Wednesday, December 31, 2008

Kalender 2008 Tekebok

Kalender 2008 tanno tikebokko. Kamis, 31 Desember 2008.

Serebok lagi lembar sai ampai tibuka. Jumat, 1 Januari 2009.

Selamat tahun baru jama sunyin ni. Jejama ram ngejimpang mit masa sai jak uyun ni.

Kekalau krisis geluk liwat.

Monday, December 29, 2008

Amtenar

NGELEKIK musim pendaftaran calon pegawai negeri sipil (CPNS). November-Desember 2008.

Pema-pema (pedahal setemon ni adu pandai sunyin), enom jelma jak Borneonews ngedaftar.

Telu di hantara ni terima. Kebetulan tian telu jak bagian redaksi sunyin: Andri Saputra, Tira Puspitasari (Pangkalan Bun) rik Imam Rosyidin (Lamandau).

Telu bareh ni, Ali Gusman, Puguh Santoso, rik Erlan mak lolos.

Jemoh diumumko di koran Borneonews.

Huu...

"Niat ni riya mak lurus. Repa aga terima," aku ngemainko Ali.

"Liak-liak Ali di luar. Dang-dang ya ..." lamon cawa ni Eko.

Hahaa... Maksud ni frustasi trus kuruk numbur-numbur mubil kik mak kuruk siring.

Wih, jadi amtenar. Selamat ngelapahi renglaya sai baru jama sai kena terima.

Sunday, December 28, 2008

Bingi Tahun Baru Hijriah

JEMOH 1 Muharram 1430 H.

Cerita-cinta jak Borneo gegoh gawoh.


Mesjid-mesjid di Pangkalan Bun wat muneh sai ngerayako ni.

Kidang nyak ya... mati lampu luwot di rangku.

Repa muneh. Pedahal, epak genset tambahan adu urik.

Tanno libur. Api kidah aga guwai?

Friday, December 26, 2008

Susah Nyunsung Rp200

PEDAGANG di Kotawaringin (Borneo) sok-sok. Rupiah nangon hamper mak ngedok reti. Bukti ni nominal pecahan rupiah sai paling lunik Rp50.

Kik pak reno, Rp50 kan harus ni lagi dapok tipakai belanja. Kidang di rangku tinggal tanno, tukang jual mak nganggap duit receh wat. Santor tibulatko mit Rp500, Rp1.000, Rp1.500, Rp2.000, .... rik seterus ni.

Bupati Kobar netapko harga eceran tertinggi premium Rp5.800. Reti ni kan sai jualan bensin mak kasi ngeni rega lebih jak Rp5.800.

Nyata ni, rega ni premium di atas HET. Pengecer bensin maseh ngeregai bensin Rp6.000 per liter.

"Susah mangsa duit receh Rp200 pakai ulohan. Sai ngebeli muneh mak ngemasalahko ni," ani pengecer bensin sai di Jalan Iskandar, Pangkalan Bun.

Ani sapa mak masalah. Nyak risok ngemasalahko ni.

Sekali waktu nyak ngebeli amplop lunik.

"Seribu lima," ani sai ngejual.

"Nyak perlu sai gawoh. Pira?" aku.

Sai ngejual bingung. Ruwa ratus sai, reti ni.

Nyak kesol cetik, akher ni, nyak cawa, "Ya adu, ruwa gawoh."

Ruwa ya Rp400. Kidang, sunsung ni Rp500. Rupa ni, mak nihan ngedok duit di bah Rp500.

Kak belanja, pecohan Rp50, Rp100, Rp200 biasa ni tiikok pakai isolatif nyin jadi Rp500 atau Rp1.000.

Ah, temon-temon Pangkalan Bun.

Monday, December 22, 2008

Narsiss... (Borneonews Ruwa Tahun)

RANI inji Borneonews persis umor ruwa tahun (22 Desember 2006-22 Desember 2008). Epak halaman khusus full color titerbitko pakai narsis-narsisan (cawa Lampung ni api ya?)

Sunyin ni kebagian titulis. Wat gambar ni muneh.

Nyak tenggalan barong rombongan kanjak 1 September 2006 adu di Pangkalan Bun. Ya, ruwa tahun lebeh.

Karu mansa kabar jak Eko. Ani, Revi jak SDM MI ngeni pandai nyak mulang mit Lampung kak tanggal 5 Januari 2009. Semakkung ni tanggal 4 ni, Denny Sinaga sai ngegantiko nyak ratong. Nyak muloh mit Lampung Post.

Inji gambar reramikan jelma Borneonews.


Jak kiri mit kanan baris atas: Eko Rahmawanto, Junaidi Effendi, Budi Handoko, Aji Sukaryo, Irwansyah, Bambang Andika, Bayu Saputra, Roni Dwi Yuswanto, Sapuani, Ali Gusman, rik Doyo Kunto Priyono. Baris keruwa (tengah): M. Abdul Fikar, Puguh Santoso, Eka Tommy, Oktasandri, Ersyad Yanuas Hasty, Mujianur, Lala Lesmana, Dodot Drajatnoto, Andro Desembery, Pujo Wicaksono, Andri Saputra, rik Muhammad Alwan. Baris paling bah: Zulkarnain Zubairi, Erlan, Neni Ningsih, R. Wana Widiastuty, Dhian Kurniawati, Oktrika Nugraheni, Tira Puspitasari, Waeti, Nur Budiwarti, Tovik, rik Suhermanto.

Sai mak ngedok di foto: Saur Hutabarat (pemimpin umum/redaksi), Ali Sadikin (pemimpin perusahaan), Dian Abdi Prasetyo (manager keuangan), Deny Parsaulian Sinaga, Rahmad Minarto, Muhidin, Rochmat Sutoyo, rik Sigit Yadi Cahya (Pangkalan Bun), Heryadi rik Ida Aryadi (Palangkaraya), Donny Harjo Saputro rik Pariyanto Marman (Sampit), Abdul Gofur (Kasongan), Akhdini (Kuala Pembuang), Marius Ernestus L.B. (Pulang Pisau), Imam Rosyidin (Lamandau), Rowi Krisna (Sukamara).

Jadi sai ingokan!

Wednesday, December 17, 2008

Kik Sanak Munakal, Masa Guru Mak Kasi Butong

EDY Mulyana, guru sai nampar sanak sekula di SMA Kristen Palangkaraya lamon kena bela jak lamon jelma. Sai ngebela di hantara ni Dinas Pendidikan Palangkaraya, Persatuan Guru Republik Indonesia (PGRI) Kalteng, rik kepala sekula ni tenggalan.

Kabid SMP/SMA/SMK Dinas Pendidikan Palangkaraya Irus Lanen ngucakko api sai diguwaiko Edy Mulyana lain kekerasan, kidang upaya nguyunko sanak sekula nyin disiplin.... Dst. (Guru Edy Lamon Kena Bela, berita ni Heryadi di Borneonews jemoh, 18/12).

Repa kesetemonan ni, taganko tian sai wat wewenang sai ngurusko ni.

SEKULA KEBANJERAN: Warga sai musti ngebabai anak ni ilung sekula aga turuk ulangan umum uleh ni banjer sai kuruk mit sekula rik pemukiman di Kota Banjarmasin, Kalimantan Selatan, Selasa (16/12). (MI/DENNY SUSANTO)

Cerita tumbai. Nyak kuruk SD tahun 1977. Enom tahun sekula dasar. Nyak halok mawek kik menakal. Kidang, risok nyani guru kesol. Kena tampar wat. Kena bebas wat. Kena tayar ilung luar kelas wat muneh.

Kantek-kentek sekula reno menuh wat kena betu oleh ni guru.

Kidang, seingokku mak pernah guru kuadukon sekam jama ulun tuha. Ulun tuha juga mak wat ratong mit sekulo butong-butong jama guru. Apalagi kik ngaduko guru jama pelisi. Mak nihan wat.

Sekam -- injuk ni sadar -- guru nangon guwai ni ngedidik. Nampar, mitit, atawa ngebetu sanak sekula sai nakal injuk sekam sebagian jak pendidikan. Mak ngedok masalah.

Nangon mak ngedok cerita muneh di nana guru nyiksa sanak sekula. Apalagi kik nyani sanak sekula katan-katan atawa mebayoh-bayoh badan ni.

Tanno?

Sanak sekula tanno keliwat manja. Masa kik tibutongi cutik (titampar) ngadu jama ulun tuha. Ulun tuha mincak-mincak di sekula. Wat muneh sampai ngadu mit pelisi.

Ah, hara susah ni jadi guru. Serba salah muneh. Dipemako riya sanak ni ngilu ampun... menakal dipa budol muneh.

Lain soal kik guru sai nyani siswa ngandung atawa mati. Kik guru mak bemoral ya musti tiselko.

Sunday, December 14, 2008

Ngegetas. Ah, Ingokan...

PEHALU foto inji nyak jadi ingok waktu lunik di pekon. Ngegetas pari di sabah.

PARI DARAK: Jelma di Dusun Parangkampeng, Kecamatan Teweh Tengah, Kabupaten Barito Utara, Kalimantan Tengah ngegetas pari darak atawa gunung varietas lokal jenis Talun, akhir Maret 2008. (ANTARA/KASRIADI)

Rupa ni jelma Dayak di Kalteng makai getas muneh pakai melok pari injuk ram di pekon.

Hara adu sakaku mak ngeliak ulun ngegetas (makai getas). Sai lamon injuk di Jawa, tian makai sabit ngakuk pari.

Ah, sekati jak kukuk di Liwa tahun 1994, sekam mak ngedok sabah lagi. Sunyin ni radu kirak.

Sebareh jak lebon lamban, lamon muneh jelma sai kelebonan sabah uleh ni kukuk.

Ah, ingokan!

Wednesday, December 10, 2008

333-3*

RENCAKA aga mepoh. Kidang, minjak kawasan. Seno muneh miyah uleh ni sms jak 3355: kredit RpXXX pada rek 1 TB xxx935 tgl 10/12/2008 jam 11:11:36..., dst ni. Insentif kuruk.

Kidang maseh memalasan, pedahal adu jam 12 liwat. Alhasil, jak mandi berangkat mit ATM Mandiri kadu ni mit BRI ngirim mit Lampung. Hamper jam 1 di rani. Nyak mangsa nomor 333. Antik juga. Nomor inji dikeniko bapak sai ngejaga di redik rang ngakuk nomor. Semakkung ni nyak ngeprint nomor 347.

Jak jam sai. Nyak midor-midor pai. Singgah di warnet serebok sekitar 45 menit. Ngupi pai muneh di kebelah kantor BRI. Mesaka muneh. Nomor antre 333 ampai mangsa gileran jam 3.

Induh muneh rani inji lamon angka telu ni. SMS jak 3355. Nomor 333. Jam telu.

Rani ini, Rebu, 10 Desember 2008, Ren ultah. "Adu kikirimko kado ni liwat BRI," aku.

"Ah...," ani di telepon.

Ya, nangon kiriman biasa gawoh.

-------------------
* Inji iseng gawoh. Dang muneh percaya mistik. Apalagi kik masang buntut.

Saturday, December 06, 2008

Malam Minggu. Jemoh Perai. Sawai Buka Haji. Ya, Reno Riya...

MALAM Minggu. Jemoh perai. Sawai Buka Haji. Hari Raya Idul Adha, ani tian.

Ya reno riya. Gugul. Mak ngedok acara api-api.

Api lagi nyak tenggalanan. Aidil rik mama ni di pekon.

Api aga guwai kidah kik ngurung badan di lamban.

Refleksi! Refleksi! Refleksiiiiii...!

Santor. Induh api lagi sai mesti tiiwohko.

Monday, December 01, 2008

Kangen Band rik Wali Band, Tian Ratong

JELMA Kotawaringin (Timur rik Barat) gering muneh ngeratongko artis.




Foto-foto Andri Saputra/Borneonews

Nambi bingi, 30 November gileran ni Band Wali rik Kangen Band sai manggung di Stadion Sampuraga, Pangkalan Bun, Kobar.

Nutukko laporan ni wartawan Borneonews Andri Saputra (Nyak repa aga nonton, ngantor goh nyak mawat mani sakik ipon), Kangen Band rik Wali nyani hiruk Kota Pangkalan Bun.

Kangen Band sai beanggota Andika (vokal), Dody (gitar), Tara (gitar), Lim (drum), rik Novry (bass) cakak panggung pukul 21.00 WIB langsung manasko stadion jama pepira single hits ni tian.

Maka, penuntun larut barong lagu-lagu Tentang Aku, Kau, dan Dia, Selingkuh, Cinta yang Sempurna, Bintang 14 Hari, Yolanda, rik Kembali Pulang.

Seradu Kangen Band, tampil Wali sai terdiri jak Faank (vokal), Apoy (gitar), Tomi (drum), Ovie (keyboard & synt), rik Nunu (bass) ngusung lagu-lagu jak album, Egokah Aku.

Friday, November 28, 2008

Kidang, Lain Rojali...

MINGGU inji ruwa rombongan jak pekon, Lampung, ratong mit Pangkalan atawa Kotawaringin Barat. Kidang, lain Rojali (rombongan jak Liwa) Hehhee....


TRANSMIGRAN JAK LAMPUNG: Bupati Kobar Ujang Iskandar (kiri) diriki Kepala Disnakertrans Kamusni (keruwa jak kiri) nyalami 25 KK transmigran jak Lampung Selatan waktu acara penyambutan di Balai Latihan Kerja (BLK), jeno. (BORNEO/ANDRI SAPUTRA)

Rombongan kesai, Kangen Band (barong jama Wali) sai aga manggung di Stadion Sampuraga, Minggu, 30 November 2008 bingi.

Rombongan keruwa, 25 kepala keluarga (103 jelma) jak Lampung Selatan sai jadi transmigran di Kobar.

Barong jama transmigran jak daerah bareh, tian aga tinggal di Kobar. Wat 150 unit lamban di permukiman transmigrasi di Kumai Seberang, Kelurahan Kumai Hilir, Kecamatan Kumai, Kobar siap titugui.

Jadi, jelma Lampung di Kobar nambah luwot.

Wednesday, November 26, 2008

Telu Kabar jak Telu Rang

JAK Bandar Lampung, nyak mangsa cerita Aidil pedom relom. Hamper jam puluh dibingi ampai hinok.

Nginjam gambar cover buku kumpulan cerpen ni Korrie Layun Rampan. Nyak nangon basa ni tiram jama anak-kajong. Sukor-sukor kik wat sai aga ngeni buku ni.

Nulung Is, mamak ni, turuk muneh ngebengkel motor. Pudak, culuk, cukut, kawai alom-alom latap di oli. Tihalang malah butong-butong, ani mama ni.

Aduh... Aidil. Mak nihan dapok pema.

Kidang, nurut Ren, Aidil riyang becong. Lalang-lalang. Radu jak ngebengkel, Aidil cawa, "Dah... dah...." Maksud ni motor ni adu buyun luwot.

Aidil, Aidil. Nyani ayah tambah tiram riya.

Kabar sai paling ampai, tian jak Jakarta (MI) mak telaju mit Borneonews. Krisis keuangan global rupa ni nyampai muneh di MI rik Borneonews. Pitis ni mak mungkin ngirimko jelma Jakarta mit Borneo.

Kantor ingkah perlu nambah sai asisten redaktur magang rik ngerekrut telu reporter tambahan.

Reno cerita jak Pemimpin Perusahaan Ali Sadikin sai basa ni di Pangkalan Bun barong jama Menager Keuangan Dian Abdi Prasetyo.

Waduh, kacau pembukuan. Reti ni lunik kehalokan ni nyak muloh mit Lampung delom waktu redik inji. Nutukko surat tugas sampai 6 Mei 2009. Kik reno cerita ni, dacok-dacok nyak di Borneo tilapok luwot.

Serba salah!

Wajah Deportan (jak hudannur.blogspot.com)

Kabar sai lagi, jak Banjarmasin. Email jak Hudan Nur, penyair Banjarbaru, Kalimantan Selatan ngucakko sajak-sajakku kuruk di buku Wajah Deportan, Antologi Puisi Penulis Muda Lintas Provinsi 2009 barong 37 penyair bareh jak macom-macom provinsi. Nyak tecantum jak Kotawaringin Barat, Kalteng. Rencaka ni, antologi inji aga tiluncurko tahun 2009 nanti.

Hahaa... nyak akher ni tibaiat jadi penyair Kalteng. Kebetulan nyak tenggalanan jak Kalteng.

Saturday, November 15, 2008

Halok Uleh ni Tiram...

NYAK tenggalanan luwot di Pangkalan Bun. Aidil rik mama ni tinggal di Lampung.

Aidil maseh risok nyapok nyak. "Ayah... ayah...," ani kik wat bunyi ni motor.

Nyak berangkat jak lamban di Kemiling jam wali dibingi, Rabu (5/11) bingi. Nyak cakak motor makai jas terai. Injuk biasa ni Aidil mak aga salaman. Kucium goh mak aga. Dadah juga mak dinggok ni.

Mak miwang waktu nyak aga berangkat. Kidang, ani mama ni, Aidil 'ngamuk' waktu nyak adu mit.

Jak keruwa, Aidil meruyuh. Bucor. Bingi ni mutah mising. Badan ni wat bintik-bintik suluh. Mak aga mengan.

Halok, tiram jama ayah. Kidang repa, nyak kerja.

Syukordo rani inji Aidil mulai aga mengan, mak bucor lagi seradu jak bubat jama Dokter Barudin nambi. Mulai riyang luwot pak badan ni lagi lemas. Apilagi Uthie, kakak ni ratong jeno di rani.

Kekalau geluk sihat. Ayah beguwai di Borneo, Dil.

Friday, November 07, 2008

Dipa Riya Mak Masalah

NYAK ampai sampai di Pangkalan Bun jak Lampung nambi jam 12.10 WIB. Pas nyak regah di Bandara Iskandar, rombongan haji jak Kobar ampai siap-siap berangkat mit Solo makai pesawat Linus Airways sai kutumpangi.

Nyak tenggalan sai muloh mit Borneo. Aidil rik mama ni tinggal pai di Lampung nunggu tes CPNSD, 30 November. Seradu ni, semeliak di keadaan.

Kidang, bedua kalau Ren terima.

Kabar-kabar nyak muloh mit Lampung injuk ni mak jadi tahun inji. Reno ani Mas Aji. Induh kik tahun hadap.

Ah, dipa ya riya, mak masalah.

Saturday, November 01, 2008

Negeri Asal Kangen Band

bintang terlihat terang
saat dirimu datang
cinta yang dulu hilang
kini kembali pulang

lihatlah dia mulai bernyanyi
coba merangkai mimpi
cinta yang dulu pergi
kini datang kembali

wajahmu mengingatku
dengan kekasihku dulu
wajahmu mengingatkan
dengan masa laluku

reff
kekasih yang dulu hilang
kini dia tlah kembali pulang
akan kubawa dia terbang
damai bersama bintang

kekasih yang dulu hilang
kini dia tlah kembali pulang
betapa senang kudendangkan
dan takkan ku lepaskan

wajahmu mengingatkanku
dengan kekasihku dulu
wajahmu mengingatkanku
dengan masa laluku

Lagu Kembali Pulang, Kangen Band

JEMOH sekam telu mulang mit Lampung, negeri asal Kangen Band seradu jak ngebaca novel ni Rosita Sihombing, Luka di Champs Elysees (Lingkar Pena Publishing House, Jakarta, 2008) sai jaoh-jaoh mit Paris, muloh luwot mit Lampung.

Muloh Luwot.

Friday, October 31, 2008

Bukaan CPNSD di Lampung

UNCUK ni bulan Oktober 2008. Bulan inji bela. Api aga rencaka? Guwai sa rutin riya. Kidang, induh aga seuncukan ni.

"4bng tlp khp n!e az da pendafttr an cpnsd skrg jg by k!ky." Kalimat SMS inji luar jak HP-ku pas kuurikko mulang jak sembahyang Jumat. Temon-temon kacau bahasa SMS inji. Pantas gawoh Pusat Bahasa ngeribok ngeranuh jama bahasa elektronik inji.

Repa aga makai bahasa Indonesia sai helau kik reno. Cadang-cadang bahasa Indonesia, ani tian.

Ya adulah, inji masalah bareh. Ani Kiky, Lampung nerima CPNSD (calon pegawai negeri sipil daerah). Pendaftaran 3-8 November 2008. Tiumuko di koran rani inji.

Ya, sekam telu musti mulang mit Lampung kik reno. Tahun ampai no, Ren mak turuk ngedaftar guru PNS. Tahun inji nyubai pai. Kintu nihan mangsa bagian. Kekalau.

Ya, rani Minggu (2/11) sekam mulang mit Lampung.

Tuesday, October 28, 2008

Ruwa...

"DUAA (ruwa)...," ani Aidil.

Adu ruwa rani Aidil di rani-rani ngilu ruwa lilin tiurikko. Adu ruwa rani listrik di lamban mati. Lain uleh ni mangsa gileran jak PLN. Kidang, lantai ruwa rang kos sekam konslet, mak dapok urik.

Ruwa, ani Aidil. Aidil nangon ulang tahun sai ke ruwa rani ini Selasa, 28 Oktober 2008.

Pak listrik mati, wai muneh macet, pagi-pagi (setemon ni kawasan muneh) sekam telu manak mit pasang. "Aga nyani sekunyit," ani.

Ingkah ngeni tetangga kebelah lamban, counter di bah, Mbak Widi, Mbak Tini, rik Epenk tian.

Selamat ultah, Aidil. Selamat Sumpah Pemuda muneh yu.

Wednesday, October 15, 2008

Kehurikan

induh

mak pasti

halok

nunggu

Monday, October 06, 2008

Belajar Sabar

HARA susah ni jadi jelma sabar. Jak risok ni, sadar mak sadar, emosi ngeledak mak dacok titahan.

Nyesol kak adu. Kidang, kejadian ngebekas katan. Pak lunik ya.

Ah... Kekalau mak sampai cadang ati.

Saturday, October 04, 2008

Mangi...

"DUNIA maya basa ni mangi," ani Benybee di ShoutMix.

Mangi. Jelma kelamonan basa ni mulang mit pekon masing-masing. Ingkah sekam goh sai mak mulang. Adu ruwa kali Buka sekam telu manak di Pangkalan Bun.

Ya, nangon mangi. Buka di Pangkalan Bun mangi muneh. Seradu jak tekebah Sembahyang Id di pepira rang ya adu. Mak ngedok acara khusus Buka.

Kik aga nutuk jelma ramik mit Pantai Kubu rik Pantai Teluk Bogam. Yah, paling rang wisata sai ramik.

Injuk tahun ampai no, sai Sembayang Id nyak gawoh. Aidil rik mama ni di lamban riya. Mulang jak sembayang, singgah mit api ni Eko, laju mit lamban ni Mas Aji, terakhir reramikan mit lamban ni Pak Rasyid. Pak Rasyid ngeguwaiko open house Buka.

Mulang ni mutar-mutar Pangkalan Bun. Ampai goh sampai di lamban, terai ratong.


Rani keruwa Buka. Silaturrahmi mit lamban ni Abang Heryamin tian di Kelurahan Baru. Inggoman ni adu mit pasar bedagang. Di lamban ingkah ya rik telu anak-anak ni.

Wah...

Adu. Dibi ni nyak adu ngantor. Jemoh koran terbit.

Kesimpulan ni: mangi!

Friday, October 03, 2008

Brillante Award

INDUH, mak pandai-pandai, Sigid ngeni nyak Brillante Award semakkung Buka (lengkap ni di ija).

Ya, kuakuk riya. Gambar ni mehelau. Nerima nihan.

Kidang syarat ni, nyak musti ngelajuko Brillante Award ini jama pitu blog sai tinomineko.

Inji pitu jelma sia kupileh sai kupiker pantas nerima Brillante Award.

@ Abah Oryza

@ Denny Ardiansyah

@ Eko Sugiarto

@ Dian Hartati

@ Fina Sato

@ Hudan Nur

@ Simon S. Hutagalung

Tian sanak ngurai sai hebat. Sukses pakai ni tian.

Monday, September 29, 2008

Buak Buka*


Pebangik-bangik buak Buka
Tikanik barong sanak-muari
Jejama ram ngetokko dusa
Nyin helau ngeliak pudak ni

: Jejama ram semahapan yu!

* kik aga nyecas, klik goh gambar ni nyin mebalak

Sunday, September 28, 2008

Mak Ngedok Liyom Mani Mejereh Mebugu Malas Muneh

RUPA ni injuk nasib ni dana beras untuk keluarga miskin (raskin), bantuan langsung tunai (BLT) rik Inpres Desa Tertinggal (IDT), adu saka rumpok nyepok jekat kak redik-redik Buka Balak (Hari Raya Idul Fitri).

Tanno ji mak perlu liyom-liyom ngaku mejereh. Soal ni ngaku mebatin, mak kebagian IDT, raskin, IDT atawa kik tanno musim ni... jakat.

Maka ni kik wat lamban sai bakal aga bagi-bagi jekat, lamon jelma sai nunggu kanjak subuh. Kak adu mulai seageh jekat sa, segaga. Syukor-syukor nihan mak terjadi injuk di Pasuruan sai nganik jelma 21 mak lagi.

Nunggu zakat tibagiko. (BORNEO/TIRA PUSPITASARI)

Fiil? Mak ngedok rega ni badan kik masalah duit atawa barang.

Kanik akal juga!

Dang injuk ulun Lampung, ngilu ya gengsi, liyomlah, acak maling nyik mak kepandaian. Ya, fiil pesenggiri sai salah.

Setemon ni, helau muneh ram wat fiil pesenggiri nyin ram rerasa. Mak buyun ngilu-ngilu dana (jekat, BLT, IDT, atawa api gawoh). Lain hak pema-pema ngakuk barang ni rumpok. Kidang, repa cara ni nyim ram mebatin. Kik mebatin masa kik ngilu-ngilu jekat.

Nyin mebatin ya beguwai senemon. Mak kasi memalasan.

Jak tumbai nangon jak helau ni ngeni kik jak ngilu. Culuk di atas, lain culuk di bah.

Kidang, realitas sosial jelma keramikan? Ah, ram mak ngedok liyom lagi mani mejereh mebugu malas muneh.

Friday, September 26, 2008

Buka Serebok Lagi...

BUKA serebok lagi. Adu 50 jelma mak lagi waktu aga mulang delom telu rani terakher, kanjak seminggu semakkung Hari Raya Idul Fitri. Tian mak lagi uleh ni kecelakaan mubil, motor, rik kapal di renglaya.

Sekura (Foto: Eka Fendiaspara, ku akuk jak ija)

Buka serebok lagi. Mak ni ruwa sanak sai maseh balita (bah lima tahun) ditinjuk Satpol PP mani kepandaian ngejual Mansion House, inoman beakohol. Kajong ni adu mena lijung induh mit dipa.

Buka serebok lagi. Sai batin tambah gering ngetok-tokko duit. Sai jereh tatap riya susah. Korupsi telaju riya. Maling-maling tambah rajin. Lamon jelma mak rabai ga jama dusa.

Buka serebok lagi. Hara lamon ni ironi kehurikan di negeri inji.

Thursday, September 25, 2008

Ultra Milk, Astaga Naga....

ASTAGA naga. Susu Ultra tekuruk di daftar kanikan sai bahaya mani wat kandungan melamin. Wat unsur ni sai tiratongko jak China.

Pedahal nyak rik Ren risok ngebeli rik nganik ni.

Waduh... kekalau mak bahaya jama sekam. Kekalau jadi ubatlah. Kidang, tokko kik meli luwot.

Nyak mak pandai kik susu inji kanikan impor. Penyanaku sanian delom negeri.

Nangon musti pestiti kik belanja. Di ija, Pangkalan Bun atawa Kalimantan umum ni lamon kanikan rik barang impor, utama ni jak Malaysia.

Pedahal pepira waktu sai radu semakkung ribut-ribut kanikan sai bebahaya jak China, ram ngehirukko banjer kanikan jak Malaysia.

Lain hak uleh ni menyuwoh jama Malaysia (kebetulan waktu seno lagi kontroversi soal lagu Rasa Sayange, reog, rik angklung sai diklaim Malaysia budaya ni tian), kidang kanikan impor jak Malaysia no mak helau pakai kesehatan.

Sai lagi, lamon kanikan sai mak makai zat pewarna alami. Maka ni, musti pestiti nihan.

Saturday, September 20, 2008

Aneh! Caleg kok Mangsa Dana BLT

INJI judul berita HL Halaman Kotawaringin Barat Borneonews rani inji (Sabtu, 20/9).

Ya reno do. Hasil verifikasi rumah tangga sasaran (RTS) pakai nerima bantuan langsung tunai (BLT) ngawur.

Contoh ni di Pekon Teluk Bogam, Kecamatan Kumai, Kobar. Telu jelma RTS sai mebatin jadi sai mangsa BLT. Malah sai di hantara ni calon legislatif (caleg) jak sai partai politik..

"Masa wat caleg jadi jelma sai nerima BLT. Kik mejereh dang jadi caleg geh," ani jelma sai mak aga tiucakko gelar ni.

Monday, September 15, 2008

Aidil Pintar Rajin Sekula (Sai Bareh Libur)

SEKULA di Kotawaringin Barat libur semasa Ramadan rik tilapok kak Buka. Sebagai genti ni sekula ngeguwaiko kegiatan keagamaan injuk pesantren kilat (sanlat) rik sanak sekula belajar tenggalan di lamban.

Seno keputusan ni Dinas Pendidikan Kotawaringin Barat.

Jadido, 40 rani sanak sekula libur.

Otonomi daerah! Setiap daerah bida-bida.

Kik aku, api guwai ngeliburko sanak sekula. Pangkalan Bun sai nangon mangi tambah angi. Mak ngedok sanak sai makai seragam mit rik mulang sekula.

Induh kik sai bareh, sai jelas paling riyang uleh ni sanak sekula libur malah Aidil.

Unggal rani Aidil bebas 'sekula' di SDN 1 Sidorejo rik SDN 4 Sidorejo sai redik lamban.

"Sukula, Dil...," aku.

Maka, unggal rani sekam ruwa main di lapangan sekula, lapah di koridor ni sekula, atau sesekali Aidil ngetuk-ngetuk rangok ni kelas sai tekunci rik nyuba ngebuka ni.

Sunyin ni gedung tikelilingi. Main kelereng-kelerengan makai wah ni kayu sai gugor. Ngakuk pampang ni kayu pakai ngawil-ngawilan. Ngemainko wah ni mengkudu. Ngunduh wah ni ceri... lamon di tengebah ni sekula.

Kik sai bareh libur, Aidil malah rajin sekula.

Di lamban, Aidil ngilu pen rik kertas ngilu tigambarko mubil kik mak nyoret-nyerot kertas. Kekala seprai juga kena coret. Kik makkung cukup, koran, majalah, rik sesai muneh jadi sasaran oretan ni Aidil.

Aidil tanno gering ngeliak gambar motor rik mubil, sebareh jak sanak lunik. Di koran, majalah, atawa tivi.

Jak pagi mak aga mengan. Nutuk posa. Ampai aga nganik tengah rani kak jak mulang 'sekula'.

Sunday, September 07, 2008

Wawancara (Narsis!)

AR Tadilaga (Kelas III SDN 2 Sidorejo, Kobar) rik Dhiya Zahra (Kelas 2 SDN 7 Mendawai) ngwawancai nyak di Kantor Borneonews, Sabtu (6/9).


Hasil ni timuat di Rubrik Media Anak Borneonews, Minggu (7/9). Selengkap ni di ija.

Narsis!

Thursday, September 04, 2008

Oedin Gubernur Lampung (Luwot)

OEDIN (Sjachroedin Z.P.) injuk ni hamper pasti jadi Gubernur Lampung luwot.

Hitungan geluk (quick qount) Lembaga Survei Indonesia nunjukko pasangan Sjachroedin Z.P.-Joko Umar Said (PDIP rik pepira partai lunik) menang telak 42% delom pemilehan Guburnur Lampung sai ditutuk pitu pasang calon, nambi (3/9).

Sjahroedin Z.P. (ANTARA/TRIONO SUBAGYO)

Tian ruwa ngalahko Zulkifli Anwar-Akhmadi (PKS-PAN) 15,45%; Muhajir Utomo-Andi Arief (independen) 3,42%; Alzier Dianis Thabrani-Bambang Sudibyo (Partai Golkar, PKB, rik PPP) 19,83%; Oemarson-Thomas Aziz Riska (Koalisi Lampung Bersatu Peduli Demokrasi dan Pembangunan) 5,65%; Andy Achmad Sampurna Jaya-Suparjo (Partai Demokrat-PBR) 10,10%; rik Sofyan Jacoeb-Bambang Waluyo Utomo (independen) 2,30%.

Lamon sai yakin Oedin bakal menang. Kidang, termasuk nyak, mak nyangka ya menang langsung sai putaran gawoh.

Tanno, tinggal nunggu pengesahan jak KPU Lampung goh.

Hebat...

Tuesday, September 02, 2008

Posa Sekam Telu

RANI keruwa posa.

Sekam telu manak sekitar pukul 10.00 WIB aga midor sambil nyepok-nyepok. Nyak rik Aidil adu mena regah (lamban di lantai ruwa). Ren lagi ngeraduko guwai ngerangko kawai.


Terai regah. Batal.

Kedugok, nyak pedom. Aidil main riya.

Sekitar jam 1. Sekam telu regah luwot. Nyepok minyak telon, entrostop, kaset VCD, sani ni gulai, rik pembukaan.

Ampai mansa minyak telon, entrostop, rik kaset VCD, terai ratong luwot.

Main-main jama Aidil.

Pasar Wadai Ramadan di Lapangan Tugu, Pangkalan Bun. (BORNEO/TIRA PUSPITASARI)

Mak ketahan kedugok, pedom luwot. Aidil maseh main.

Diminjakko Ren. Adu jam telu, ani.

Mata maseh mebiak. Kidang musti ngantor.

Semakkung ilung kantor, sekam telu nyepok gulai rik pembukaan pai.

Mulang jak kantor adu aga buka.

Seranian Aidil mak pedom. Main riya.

Sunday, August 31, 2008

Nangon Lamon Alasan kik Malas

BINGI inji, Minggu (31/8), muwak ni sembahyang Teraweh. Muwak ni muneh sawor. Jemoh posa.

PAWAI OBOR: Ratusan sanak utusan pepira surau pawai obor nyambut bulan Ramadan, Sabtu (30/8) bingi. Pawai diinisiasi takmir Masjid Istiqomah Madurejo, Pangkalan Bun timulai jak Kelurahan Madurejo dan berakher di halaman Kantor Kelurahan Madurejo. (BORNEO/TIRA PUSPITASARI)

Mama ni Aidil dilamban riya. Aidil mak dapot titinggalko tenggalan.

Kik aga turuk Teraweh, wat Musola Mujahidin di hadap ni kantor nihan. Wat muneh Mesjid Mujahidin, redik ireh jama kantor.

Kidang, guwai melamon. Rik, kurasa (mak kuliakko) musola latap nihan. Inji biasa ni reno. Mak kebagian rang lagi di musola.

Hehehee... ah, nangon lamon alasan kik malas.

Thursday, August 28, 2008

Hahaa... Tokoh

SERANI semakkung acara, Rabu (19/8), nyak mangsa undangan ni.

"Nyak mak dapok ratong. Mak ngedok ongkos...," aku jama Hera, Sekretaris Pemred Lampung Post sai jadi Panitia Peluncuran Buku 100 Tokoh Terkemuka Lampung.

Acara ni di Graha Wangsa, Bandar Lampung, Kemis (20/8) bingi.

Di bingi ni sekitar jam siwa ratong SMS jak Ila: "Weh, 100 tokoh tiurau cakak panggung. Kak Jul mana?"

Ya, adu kutelepon gawoh Illa nanya repa acara ni. Ampai nihan adu, ani.

Klik dija kik aga ngebaca berita ni.

Wat pepira sms rik buku tamu di blog muneh ngucakko selamat... jadi tokoh Lampung.

Hahaa... tokoh.

Jadi?

Tuesday, August 26, 2008

Ratong Luwot

MAK kerasa, bulan Ramadan ratong luwot.

Mulai Senin, 1 September 2008 barong jama 1 Ramadan 1429 Hijriah.

Sekam telu manak jak Pangkalan Bun sai betik ngucakko:

Marhaban ya Ramadan. Selamat ngejalani ibadah posa. Kekalau ram tekuruk sai mansa hikmah posa.

Posa yu. Dang kik bebuhungan pak ingkah Allah Swt sai pandai ram posa api mawat.

Monday, August 18, 2008

Hara Canggih ni...

CUCU kesai ni Presiden Susilo Bambang Yudhoyono, anak ni Agus Yudhoyono rik Annisa Pohan sai dikeni gelar Almira Tunggadewi Yudhoyono laher tepat nihan jama Rani Kemerdekaan Republik Indonesia, 17 Agustus 2008.

Foto: Setpres-Dudi Anung

Temon-temon rani besejarah jama keluarga Yudhoyono rik tantu riya sunyin ni jelma Indonesia.

Kidang... wat sai ngeganjal. Aira laher liwat operasi caesar.

Hara canggih ni teknologi. Laher goh dapok mileh waktu ni. Reti ni sejarah dapok muneh tiator.

Friday, August 15, 2008

Jadi, Reno... Ngebani

INDUH mengapi Pak Ade nelpon nyak, Rebu (18/8) bingi. Cawa-cawa blog rik ngilu kesanian blog. Kadu ni nanya-nanya anak-kajong rik Borneonews.

Kupiker biasa riya.

Eh, jemoh ni Eko cawa Pak Saur jak nelpon ya. Ngucakko aga wat penyegaran. Pak Ade jadi Pemred Borneonews. Barong jama Denny sai muloh mit Pangkalan Bun luwot.

Nyak, muloh mit Lampung Post, adu jak Buka. Eko nyusul, muloh mit Media Indonesia, nanti sekitar Januari mani wat sanak sekula.

Jadi, reno... ngebani Pak Ade nelpon.

Thursday, August 07, 2008

Motor ni Kebelah Lamban Kena Maling

JENO pagi, nyak mangsa cerita motor ni Heri, kebelah lamban di barakan lebon kena akuk maling.

Kik cerita ni Atun, kajong ni Heri, motor Yamaha Jupiter no kena maling sekitar pukul pitu dibingi nambi (Rebu, 6/8).

Wah, balak ni kejutku. Soal ni nambi waktu nyak aga berangkat mit kantor motor ni maseh wat. Reti ni motor no kena akuk seradu nyak berangkat.

Ani Ren, dang-dang maling ngincar motor ni Aidil sai baru. (Hehehee... tepaksa buka resia sekam telu ampai meli motor Vario tanggal 10 Juli ampai no).

Adu saka aman-aman riya. Mak wat kemalingan di isan. E, pas sekam wat motor, motor ni kebelah lamban diakuk maling.

Hara balak ni sesol kik motor sekam sai kena akuk.

Tuesday, August 05, 2008

Ramik-Ramik Nulak Dewi Persik

DI pepira tuku Pangkalan Bun wat baliho sai isi ni rencaka konser pedangdut Dewi Persik di Stadion Sampuraga, Pangkalan Bun, 10 Agustus 2008 hadap.


Setemon ni mak api-api. Kik jadi, dapok jadi hiburan asyik.

Eh... pepira ormas di Kotawaringin Barat -- injuk Majelis Ulama Indonesia (MUI), Muhammadiyah, Nahdlatul Ulama, rik Partai Keadilan Sejahtera (PKS) -- ramik-ramik nulak.

Lamon sai nulak. Lamon muneh sai kecewa.

Setemon ni mak ngedok hubungan ni pentas ni Dewi Persik jama moral umat.

Kidang, kik cawa reno jelas lamon muneh sai nuding sekuler.

Ah...

Sunday, August 03, 2008

Ali Gusman-Rika Rahimah Nyusul sai Bareh

NYUSUL sai bareh, Koordinator Artistik Borneonews Ali Gusman ngakheri masa meranai ni. Ya belamban jama muli sang kota jama ya, Pangkalan Bun, Rika Rahimah. Akad nikah ni di Pangkalan Bun, Sabtu, 2 Agustus 2008.

Selamat yu. Kekalau bahagia antak tuha. Jadi keluarga sakinah mawaddah wa rahmah. Amien.

Wednesday, July 30, 2008

Empek-Empek di Bundaran Pancasila

JENO (30/7) libur Rani Isra' Mikraj. Injuk ayuk ni, sekam libur mena serani semakkung ni. Nyak libur nambi.

Yah, kesempatan ngusung Aidil rik mama ni midor setemon ni. Aidil nangon terok lapah terus.

Pagi-pagi kung kuk imul, aga langsung midor. Susah nihan ngeni ni pandai, mandi pai, mengan pai. Ngindang kuruk angin.

Nyak imul juga ditunggu ni.

Kekala lagi, nyak mejong-mejong atawa pepedoman ya narik-narik ngayun nyak minjak, ganti celana, makai jaket... ngakuk kunci ni motor rik nunjukko helm.

Maksud ni ngurau midor. Bem... beemmm... beemmm...

Setemon ni nambi, jak mutar-mutar di Pangkalan Bun, nyak aga ngusung tian ruwa mama ni mit Pantai Kubu di Kumai. Kidang nyak lupa renglaya ni.

"Aga mit dipa?" ani mama ni.

Nyak mak cawa kik salah renglaya. Kuucakko riya, "Ya memidoran ngetes motor."

Mak pehalu Pantai Kubu. Induh kik makkung sampai, ya adulah, mutar muloh mulang mit Pangkalan Bun.

Eh, ... dibi ni Aidil ngurau lapah luwot.

"Payudo. Ram mit Bundaran Pancasila. Ngeliak repa keliak ni kak dibingi. Sekalian ram nyecas Mpek-mpek Palembang," aku.

Jeno di rani Ren ngeliak wat warung empek-empek. Nangon adu saka nyepok-nyepok kaniak'an sai imbau-imbau Lampung injuk somay. Kik mak ngedok, batagor sai agak mirip.

Akher ni, petungga juga empek-empek.

Jadilah, sekam telu nyicip empek-empek Rumah Makan Sari Rasa Jalan Iskandar, Bundaran Pancasila. Nyak mesan lenjer. Ren nyecas lenggang.

Aidil makkung pandai nganik empek-empek sai kenyil-kenyil. Kidang ya betah. Mutar-mutar di warung. Apalagi waktu wat sanak 13 bulanan, ratong barong mak rik andung ni.

"Mulang Dil, adu aga Magrib."

Surok ireh Aidil tiurau mulang.

Sunday, July 27, 2008

Bahasa Kekuasaan

LUAR (luwot!) bahasa kekuasaan: "... Nyak wat wewenang."

Kik adu cawa inji sai luar, reti ni mak ngedok diskusi. Argumen mak perlu. Tergantung sai wat wewenang.

Ya, adu do kik reno.

(Kejadian rani ini, Minggu, 27/7 pukul 22.30 WIB. Taganko nyak gawoh sai ngingok ni)

Monday, July 21, 2008

Angi ni Sastra(wan) di Kalteng

HAMPER ruwa tahun nyak tinggal di Pangkalan Bun, Kalimantan Tengah (Kalteng). Ingkah sekali mit Palangkaraya, ibu kota provinsi inji waktu Kalteng ngerayako ulang tahun ni ke-51 (Kalteng laher 23 Mei 1957).

TARI POTONG PANTAN. Ruwa meranai ngusung tari makai pakaian khas suku Dayak jama hiasan ulu jak bulu ni burung juwe di atas bebatuan Way Teweh (anak ni Way Barito) Kecamatan Teweh Timur, Kabupaten Barito Utara, Kalteng Jumat, 31 Juli 2007. Tari Potong Pantan atawa Bahalai sai dilengkapi mandau (senjara khas Dayak) inji biasa ni pakai nyambut tamu sai ratong. (ANTARA/KASRIADI)

Nyak santor wat minat jama segala hal sai wat hubungan ni jama sastra, seni, rik budaya. Kidang, selama nyak tinggal di Pangkalan Bun, hara jarangku petungga -- minimal nengi atawa ngebaca kegiatan sastra, seni, rik budaya di Pangkalan Bun atawa malahan Provinsi Kalimantan Tengah.

(Pengecualian soal musik injuk di Pangkalan Bun lumayan risok juga band asal Jawa konser rik seni-budaya tradisional).

Waktu mit Palangkaraya hara terokku petungga sastrawan/seniman Kalteng. Kidang, "Mak ngedok," ani wartawan Borneonews di Palangkaraya Heri Fauzi.

TARI DAYAK. Pepira sanak makai kawai suku Dayak ngusung tari kolosal pesta ngegetas waktu jembore wartawan regional Kalimantan di Kabupaten Barito Utara, Kalimantan Tengah, Kamis, 5 Juni 2008. (ANTARA/KASRIADI)

Rang nongkrong ni seniman? Mak wat muneh. Taman Budaya makkung tibangun. Dewan Kesenian makkung tibentuk.

Ah, mati angi ni Kalteng jak sastra(wan), seni(man), rik budaya(wan).

Rupa ni tinukanku mak salah.

Berita di bah inji kuterjemahko jak bahasa Indonesia jak Borneonews, Senin, 21 Juli 2008:

Lunik Apresiasi, Sastra di Kaltang Payah Ngembang

PALANGKARAYA (Borneo): Apresiasi ulun sai merebah jama sastra di Provinsi Kalimantan Tengah nyani daerah inji cutik becong ngelaherko sastrawan rik karya sastra.

"Kalteng ampai ngedok telu sastrawan sai dikenal jelma ramik. Inji mani karya sastra nangon mak pira diteroki jelma," ani Kepala Balai Bahasa Kalteng Puji Santoso di Palangkaraya, Sabtu (20/7).

Ani Puji, kurang ni minat jelma jama karya sastra tidasari pemikeran karya sastra mak dapok ngehasilko nilai ekonomi sai diperluko jelma serani-rani.

Lamon ni jelma Kalteng maseh sai mejereh rik nyebar di lamon daerah lom nyani sastra susah ngembang di daerah inji.

Balai Bahasa tenggalan, cawa ni Puji, adu beusaha ngegairahko dunia sastra di ija, kipak sampai tanno penerimaan ni makkung sehelau sai tikehagako.

Guwai sayembara nulis cerita buntak (cerbun) rik guwai sastra bareh, cutik becong sai nutuk. Delom guwai sayembara nulis cerbun misal ni, ingkah 28 jelma sai turuk rik sayembara nulis cerita rakyat sai ingkah ruwa jelma sai nutuk.

Puji ngewada, kembang ni karya sastra di Kalteng muneh kurang mangsa dukungan jak media massa.

"Media massa musti ni turuk betanggung jawab ngelestariko sastra. Cara ni nyediako ruang khusus atawa kolom sastra. Tanno ji ampai pepira media riya sai adu ngeni apresiasi pakai inji," ani.

Hamsad Rangkuti (tiakuk jak ija)

Kadu ni, sastrawan Hamsad Rangkuti sai hadir delom guwai Temu Sastra se-Kalteng ngaku wat lamon halangan delom ngembangko karya sastra di daerah.

Lapang ni jelma lamon sai cutik pakai ngemuat karya sastra injuk puisi, cerpen, rik bareh ni di media massa dinilai ni cukup wat pengaruh ni jama ngembang ni dunia sastra injuk di Kalteng.

"Media massa musti ngeni apresiasi sai cukup pakai sastrawan rik karya ni. Nyin ngembang di daerah, karya sastra jak helau ni kik tisesuaiko jama kondisi ni rang ni jelma di isan," ani sastrawan sai nerima pepira penghargaan nasional seno.


Repa kabar ni sastra di Borneonews? Hehehee....

Thursday, July 17, 2008

Mehanjak Ireh Ngeliak Iwa

NYAK rik Aidil nutuk mengan di rani di Rumah Makan rik Rang Ngawil Ruhama, Pangkalan Bun, nambi (Rebu, 16/7). Mama ni mak aga. Ulu ni lagi mesakik.








Pelaksana Harian Pemimpin Perusahaan Borneonews Aji Sukaryo (Mas Aji) sai ngurau. Ya ulang tahun.

Aidil mehanjak ireh ngeliak iwa mas rik jelma ramik. Mengan ni juga pintar.

Inji foto-foto ni Aidil sai diakuk Pujo Wicaksono waktu di udi.

Tuesday, July 15, 2008

Tutita Tutiti...

TUTITA tutiti... tutiti tutita...

Muwak ni nyak mak pandai. Induh api cawa ni Aidil. Nangon pepira bulan inji Aidil risok cawa-cawa.

Adu melamon juga kata sai dapok diucakko ni secara benor. Injuk, ini, itu, jatuh, tidur, mama, ayah, rik niru bunyi-bunyian.

Kak bang (azan), Aidil paseh nihan cawa: Allah...

Kidang pepira rani ji ya ngelapalko papa, bapa, tata, tuhtita tutiti. Sai terakhir, tutita tutiti... rupa ni modifikasi jak lagu "Jatuh Cinta Lagi (Playboy)" ni Matta Band sai didengi ni:

jatuh cinta lagi
aku jatuh cinta lagi

tutita tutiti

Ooo... nyanyi ya Dil?