Labels

Monday, April 30, 2007

Makkung Dacok Kuwada

"UDO, kapan mit P Bun. Tanno wat ruwa reporter baru. Sai ni sikop. Kidang Udo telat, adu sekam henai," SMS ni Andri Saputra waktu nyak basa ni tegambui di Jakarta.

Hehehee...

Kubalos, "Jumat. Nyak radu pandai. Semakkung mit Lampung, nyak ngebrip."

Naiya. Kanjak Kamis (12/4) Borneonews nambah tenaga ruwa wartawan: Rahmad Minarto rik Oktrika Nugraheni.

Sebagai "ulun ampai", makkung dapok kuwada. Kanah halok.

Sunday, April 29, 2007

Intim... Intim-i-dasi

RUWA minggu mak di Pangkalan Bun, rupa lamon cerita. Nyak sampai tekejut-kejut.

Epenk gelar ni. Rik sang kantor. Jeno pagi barong jama Mas Yogi, Pak Hari, rik Pak Min ngeresmiko tunangan jama Mitha.

Guwai helau setemon ni.

Ingkah, kisah ni latap di "romantisme" mirip sinetron. Jauh semakkung ni adu lamon sai cawa. Nyak nyak muneh wat cawa, "Dan main-main jama muli...."

Yah, adu telanjor. Keliwat intim akibat ni mangsa intim-i-dasi (istilah nginjam jak berita Kepala Satpol PP Kobar Suyud sai kena intimidasi).

"Ani atiku, nyak musti tanggung jawab," ani.

Padahal, Agustus kanah ya musti ni nayuh jama kundang ni sai di Jakarta.

Oooh... repa laju ni?

Injuk ani, "To be continues...."

Friday, April 27, 2007

Padahal Nyak Maseh ...

TELU bingi-ruwa rani luntang-lantung di ibu kota, rani inji (27/4) pukul ruwa tengah rani sampai juga nyak di Pangkalan Bun.

Henri adu mena rani Selasa. Deny mulang mit Jakarta. Kidang aga nyubai pai liwat Palangkaraya sambil ngelibut rumpok main bal. Eko langsung izin, istirahat pai mani adu saka mak libur.

Nyak kerja luwot.

Rani ji nyak makkung dapok cerita kejung. Padahal melamon bahan ni. Padahal nyak lagi mak dapok ngelupako, Aidil anakku, sai jemoh genap enom bulan. Padahal nyak juga maseh tiram jama Reni, mama ni Aidil, rik sanak-mori di Lampung.

Nyak tanno di Borneo.

Tuesday, April 24, 2007

Tegambui

KABAR sai ampai? Nyak tegambui di Jakarta.

Rani Selasa (24/4) pagi nyak berangkat jak Lampung pakai travel Purnagama. Begeluk mani ngejar semakung pukul lima dibi mani aga singgah di Media Indonesia ngakuk tiket pesawat. Kik dapok cakak kapal cepat. Walah, kapal cepat ni mak ngedok sai mani umbak lawok mubalak. Terpaksa cakak Roro KMP Rajabasa I.

Melali. Nyampai di Merak jam ruwa lebeh. Liwat cutik jak Serang, nyak kena kontak jama Palupi, SDM Media. Ngucakko jadwal penerbangan mit Semarang mak ngedok (?) sampai rani Kemis. Ampai wat rani Jumat.


Adu meredik Jakarta. Mubil Primajasa sai kutumpang, macet. Sang mubil sekam tioper mit mubil Primajasa sai bareh seradu nunggu sejam lebih.

Alhasil, berangkat Rebu titunda Jumat. Cerita ni telu rani tegambui di Jakarta. Untuk wat adek di Taman Asri, Larangan, Ciledug, sai ngeni tumpangan gratis.

Mak ngedok guwai, singgah di warnet Samudera.

Tegambui. Yah, ngetokko waktu telu rani di Jakarta.

Tuesday, April 10, 2007

Sai Penting Praktek ni

CUBA liak istilah-istilah sai tambah risok tiucakko rumpok tanno: good governance, clean government, acountability, tranparancy, check and balance, rule of law, democracy, social control, legitimate, ... induh api lagi.

Pejabat daerah mudah gawoh cawa. Padahal ngerti goh mawat. Ngebedako ejaan 'good governance' jama 'clean government' goh mak pandai. Api lagi aga ngeguwai ko konsep-konsep seno delom pemerintah rik pemerintahan (daerah).

Bukti ni gawoh, anggota DPRD merabai cawa, Petingi daerah risok maksako kehaga, korupsi tiucakko salah administrasi, rapat segok-segok, kritik ni koran mak tigeringi, Laporan Harta Kekayaan Penyelenggara Negara (LHKPN) titunda-tunda, rik Laporan Akuntabilitas Kinerja Instansi Pemerintah (LAKIP) mak tikeni-keniko.

Pak, Bu (legislator rik pejabat), sai penting praktek ni....

Monday, April 09, 2007

Lamban Kena Suwah (Luwot)

Sai lamban di Pangkalan Bun kena suwah luwot.

Tanno, lamban ni Mulyono, ulun di Jalan Ahmad Yani Gang Toda, Pangkalan Bun bela kena suwah, Senin sekitar pukul 00.30 WIB.

Pas kena suwah, sunyin ni keluarga mak di lamban mani basa ni ngerayako Paskah di lamban ni puari ni tian.

Thursday, April 05, 2007

Mak Ngedok Maling sai Ngaku Maling

JEMOH, Jumat (6/4) Libur Nasional Wafat Isa Almasih. Kik soal hikmah, taganko tian gawoh sai ceramah. Sai penting, jemoh koran mak terbit. Reti ni, rani inji sekam (redaksi koran) libur.

Waduh..., libur di Pangkalan Bun, gegoh jama mak libur. Aga mit dipa juga? Kidang lumayanlah, paling mawat dapok istirahat.

Paling mawat, lalang tenggalan. Pak ani rumpok mak lucu, cerita inji tetap lucu.

Cerita ni, Badan Pemeriksa Keuangan (BPK) ngehalu ratusan juta duit ni daerah nyeleweng (baca: korupsi), termasuk di Kabupaten Kotawaringin Barat.


Adu jelas-jelas BPK ngucakko nyimpang. Gubernur Kalteng Teras Narang rik Bupati Kotawaringin Barat ngucakko: lain korupsi. Biasanya, bahasa ngelesni, "Ingkah salah administrasi!"

Mak kalah lucu ni Kepala Kejaksaan Negeri (Kajari) Pangkalan Bun Nego Y. Abel. "Makkung ngedok sai ngelapor jama kejaksaan. Maka ni makkung titindak," ani.

Aduh Pak, sunyin ni jelma sai ngerti hukum, pandai bahawa kasus korupsi lain delik aduan. Kidang, kuruk delik umum. Uleh ni seno -- cawa ni dosen STIH Pangkalan Bun Ardiansyah -- kejaksaan musti proaktif.

Masa, jelma hukum mak ngerti hukum. Pantas, mudah gawoh ngucakko mak ngedok korupsi di Kabupaten Kotawaringin Barat. Pas BPK ngucakko wat sai nyimpang, malah cawa, "Mak ngedok sai ngelapor jama kejaksaan."

Mak ngedok maling sai ngaku maling, Pak Nego.

Lucu geh.

Sunday, April 01, 2007

Mak Turuk, Makkung Dapok Mulang

AGENDA kegiatan (jelma bareh, mani nyak mak turuk):

Jumat, 30 Maret 2007, sekam libur mani..

Sabtu, 31 Maret 2007: Libur Nasional Maulid Nabi Muhammad Saw; dibingi ni Reuni Akbar Surat Kabar Mahasiswa Teknokra Universitas Lampung di Lampung

Minggu, 1 April 2007: Pagi ni Pemred Khohar mulang mit Jakarta, dibi ni Konser Damai Anti Narkoba Bersama Naff di Stadion Sampuraga, Pangkalan Bun; dibingi ni ngedit berita ni sai disani Andro Desembery.

KONSER NAFF: Konser Damai Barong Naff di Stadion Sampuraga, Pangkalan Bun, Minggu (1/4). (Borneonews/Andro Desembery)

Waduh, musti ni mulang tanggal 4 April, kidang mak dapok.

"Niku dangkung mulang tanggal pak. Eko rik Deny dacok-dacok bucor. Henry aga operasi mata ni pai (reti ni mulang mesaka)," ani Khohar jama nyak rani Sabtu dibingi.

Nyak ingkah lalang riya. Deny ngucak nyak aga mulang tanggal pak barong Mas Yogi rik Eddy rupa ni.

Yah, reno do.