang subuh selepas saor jak kantor ilung hotel. Asok kedol becong.

Wat sekali, mubil sai kutumpang mak dapok laju antak Hotel Novada mani renglaya mak keliakan. Jarak ni tengliak paling sang jangkal.

"Wah, kik reji terus, dapok kena iise...ppa," ani Eko, rik kantor.

Iise...ppa?

Induh maksud ni api. Kik ISPA ya infeksi saluran pernafasan akut, sai penyakik uleh ni asok selain sakik mata, sakik ulu, sakik irung, sakik tenai, rik ... sakik ati.

Iise...ppa!

Monday, October 09, 2006

Repa ya Riya Renglaya ni


AMPAI kerasa hiruk ni rumpok sai aga mulang pekon jak rantau. Apilagi sampai nyebrang lawok segala.

Ren adu ngingokko, adu mesan tiket makkung. Soal ni, tiket-tiket mubil, kapal lawok, rik pesawat pakai H-7 Buka rata-rata radu kena borong.

Reno muneh di Pangkalan Bun. "Tiket Kapal Bela", reno judul berita ni halaman Kotawaringin Barat Borneonews (maseh edisi percobaan).

60% calon penumpang kapal lawok adu mbayar. Penan ni berangkat, pakai kuitansi sampai tiganti tiket seminggu semakkung Idul Fitri.

Henri, rik kantor, sampai titunda serani kambor mit Jakarta. Kidang lain uleh ni mak mak mangsa tiket. Asok kedol nyani kapal ni mak kawa mit Pangkalan Bun.

Repa ya riya renglaya ni, Insya Allah, nyak mulang mit Lampung kak 16 Oktober.