Labels

Monday, June 30, 2008

Tinggal Buya ni

TANNO nyak -- sekam telu manak -- basa ni kebuyaan jak lapah jawoh.

12 Juni pas rani ulang tahunku, sekam berangkat cakak Linus ilung Jakarta. Jak ija langsung mit Bandung. 14 Juni nerima Hadiah Sastera Rancage di Aula Unpad.

Penyair Y Wibowo rik Ferdinand Indiarto, kantek jak Lampung ratong muneh pagi ni semakkung berangkat mit Unpad.

Sesuai kesepakatan, nyak sai ngeni sambutan ngewakili sai nerima Rancage tahun ini. Api sai kuucakko waktu maju mit hadap, induh nyak lupa. Inti ni, hara balak ni beterima ni kebudayaan Lampung (kuruk muneh Sunda, Jawa, rik Bali) jama Yayasan Kebudayaan Rancage sai digagas Ajib Rosidi, sai mak taru ngeniko Hadiah Sastra Rancage kanjak 1989.

Mani Bowo, ampai sampai Sabtu pagi. Sekam ampai mulang mit Lampung Minggu dibingi. Ampai sampai di Bandar Lampung Senin (16/6) pagi.

Mulang mit Liwa, Lampung Barat, Jumat (20/6). Mak dapok mesaka mani wat acara luwot di Bandar Lampung, Minggu (22/6) pagi sekam muloh mit Karang.

Nyak di Acara Syukuran Rancage di Lampung Post, Selasa (24/6). (Foto Erick di blog ni)

Selasa (24/6) bingi, wat acara Syukuran atas Diterima ni Hadiah Sastra Lampung Rancage 2008 di Aula Harian Lampung Post. (Hasil diskusi titulis delom ruwa tulisan di Apresiasi di ija rik inji).

Kasian Aidil. Di bis jak Jakarta ilung Bandung ya mutah. Cakak Damri jak Bandung ilung Bandar Lampung mutah. Mulang-mit Liwa mutah muneh.

Kidang, waktu rani Kemis pagi tiantakko mit dokter langganan saka ni Aidil di Way Halim, dr Barudin, ani Aidil mak api-api. Ingkah mebuya gawoh cutik.

Di Karang rik di Liwa Aidil riyang ireh. Lamon pori. Jadi, meramik. Nangon kegeringan ni dikelilingi sanak lamon.

Kemis (26/6) di rani sekam adu sampai di Pangkalan Bun. Minok pai sebingi di Jakarta sambil ngakuk tiket pesawat jama Ethie di Media Indonesia.

Wednesday, June 11, 2008

Mulang Pekon mit Lampung

JEMOH, Kemis, 12 Juni 2008. Nyak ulang tahun setemon ni. Kidang, sekam telu malah lapah. Nyak cuti antak 25 Juni 2008.

Sekitar ruwa minggu. Berangkat jak Pangkalan Bun Kemis pukul 14.30 WIB ilung Jakarta langsung mit Bandung.

Sabtu, 14 Juni 2008 nerima Hadiah Sastera Rancage di Aula Sanusi Hardjadinata Universitas Padjadjaran (Unpad) Jl Dipati Ukur 35, Bandung.

Ampai laju mit Bandar Lampung rik (insya Allah) mulang pekon mit Liwa.

Monday, June 09, 2008

Adu Mangsa Tiket

TIKET pesawat Linus pakai sekam telu manak kambor ilung Jakarta adu dikeniko Mbak Memey jeno. Tanggal 12 Juni 2008.

Kidang, Aidil kanjak nambi mepanas badan ini. Kidang panas ni regah-cakak. Jeno diantakko Roni pakai mubil kantor bubat mit Dokter Agus. Rani terai terus jak pagi.

Ani dokter, halok kena Malaria. Temon nihan pas tiperiksa rah ni. Positif. Aidil kena Malaria.

Kidang, jak dokter Aidil injuk langsung munyai. Ruyuh injuk mak dirasa ni.

Ya, kekalau geluk munyai ya Dil. Ram aga mulang mit Lampung. Midor-midor mit Bandung muneh. Kadu ni laju mit Liwa.

Petungga Oma, Opa, Utie, Mami, Papi, Datuk, Andung, Abid, Ulfa, adek....

"He ehh..," ani Aidil cunggok-cunggok.

Saturday, June 07, 2008

Mak Ngedok Angkot di Ija

RIBUT-RIBUT rega BBM cakak, rega ni barang-barang cakak, kadu ni supir-supir nuntut ngilu ongkos cakak muneh.

Di Pangkalan Bun biasa gawoh. BBM cakak, rega barang cakak, rik ongkos angkot cakak, sunyin ni pema-pema riya.

Supir angkot tinggal nelpelko selebaran di kaca rangok ni: Ongkos umum Rp2.500 Pelajar Rp1.500. Cakak jak Rp2.000 rik Rp1.000.

Mak ngedok demo, mak ngedok protes, mak ngedok pembahasan DPRD rik Pemkab Kobar, mak ngedok SK Bupati.

Heran?

"Dipa wat angkot di Pangkalan Bun. Sunyin ni adu ngeredik (motor)," ani Ali Gusman.

Setemon ni angkot wat. Kidang cutik. Penumpang ni cutik muneh.

Nyak goh risok jadi penumpang angkot tenggalanan kak aga berangkat mit kantor, kik mak lapah cukut.

Sai lamon ojek.

Sai repot, kik mak ngedok kendaraan kak meruyuh aga mit rumah sakit. Angkot jarang-jarang mit dudi. Kadu ni kik mulang, jelas mak ngedok angkot. Kik aga pehalu angkot musti lapah pai. Kidang, mesaka muneh nunggu angkot mak liwat-liwat.

Angkot kalah ulih ni ojek.

Thursday, June 05, 2008

Adipura Keruwa pakai Pangkalan Bun

PANGKALAN Bun mangsa Adipura delom kategori kota lunik sai keruwa kali ni.




Piala Adipura dikeniko diterima langsung ulih ni Bupati Kotawaringin Barat Ujang Iskandar di Istana Negara, Jakarta, Kemis (5/6).

Inji foto-foto Pangkalan Bun ni wartawan Borneonews Rahmad Minarto.

Wednesday, June 04, 2008

Adu Tiram Ireh

RANI inji sekam telu manak musti ni adu berangkat mulang. Jemoh pagi adu nyampai di Lampung. Kidang, injuk posting sai mena, ram ingkah berencaka, Tuhan sai nantuko ni....

Jan pering pakai nyebak (ngakuk memis jak anau) aga nyani gula suluh di Seranggas, Liwa. (Foto tiakuk jak ija)

Jadwal berubah. Berangkat jak Pangkalan Bun, Kemis (12/6) langsung mit Bandung. Sabtu (14/6) jam 09.00-12.00 WIB ni nerima Hadiah Sastera Rancage di Aula Univesitas Padjadjaran Bandung.

Ampai laju mit Lampung.

Adu pepira kali titunda-tunda. Kekalau mak berubah lagi.

Adu tiram ireh jama Lampung.

Monday, June 02, 2008

Ruwa Kantek Mit (Luwot)

KEMIS (29/5) dibingi. Eko adu berangkat ilung Jawa. Andri Saputra ngilu izin mulang mena mani makkung fit nihan jak ruyuh tipes ni. "Nyak mak kuat lagi," ani.

Andri Saputra

"Yu," timbalku.

Nyak mak miker api-api. Ya kik nangon meruyuh istirat pai.


Mak saka Andri sekitar pukul 19.00 WIB nge-SMS ngucakko badan ni lemas rik ulu ni pudor. "Injuk ni makkung munyai nihan." Kik dapok, ani, ya ngilu izin mak kuruk beguai ruwa minggu.

Kujawab sms ni: "Mak api-api. Kiluko surat keterangan dokter." Soal ni ruwa minggu lumayan saka.

"Ok. Kuusahako jemoh," jawab ni.

Adu. Kupiker mak ngedok masalah.

FOTO BARONG: Semakkung Pemred Abdul Kohar titarik mit MI luwot.

Jemoh ni, Jumat (30/5) semakkung sembayang Jumat, Andri ratong mit lamban. Aga ngeniko surat dokter, ani. Izin dokter epak rani.

Hh, Andri ngeniko surat bareh.

"Api inji?"

"Surat pengunduran diri."

Wah, serius inji. Kuurau Andri kuruk pai.

Temon kudo? Repa muneh, mak ngedok angin mak ngedok asok, dadakan Andri ngeni surat pengunduran diri.

"Rencaka inji nangon adu saka... dst," cerita ni Andri.

Ya, adu api boleh buat.

Secara pribadi, jelas nyak kecewa. Kidang, repa aga cawa kik adu reno.

Surat dokter kuulohko mit Andri. Surat ni Andri kuusung mit kantor. Sai lagi kantek nyepok renglaya bareh.

Beni Ibrahim rik Budi Surakhmat.

Di kantor, malah nyak mangsa informasi, Budi Surakhmat adu muneh ngucakko (kemungkinan surat pengunduran diri muneh) aga mundur jak Borneonews.

Alhasil, ruwa rik lebon luwot jak Borneonews.

Hal biasa? Nyak mak pandai. Bagiku, bepisah tetap ninggalko rasa sakik. Api lagi kik setemon ni (ingkah delom pikeranku) maseh dapok dilulah.

Sunday, June 01, 2008

Bak ni Eko Mak Lagi


Innalilahi wa inna ilaihi rajiun

Prof. Suko Rahardjo, S.H.,
(bak ni Eko Rahmawanto,
Redaktur Pelaksana Harian Umum Borneonews)

mak lagi di Rumah Sakit Umum Daerah (RSUD) Gambiran, Kediri, Jawa Timur
Minggu, 1 Juni 2008 pukul 00.15 WIB.

Kekalau arwah almarhum mangsa rang sai helau di sisi Ni.
Rik, keluarga sai ditinggalko ni dikeni kekuatan rik kesabaran ngehadapi cubaan.
Amien.