Labels

Wednesday, July 30, 2008

Empek-Empek di Bundaran Pancasila

JENO (30/7) libur Rani Isra' Mikraj. Injuk ayuk ni, sekam libur mena serani semakkung ni. Nyak libur nambi.

Yah, kesempatan ngusung Aidil rik mama ni midor setemon ni. Aidil nangon terok lapah terus.

Pagi-pagi kung kuk imul, aga langsung midor. Susah nihan ngeni ni pandai, mandi pai, mengan pai. Ngindang kuruk angin.

Nyak imul juga ditunggu ni.

Kekala lagi, nyak mejong-mejong atawa pepedoman ya narik-narik ngayun nyak minjak, ganti celana, makai jaket... ngakuk kunci ni motor rik nunjukko helm.

Maksud ni ngurau midor. Bem... beemmm... beemmm...

Setemon ni nambi, jak mutar-mutar di Pangkalan Bun, nyak aga ngusung tian ruwa mama ni mit Pantai Kubu di Kumai. Kidang nyak lupa renglaya ni.

"Aga mit dipa?" ani mama ni.

Nyak mak cawa kik salah renglaya. Kuucakko riya, "Ya memidoran ngetes motor."

Mak pehalu Pantai Kubu. Induh kik makkung sampai, ya adulah, mutar muloh mulang mit Pangkalan Bun.

Eh, ... dibi ni Aidil ngurau lapah luwot.

"Payudo. Ram mit Bundaran Pancasila. Ngeliak repa keliak ni kak dibingi. Sekalian ram nyecas Mpek-mpek Palembang," aku.

Jeno di rani Ren ngeliak wat warung empek-empek. Nangon adu saka nyepok-nyepok kaniak'an sai imbau-imbau Lampung injuk somay. Kik mak ngedok, batagor sai agak mirip.

Akher ni, petungga juga empek-empek.

Jadilah, sekam telu nyicip empek-empek Rumah Makan Sari Rasa Jalan Iskandar, Bundaran Pancasila. Nyak mesan lenjer. Ren nyecas lenggang.

Aidil makkung pandai nganik empek-empek sai kenyil-kenyil. Kidang ya betah. Mutar-mutar di warung. Apalagi waktu wat sanak 13 bulanan, ratong barong mak rik andung ni.

"Mulang Dil, adu aga Magrib."

Surok ireh Aidil tiurau mulang.

Sunday, July 27, 2008

Bahasa Kekuasaan

LUAR (luwot!) bahasa kekuasaan: "... Nyak wat wewenang."

Kik adu cawa inji sai luar, reti ni mak ngedok diskusi. Argumen mak perlu. Tergantung sai wat wewenang.

Ya, adu do kik reno.

(Kejadian rani ini, Minggu, 27/7 pukul 22.30 WIB. Taganko nyak gawoh sai ngingok ni)

Monday, July 21, 2008

Angi ni Sastra(wan) di Kalteng

HAMPER ruwa tahun nyak tinggal di Pangkalan Bun, Kalimantan Tengah (Kalteng). Ingkah sekali mit Palangkaraya, ibu kota provinsi inji waktu Kalteng ngerayako ulang tahun ni ke-51 (Kalteng laher 23 Mei 1957).

TARI POTONG PANTAN. Ruwa meranai ngusung tari makai pakaian khas suku Dayak jama hiasan ulu jak bulu ni burung juwe di atas bebatuan Way Teweh (anak ni Way Barito) Kecamatan Teweh Timur, Kabupaten Barito Utara, Kalteng Jumat, 31 Juli 2007. Tari Potong Pantan atawa Bahalai sai dilengkapi mandau (senjara khas Dayak) inji biasa ni pakai nyambut tamu sai ratong. (ANTARA/KASRIADI)

Nyak santor wat minat jama segala hal sai wat hubungan ni jama sastra, seni, rik budaya. Kidang, selama nyak tinggal di Pangkalan Bun, hara jarangku petungga -- minimal nengi atawa ngebaca kegiatan sastra, seni, rik budaya di Pangkalan Bun atawa malahan Provinsi Kalimantan Tengah.

(Pengecualian soal musik injuk di Pangkalan Bun lumayan risok juga band asal Jawa konser rik seni-budaya tradisional).

Waktu mit Palangkaraya hara terokku petungga sastrawan/seniman Kalteng. Kidang, "Mak ngedok," ani wartawan Borneonews di Palangkaraya Heri Fauzi.

TARI DAYAK. Pepira sanak makai kawai suku Dayak ngusung tari kolosal pesta ngegetas waktu jembore wartawan regional Kalimantan di Kabupaten Barito Utara, Kalimantan Tengah, Kamis, 5 Juni 2008. (ANTARA/KASRIADI)

Rang nongkrong ni seniman? Mak wat muneh. Taman Budaya makkung tibangun. Dewan Kesenian makkung tibentuk.

Ah, mati angi ni Kalteng jak sastra(wan), seni(man), rik budaya(wan).

Rupa ni tinukanku mak salah.

Berita di bah inji kuterjemahko jak bahasa Indonesia jak Borneonews, Senin, 21 Juli 2008:

Lunik Apresiasi, Sastra di Kaltang Payah Ngembang

PALANGKARAYA (Borneo): Apresiasi ulun sai merebah jama sastra di Provinsi Kalimantan Tengah nyani daerah inji cutik becong ngelaherko sastrawan rik karya sastra.

"Kalteng ampai ngedok telu sastrawan sai dikenal jelma ramik. Inji mani karya sastra nangon mak pira diteroki jelma," ani Kepala Balai Bahasa Kalteng Puji Santoso di Palangkaraya, Sabtu (20/7).

Ani Puji, kurang ni minat jelma jama karya sastra tidasari pemikeran karya sastra mak dapok ngehasilko nilai ekonomi sai diperluko jelma serani-rani.

Lamon ni jelma Kalteng maseh sai mejereh rik nyebar di lamon daerah lom nyani sastra susah ngembang di daerah inji.

Balai Bahasa tenggalan, cawa ni Puji, adu beusaha ngegairahko dunia sastra di ija, kipak sampai tanno penerimaan ni makkung sehelau sai tikehagako.

Guwai sayembara nulis cerita buntak (cerbun) rik guwai sastra bareh, cutik becong sai nutuk. Delom guwai sayembara nulis cerbun misal ni, ingkah 28 jelma sai turuk rik sayembara nulis cerita rakyat sai ingkah ruwa jelma sai nutuk.

Puji ngewada, kembang ni karya sastra di Kalteng muneh kurang mangsa dukungan jak media massa.

"Media massa musti ni turuk betanggung jawab ngelestariko sastra. Cara ni nyediako ruang khusus atawa kolom sastra. Tanno ji ampai pepira media riya sai adu ngeni apresiasi pakai inji," ani.

Hamsad Rangkuti (tiakuk jak ija)

Kadu ni, sastrawan Hamsad Rangkuti sai hadir delom guwai Temu Sastra se-Kalteng ngaku wat lamon halangan delom ngembangko karya sastra di daerah.

Lapang ni jelma lamon sai cutik pakai ngemuat karya sastra injuk puisi, cerpen, rik bareh ni di media massa dinilai ni cukup wat pengaruh ni jama ngembang ni dunia sastra injuk di Kalteng.

"Media massa musti ngeni apresiasi sai cukup pakai sastrawan rik karya ni. Nyin ngembang di daerah, karya sastra jak helau ni kik tisesuaiko jama kondisi ni rang ni jelma di isan," ani sastrawan sai nerima pepira penghargaan nasional seno.


Repa kabar ni sastra di Borneonews? Hehehee....

Thursday, July 17, 2008

Mehanjak Ireh Ngeliak Iwa

NYAK rik Aidil nutuk mengan di rani di Rumah Makan rik Rang Ngawil Ruhama, Pangkalan Bun, nambi (Rebu, 16/7). Mama ni mak aga. Ulu ni lagi mesakik.








Pelaksana Harian Pemimpin Perusahaan Borneonews Aji Sukaryo (Mas Aji) sai ngurau. Ya ulang tahun.

Aidil mehanjak ireh ngeliak iwa mas rik jelma ramik. Mengan ni juga pintar.

Inji foto-foto ni Aidil sai diakuk Pujo Wicaksono waktu di udi.

Tuesday, July 15, 2008

Tutita Tutiti...

TUTITA tutiti... tutiti tutita...

Muwak ni nyak mak pandai. Induh api cawa ni Aidil. Nangon pepira bulan inji Aidil risok cawa-cawa.

Adu melamon juga kata sai dapok diucakko ni secara benor. Injuk, ini, itu, jatuh, tidur, mama, ayah, rik niru bunyi-bunyian.

Kak bang (azan), Aidil paseh nihan cawa: Allah...

Kidang pepira rani ji ya ngelapalko papa, bapa, tata, tuhtita tutiti. Sai terakhir, tutita tutiti... rupa ni modifikasi jak lagu "Jatuh Cinta Lagi (Playboy)" ni Matta Band sai didengi ni:

jatuh cinta lagi
aku jatuh cinta lagi

tutita tutiti

Ooo... nyanyi ya Dil?

Sunday, July 13, 2008

Listrik, Parah Becong

KIK PLN janji, dang percaya. Mesti buhung. Ani, listrik di Pangkalan Bun mak aga -- paling mawat mak risok ga -- mati jak bulan Juli inji.

Nyata ni, lain hak bekurang mati ni. Malah nambah.

Tanno, 1 : 1 (sai banding sai). Reti ni, serani mati serani urik atawa bingi inji urik, jemoh bingi mati. Rani inji urik di rani jemoh mati.

Malah, lebeh nyata ni. Jak risok ni mati jak urik ni.

Parah... separah-parah ni listrik di daerah bareh, jak parah ni listrik Pangkalan Bun.

Parah becong!

Wednesday, July 09, 2008

Mak Kesampaian...

JAOH-JAOH jak Pangkalan Bun mulang mit Lampung.

Sate ompong (Foto jak ija)

"Pokok ni nyak aga sate Ompong, bakso soni, bakso urip, es Kampung Baru, empek-empek Beringin, burung Dara Mas Yanto...," ani Ren.

Sunyin ni mak ngedok di Borneo!

Kidang, mati temadan. Sunyin ni mak kesampaian. Telu rani di Bandung. Pepira rani di Bandar Lampung tiselingi mit Liwa telu rani muneh sampai mulang mit Pangkalan Bun, injuk ni waktu ruwa minggu mak kerasa.

Sunyin ni kanik'an baik sai adu tibimbing-bimbing jak Kotawaringin mak kesipak ticecas.

Sekali waktu, aga singgah di Sate Ompong, eh... kepagian makkung buka.

Mati balak ni sesol. Kidang mak ulah dia.

"Ah, Abang sibuk tenggalan riya," ribok ni Ren.

Yaa.... Kekalau kak mulang luwot.

Sunday, July 06, 2008

Peratong jak Pekon

LAPAHAN jak pekon. Ingkah bahan ingokan. Ngindang lupa.



Foto-foto keluarga (1) Uthie, mak, nyak, Ren, rik bak, (2) Aidil ditaban mak, (3) jak kiri mit kanan kakak ni Aidil, yaddo Revi, Yolda, Ulfa, rik (di hadap) Abid.

Wednesday, July 02, 2008

Instrospeksi, Instrospeksi...

SERADU jak nerbitko buku puisi Mak Dawah Mak Dibingi (rasa ni mak mungkin nyak lupa jama jelma sai bejasa ngelaherko buku inji, utama ni jama Y. Wibowo, Budi Hatees, rik Irfan Anshory)

Seradu jak nerima Hadiah Sastra Rancage 2008

Seradu jak Syukuran Rancage Sastra Lampung

Seradu jak mulang pekon

Tanno masa ni pema pai serebok, introspeksi... introspeksi!

Sebareh jak ngucakko selamat rik muji; lamon wada dan lamon kurukan. "Helau kik karyamu mak sekadar bebahasa Lampung. Usahako ngebekom tafsir sastra Lampung," ani Iswadi.

"Lampung rik kelampungan dapok jadi perspektif delom karya," cawa ni Dirman.

Sai penting, dang sampai lupa badan injuk ani Budi.

Kantek-kantek rik puari lamon ngingokko.

Nerima nihan jama Iswadi Pratama, Isbedy Stiawan, Anshori Djausal, Geri Sugiran, Edy Samudera Kertagama, Soemandjaja, Djadjat Sudradjat, Bambang Eka Wijaya, Sabam Sinaga, ... sunyin ni.