Monday, January 22, 2018

22 Januari

RANI inji, Senin, 22 Januari 2018. Nyak nyepok-nyepok api peristiwa penting sai neram kenang atawa neram rayako. Paling mawat jadi ingokan jelma ramik se-Lampung atawa se-Indonesia.
Injukni mak ngedok.

Kidang, induh bang Iwan Fals nyani lagu sai judulni "22 Januari".



Lagu inji mehelau rik mebangik nengini. Jadi, kuterjemahko mit bahasa Lampung.

22 Januari 
- Iwan Fals

22 Januari neram bujanji
Nyuba peperda ngereti api sai di lom ati
22 Januari mak nenggalanan
Nyak mekantek belis sai uyun ati
Lapah bebarongan
Mak nihan wat tujuan
Ngebelah bingi
Mingkop sai santor ratong
Kubenikok mak tekas
Kupenok kimutmu
jama tuntungni mata
Sai ruwani buta
Kadu kusesiahko sang baris cawa
Lebon kehaga... serebok lagi terai
ruwa buku teori diinjamko jama nyak
Kedol mak beherbuk kubaca santor
epak lembah fotomu delom kabat kayu
kuliak rik kujaga sampai neram meleju

Kik aga nengi laguni, klik goh videoni:
>> 22 Januari - Iwan Fals

Monday, January 15, 2018

Neng Geulis versi Lampung

INJI cerita jaman tumbai. Sekam sanak-sanak se-Pasar -- maksudni Pasar Liwa -- sai semerimpak risok nyeluwor mit dipa-dipa kak dibingi. Apalagi kik wat tuntunan injuk pelem di Lapangan redik lamban, hiburan Agustusan, atau nyambai kak wat sai nayuh.

Kota Liwa, Lampung Barat.
Di pekon sekam wat grup orkes ngetop tahun 1980-an. Sekali waktu wat acara Karang Taruna jak Way Mengaku sai nyiwo grup orkes jak pekon sekam.

Pembina Karang Taruna Way Mengaku ngeni sambutan. "... Payu, neram beriyang musenang barong Orkes Manaa... bisa," ani.

Na repa kidah. Unyinni sai ratong disan ngekak sai ngekakni di sanini. Orkes Manabisa... Sai dimaksudni Orkes Monalisa.

Wat sai lagu andalanni Orkes Monalisa ajo. Yaddo, lagu "Neng Geulis" sai jak Jawa Barat. Induh muneh, orkes ini bang kerisokan ngenyanyiko "Neng Geulis".

Neng geulis pujaan eungkang
Neng geulis akang hoyong teupang
Upami teu aya pamengan
Langkung sae urang keunalan

Neng geulis pujaan eungkang 
neng geulis akang hoyong teupang
upami teuaya pamengan
sasih paun yu urang tunangan

Kerisokan nengi Neng Geulis, pagi-pagi kantekku nyanyi:

Neng geulis pujaan eungkang
Neng geulis akang hoyong teupang
Makni Lis
Mising mak ngisang

Na api diya. Sekam sunyinni ngelahai. Sai gelarni Lis langsung ngejar-ngejar kantekku. Kantekku langsung cengkelang sambil ngulang-ngulang lagu versi Lampung-Sunda ini jak jawoh:

Neng geulis pujaan eungkang
Neng geulis akang hoyong teupang
Makni Lis
Mising mak ngisang

Ngingokko seno risok nyak lalang tenggalan. :)

#HagaMatiNyakLalang

Friday, January 05, 2018

David Bekham Layin David Beckham*

Kik inji gelakh aseli David Beckham
sai jak Inggris :) 
"MAAF, api pai gelakhmu?"

"Kenalko, nyak David Bekham."

"Ai, niku David Bekham jak Inggris kudo?"

"Layin. Nyak inji Lampung aseli kidah."

"Ano gelakhmu David Bekham... "

"Na, layin. Sai jelma Inggris gelakhni David Beckham kidah geh sih dong."

😂😂😇

* Khusus postingan inji huruf sai biasa kutulis "r" titulis pakai "kh" 

Wednesday, January 03, 2018

Haga Mati Nyak Lalang...

MEME nginjam jak Facebook-ni Muhammad Harya Ramdhoni, 3/1/2018.

IKON LAMPUNG: Haga mati nyak lalang!

Thursday, December 28, 2017

Setahun Mak Kuperingohko

INAI do. Kesian nihan blog inji. Adu setahun muneh mak kuperingohko. Postingan terakhir tanggal 27 Desember 2016. Tanno, adu 28 Desember 2017. Penghujung tahun muneh.

Telu buku helau sai terbit di uncukni 2017.
Temadan setemonni. Blog ini blog antik sai memuwakni makai bahasa Lampung. Reno pai aku. Mak muneh ngedok sinsalni kik wat sai ngaku blog bebahasa Lampungni jak tuhani jak blog inji.

Memuakni nyak nyani blog saka di alamat: zulzet.blog.com makai bahasa Lampung tahun 2005. Kidang mak mesaka blog ini mak dapok tibuka lagi.  Ganti mit blogspot, yaddo blog ini http://udozkarzi.blogspot.co.id. Maseh tahun 2005.

Semakkungan postingan ini: Restrukturisasi Blog (6 Oktober 2006), setemonno adu melamon ceritaku di blog inji. Kidang ulehni maseh belajar, jadini injuk tikus ngedandan tau, blog inji kirak bin cadang. Mujor maseh dapok dihelaui. Injuk inji bentuk blogni.

Blog inji muneh tumbai pakaiku ngasah culuk nulis makai bahasa Lampung. Jadi do buku puisiku Mak Dawah Mak Dibingi (2007) sai jadi bahan pubalahan atawa setangkar. Hahaa...

Seno adu, tanno mak kerasa muneh adu di penghujung tahun 2017. Serebok lagi adu 2018 muneh. Induh... rumpok adu mikerko aga liburan Tahun Baruan, nyak bang maseh melamor PR (pekerjaan rumah) sai jadi utangku sai musti tibayar tahun hadapno.

Telu buku sai basani tiguaiko tanno:
~ Semilau, Sang Rumpun Sajak Muhammad Harya Ramdhoni
~ Antologi Puisi Mutakhir Lampung
~ Antologi Cerpen Mutakhir Lampung.

Deadline, deadline. Guai aga begeluk. Bang komputerni cadang bin kirak. Gileran kumputer adu buyun, sanak-sanak malah ngurau, "Yah, akhir tahun. Liburan! Ram midor-midor."

Adui... Guaian titunda pai sampai tahun hadap. Kekalau jak semangatni kik jak perai tahun baruan... 

Friday, January 20, 2017

Kembang di Balik Bukit (05)


Cerita Besambung | Fajar Sumatera | Jumat, 20 Januari 2017 | Halaman 12

Kembang di Balik Bukit (05)
Andy Wasis

"Naiya. Mani, nyak beniat ngelajuko mit Institut Kesenian. Nyak gering musik. Sapa pandai nyak dapok ngesaiko musik tradisional Lampung jama instrumen modern."
"Hui," Rambe cawa daleh ngimut. Tanno, sangon adu melamon pemusik sai ngesai ruwa unsur alat musik tradisioal jama modern. Injuk gamelan Jawa, Bali, Sunda, jama perangkat musik modern. Injukni ia mangsa inspirasi jak keadaan seno.
"Abang tantu aga ngelajuko studi mit jurusan sai gegoh, ya mawat?"
"Naiya."
"Mit dipa."
"Bogor."
"O, nyak pandai. Pasti IPB."
Rambe ngimut nuntung riangni muli lunik inji.
"Kik adu jadi ahli pertanian, Abang aga beguai di kota?"
"Mawat."
"Hee?" pudakni Seruni keliakan serius nuntong pudakni Rambe.
Ia makkung wat petungga timbal injuk seno jak sanak-sanak di pekonni. Sanak-sanak di pekon santor terok beguai di kota kik adu sekula.
"Jadi Abang aga beguai dipa?"
"Di kebun tenggalan."
Tamang heran Seruni nengini.
"Di kebun tenggalan?"
Rambe cunggok.
"Abang mak aga jadi pejabat di Kantor Pemerintah?"
Rambe digok ulu.
"Oh…”
Pema serebok. Kaduni Rambe cawa, "Pekon yaddo rang guai beguai sai paling helau. Pekon yaddo sai nunjang kehurikan di kota. Neram musti mukahut di pekon.
"Naiya," ani Seruni.
Sang pelok cawa seno reno riya sai luar jak bangukni kidang mak ia pandai api retini. Ia maseh ngebayangko keadaan kota balak sai ramik, sai jadi kehagani rangni taru kak nanti. Kidang, keterokan seno injuk lebon ulehni cawani Rambe.
Matarani pepelegohan begiser uleh putarni bumi. Sinarni bebinar-binarf nembus rumpun kekayuan.
"Nyak aga mulang," ani Seruni.
"Yu. Rani adu dibi," ani Rambe daleh cunggok.
Seruni nuntong ia. Setemonni ia bukilu Rambe aga ngehalangni, cutik saka-saka di repong. Kidang bakas seno malah ngayun nyin ia geluk mulang.
"Abang mulang?" Seruni ngimut daleh ngerilong pepunditan.
Ia ngehagoko dapok bebarong luwar jak repong.
Rambe digok rik ngimut.
Kimutni Rambe nyani atini Seruni injuk tekacai. Ia sungguk serebok, injuk mak nantu atini. Kaduni ia ngebalik rik tegar injuk anakni uncal ngeliwati padang jukuk. Rambe ngerilongni sampai muli lunik seno lebon di pingger renglaya balak.
Di renglaya balak Seruni petungga Arman, kantek sang kelasni.
"Jak ipa?"
"Jak udi!"
"Jak udi dipa?"
Seruni mak nimbal. Ia ngegelukko jimpangni.
Arman ngebarongi lapahni. Dia sangon tebinta jama muli inji. Mulai sai tigelati murai, sai matani injuk bintang dini, bawakni malus kunjer sutera. Kanjak saka ia berusaha ngeredikini, kidang muli inji santot mejaoh, jinak-jinak merpati. Nyani Arman tambah penasaran. Rik, dibi ini ia luar jak rumpun batangni kahwa. Arman pandai seno yaddo repongni Rambe. Halok pak ia ampai pujama kelawan Rambe? Kik reno tambah redik muli inji jama Rambe.
Aga besahing, Rambe bagini Arman mak ngedok api-apini. Arman ngedok segalani bunjak jak Rambe. Kidang ia makkung pandai, muli injuk repa si Seruni inji.
"Nyak jak lambanni Abang Rambe," ani Seruni.

>> WAT SAMBUNGANNI…

Thursday, January 19, 2017

Kembang di Balik Bukit (04)


Cerita Besambung | Fajar Sumatera | Kamis, 19 Januari 2017 | Halaman 12

Kembang di Balik Bukit (04)
Andy Wasis

"Abang Rambe," tagu muli seno.
“Hui, Seruni.”
Muli ramping seno ngimut kaduni ngebuka ruwa culukni injuk basani meraktekko gerak senam. Rambe menokni.
"Lelawa yos di ija," ani Seruni luwot.
“Jak ipa niku?”
Seruni nuntong Rambe. Matani kicop-kicop injuk bintang lunik. Kimut mak tekas jak beberni.
“Sengaja nyak nyepok Abang.”
Ia ngerediki Rambe. Kaduni ngepikko tundunni di kayu di kebelah Rambe. Rambe ngimut. Kidang, kimutni Rambe mak diperingohkoni. Mani Seruni basani ngeliak langit sai kena salok awan tipis.
Keratongan Seruni selama inji ngubati rasa tiram Rambe. Tiram jama adek bebai. Adek sai kesipak ia dapokko jak inani. Ulehni seno, jama muli lunik inji ia ngeniko rasa kahuni sebagai abang. Mak lebeh.
Disadari perasaan Rambe inji jama Seruni?
"Ram midor-midor, ija, Bang."
Ditarikni culukni Rambe. Muli lunik seno bergayut di layangni. Rambe nutuk jimpangni Seruni. Rumbi kembang kahwa tabor sampai lom atini. Bunjak lagi bagini Seruni, rumbu kumbang kahwa nyani rasa bangi di lom atini. Sambil ngejimpang muli lunik seno ngegumamko lagu sai. Lagu sai mak beratoran. Kidang bunyini merdu, semerdu kicau murai di pagi rani. Ia agresif rik bebujukan ireh. Muli luni anjak pekon lunik Bintuhan, jawoh di balik Bukit Barisan. Ia minok di lamban puari jak inani sai mak jawoh jak lambanni Rambe. Rambe heran jama kelitahni muli inji. Muli lunik ini bebujukan nihan jama Rambe. Halok, ia adu pandai kik nyak adu nganggopni adek, reno pikirni Rambe.
“Mengapi pema riya, Bang?”
Rambe mak nimbal. Ia ingkah ngimut. Ruwa culukni dikurukkoni mit lom pakitni celana. Seruni tambah begayut di culukni Rambe. Wat cutik pengrasa mak bangik di atini Rambe. Kidang, ia naganko culukni dibenikok muli lunik seno.
"Nyak gering nihan di ija, Bang," ani daleh ngekasko cantanan jak culukni Rambe.
"Gering repa?"
"Nyak gering tinggal di Liwa. Jenoni penyanaku Liwa mangi..."
"Nyatani sangon mangi, kan?"
"Mak seangi Bintuhan."
Sang pasang burung perenjak (api pai "burung perenjak" ajo bhs Lampungni?) tangkop di batangni kahwa. Sebebua dedaleh ngecericit pakai bunyi alusni. Pasangan perenjak seno ngeguyah alibambang sai basani ngisop maduni kembang. Alibambang kambor maleh mit pampang bareh.
"Apilagi wat Abang di ija," lajuni Seren.
"Uhui..." Rambe ngimut daleh nuntong mit pudakni muli.
Muli pundit seno keliyoman, kaduni sungguk nuntong jejukukan sai basani diilikko cukutni. Pepira waktu kaduni ia ngiwakko pudakni. Kimutmu mekar, injuk kembang ros suluh sai mekar.
"Abang muneh, yu?" Matani nantang. Biber sai injuk sang ulas garis sulug seno cutik tebuka ngejajakko barisan ipon-iponni sai andak.
Rambe lalang sambil nyancan layangni muli lunik seno.
"Ayu!" ani sambil nawit Seruni. Muli lunik seno ngerasa miyos ireh. Lajuni Rambe, "Niku musti rajin belajar."
"Yu," ani Seruni.
Rambe nguerku pampangni kahwa sai tejunjom mit bah nyin tian dapok liwat. Sang pasang perenjak maseh luncat-luncat riang di batangni kahwa. Cericitni nampilko musik alam sai merdu.
"Mengapi niku mileh sekula di Liwa?" nanya Rambe.
"Nyak mak mileh."
"Jadi..."
"Amaku sai ngehagako nyin nyak kuruk Sekolah Menengah Kejuruan. Ama terok nyin nyak jadi ahli pertanian. Setemonni nyak terok sekula di Jogja atawa Bandung."
"SMA?"

>> WAT SAMBUNGANNI… 

Wednesday, January 18, 2017

Kembang di Balik Bukit (03)


Cerita Besambung | Fajar Sumatera | Rabu, 18 Januari 2017 | Halaman 12

Kembang di Balik Bukit (03)
Andy Wasis

"Hui, ngapi bang geluk-geluk?" cawa Zuraida.
"Ah... mawat." Rambe ngimut. Ia ngelegohko lapahni. Ngejari jimpangni Zuraida.
Angin pegunungan behembus pepelegohan,ngamborko uncuk-uncuk buwokni Zuraida.
Sesampaini di lamban Rambe ngehalu inani ampai nihan adu jak mutil kol rik nyabut gantang. Culukni inani maseh latap ditanoh. Hiting bebintik-bintik di tagakni. Pudak tuhani inani inji ngejajakko kewuwahan. Pengliak matani miyos nuntong sanak bakasni sai ampai mulang jak sekula. Gantang rik kol tabor di bah lamban.
Biasani ngediki dibi aga wat mubil bak terbuka sai ratong pakai ngusung sanini gulai jelma ramik. Mubil seno keliling jak lamban mit lamban, ngumpulko sanini gulai. Kaduni diusungni mit pasar.
"Akher-akher inji niku keliakan beubah," ani ina kala Rambe ngebuka tudungni mi di mija mengan.
Rambe ngeliak inani, "Wat api, Ina?"
Bebai seno injukni ngehariko perubahan perangaini anakni. Sanak inji putok, pikerni. Api nihan sai nyani keputokanni. Inani mak pandai. Seno sai jadi tanda tanya di atini.
"Kik amamu maseh wat, beliyawan pasti gering ngeliak niku serebok lagi aga tamat sekula," ani inani dedaleh mejong di hadapanni. Kaduni ia nyuduko sang pinggan mi pakai sanak bakasni seno.
Rambe menok inani. Ia ngewaterko ulun tuhani inji, sai kik mulai ngebimbing amani santor miwang. Luh mak aga taru gugor jak matani. Rambe beupaya ngalehkp kicikan.
"Kebun kahwa neram keliakan adu mulai ngembang, ya Ina."
Bebai lima puluh tahunan ini tedangut serebok. Ia ngusap luhni.
"Naiya," luar sang pelok cawa jak bangukni, kaduni, "Keliakanni tahun inji batang-batang kahwa neram aga nguwah rebu."
Rambe terus nyuba ngembangko riangni atini ina.
"Nyak ngebaca koran, ani berita regani kahwa tahun inji cakak."
Ina nuntong Rambe. Injinjukni ia mak percaya api sai diucakko anakni seno. Kesakaan regani kupi rebah ireh, sehinggo kelamonan petani kahwa ngaleh guaian mit tanomana bareh atawa ngaku damar di pullan-pullan.
"Temon, Ina. Regani kahwa cakap langgar nihan," ani Rambe.
"Alhamdulillah!" timbalni ina.
Kaduni Rambe ngelajuko cawani, "Kik regani kupi mehelau, repong sai cutik inji dapok pakai ngebiayai kuliahku nanti."
"Naiya, naiya," ani ina maya, "repa ya riya sekulamu musti tilajuko."
Rambe ngeraduko menganni. Adu jak ngebasuh culukni, ia minjak jak rang mejongni.
"Aga mit dipa niku?" inani nanya.
"Nyak aga ngeliak repong."

RUWA
Kemutik-kemutikni kembang mulai mecul jak unggal rumpun kahwa. Warna andak kembang kahwa udi minjak di hantara bulung ujau. Rambe hanggum, inji do hasil guai balakni. Sang bidang tanoh jama batang-batangni kahwa tuha teninggalni amani, tanno adu jadi repong sai miyos.
Rambe ngepikko tundunni di batang meranti di watas repong. Matani ngeliak mit unyinni repong. Di hadapanni jama bulung ujau rik kembang-kembang bewarna andak. Ia yaddo sanak ngura sai tepaksa nahan letupan-letupan kenguraanni. Ia sanak ngura sai latap diidealisme langgar. Begeluk jak amani mak lagi, ia mulai ngurako batang-batang kahwa di repong inji. Ia beguai senemon. Kanjak mulang sekula sampai di ia beguai. Tanno, ia mulai ngerasako wah guai senemonni. Batang-batang kahwani mulai ngembang. Pepira bulan lagi aga nguwah rik kaduni ia aga ngunduhni. Rambe ngimbusko hengas. Ampai nihan aga minjak, wat muli sai mundah jak rumpun kahwa.

>> WAT SAMBUNGANNI…

Tuesday, January 17, 2017

Kembang di Balik Bukit (02)


Cerita Besambung | Fajar Sumatera | Selasa, 17 Januari 2017 | Halaman 12

Kembang di Balik Bukit (02)
Andy Wasis

Zuraida tekanjat ngedengi cawa seno. Ia mak nimbal. Ingkah ngimut. Di lom atini ia cawa, nyak sangon basani ngicik angonko niku. Niku? Niku muneh kicik angon, kidang ngicik angonko sai bareh.
Rambe narik hengasni lom-lom, injuk merabai kebelaan zat asam sai tehambor di alam inji.
"Amu aga mit Studi Kerja Nyata."
"Naiya," timbalni Rambe.
"Kapan?"
“Semester akhir ngejelang ujian.”
“Maseh mesaka.”
Tian ruwa pepema luwot.
"Nyak terok geluk-geluk nutuk SKN. Ram aga ilung pekon-pekon. Hara bangikni," ani Zuraida.
"Naiya," ani Rambe.
"Neram dapok mileh pekon sai nerai kehagai, kan?" Rambe ngiwakko layang, "Induh!"
"Repa sakani SKN inji?"
"Sai atawa ruwa minggu, halok sampai sebulan."
"Oh."
“Neram aga tibagi delom kelompok," ani Rambe luwot.
Nyak perkilu wat di kelompokmu, ani ati Zuraida. Naiya, ingkah di lom ati ulehni ia mak kawa cawa injuk reno. Kidang seno yaddo perkiluni. Seno yaddo kehagani, nyin dapok santor wat di redik bakas sai pema-pema dikegeringini inji.
Rambe sungguk nuntun jimpang cukutni. Ia yaddo sanak haruk hehanani muneh. Amani mak lagi kala ia maseh kelas enom SD. Lehotni amani jama inani nyin sanak bakasni ini pagun sekula antak ipa riya. Padehal amani no mak ninggalko herta, kecuali sang bidang kebun kahwa sai batang-batangni adu metuha. Kebun kahwa seno ampai nihan
tingurako rik tahun inji ampai pengajian nguwah luwot. Cutik tanoh sai tinggal tipakai nanom kol, gantang, rik macom-macom sanini gulai. Seno do pakai tian nganik serani-rani. Serebok lagi ia ngeraduko studi di SMK Pertanian rik beniat aga ngelajuko mit IPB. Adu tantu pakai ngelajoku studi aga perelu biaya sai lamon.
"Kekalau regani kupi tahun inji cakak, Rambe. Rik, kakalau muneh hasil usim tahun inji mehelau," ani ina sai rani.
"Naiya, nyak aga beu-uyunan daleh setemon ngeguaiko repong, Ina," timbalni Rambe.
Inani mehanggum. Layin ulehni kayunanni, kidang sanak inji dapok ngemotivasi badanni tenggalan. Ia nyadar hara pentingni ilmu pengetahuan pakai ngehadapi macom dihalangan kehurikan di dunia. Kik mak ngedok ilmu kehurikan inji mak ngedok reti. Rambe bekilu nihan nanti unyinni ilmu pengetahuan sai dimangsani aga tiguaiko di pekonni. Ia terok ngemajuko pertanian di pekonni. Terok
ngembangko cara-cara betetanoman sai makai ilmu pengetahuan. Terok ngubah sistem pertanian tradisional mit sistem sai modern. Kik muhalok mekanisasi pertanian.
Bunyini jimpang cukukni tian detak-detak di atas renglaya aspal sai mulai tukak-tukak. Batu-batu renglaya tabor di trotoar. Di lom atini Zuraida pagun ngilu-ngilu, kekalau nyak di kelompokmu. Rik, nyak aga... Zuraida sungguk mani seketika Rambe ngilingko matani mit ilung ia. Pema-pema Rama muji sikopni muli sai lapah di kebelahni. Hara sikopni niku, Zur. Wat cutik kehaga di atini. Kidang, geluk-geluk ditokkoni pengrasani seno. Niku watni mejaoh di atas langik, di awas sai langgar, sai mak bakal kutiwat, sesolni atini. Pengrasani seno nyani atini mak nantu, hinggoni jimpangni jadi tambah geluk.

>> WAT SAMBUNGANNI…

Monday, January 16, 2017

Kembang di Balik Bukit (01)



Cerita Besambung | Fajar Sumatera | Senin, 16 Januari 2017 | Halaman 12

Kembang di Balik Bukit (01)
Andy Wasis

PENGANTAR REDAKSI
Fajar Sumatera kembali menyajikan cerita besambung, cerita bersambung berbahasa Lampung mulai hari ini. Kembang di Balik Bukit karya Andy Wasis yang diterjemahkan Udo Z Karzi ke bahasa Lampung dari karya asli berbahasa Indonesia berjudul Bunga di Balik Bukit. Novel ini ber-setting Kota Liwa, Kecamatan Balik Bukit, Lampung Barat. Andy Wasis (1938-2012) adalah penulis kelahiran Tanjungkarang, Bandar Lampung yang telah menulis lebih dari 100 buku (anak, remaja, dan dewasa).

---------------

1
Zuraida ngejimpang di pingger renglaya. Ia ampai mulang jak sekula. Udara mebangik rasani. Awan tipis begayut di langik. Kota Liwa sai wat di cukutni Gunung Pesagi inji sememanjang tahun disalok awan tipis, nyani udarani santor miyos. Sekekejungni renglaya ia ngingokko Rambe, kantek sang kelasni. Rani inji pudakni bakas ini keliakan mingkop. Pudak kelomni bakas seno nyani atini mak nantu, injuk wat ruda sai ngegelinding jak lom atini.
"Aneh," ani atini, "nyak santor ngehariko ia, kidang ia mak iwoh. Halok pak jama badanni tenggalan ia mak nihan iwoh."
Pema-pema wat sang tunas kahut ngembang rik ngegegitik atini. Kidang, ulehni ya muli tantu sai mak mupatut ngejajakko walani rasani atini. Paling-paling ingkah nyuba ngilu keharian, ngeni pertanda. Kidang, bakas seno maseh riya mak iwoh.
Rambe, sai lapah cutik di kudanni ngeliak jimpangni Zuraida sai pepelegohan. Ia begeluk ngebedakni, kaduni ngebarongini. Cutik Zuraida ngilingko matani, kaduni geluk-geluk sungguk.
"Repa ulanganmu?"
Zuraida tekanjat kena luleh sai mak dipenyanani. Agak gegeran, ia nimbal, "Ruwa soal mak kejawab."
"Ngapi bang reno?"
"Halok nyak gugam."
"Atawa... halok niku mak belajar?"
Zuraida ngilingko matani luwot, kidang pengliakni nyangkut mut tukuni cukut. Atini nemonko cawani Rambe. Ia sangon kanjak pepira bulan inji mak ngedok belajar. Unggal bingi ingkah ingok-ngingokko pudakni bakas sai basani lapah di kebelahni inji. Bakas sai adu anjak saka mekantek jama ia, anjak muwakni kuruk mit Sekula Menengah Kejuruan jama-jama muneh ngakuk Jurusan Pertanian. Pepira bulan lagi tian aga pisah mani tamat belajar. Kapan lagi, kik mak tanno tunas inji tisaiko? Kesipakan mak bakal ratong luwot. Kidang, bakas inji injukni mak ngereti pengrasaku, sesolni ati Zuraida.
Zuraida nyuba neduh-teduh atini bakas sai lapah di kebelahni inji. Api nihan sai basani dipikerko Rambe?
Zuraida anakni petani pawar. Ulun tuhani ngedok puluhan hektar kebun kahwa. Zuraida anak tuha jak ruwa muari. Adek bakasni belajar di di Pondok Pesantren Gontor, Jombang, Jawa Timur. Bakni ngehagako anak bakasni seno jadi mubalig. Jadi ahli agama Islam.
Tanno inji Zuraida basani kuruk di jalur umur temeranjak. Sai jalur sai rasani metor rik mebangik tirasa di lom ati. Jalur inji kik kena wai yos jadi ngembang, kidang kik kena ruwi, selunik api ya riya ruwi seno, jadi kemiyut. Rik, ia basani tebinta jama meranai sai. Meranai seni yaddo Rambe. Bakas sai mengingi sengingi bungkah es, bakas sai beku injuk tumpukan batu gunung. Bakas sai ati susuh tikekira. Kidang, sebagai muli sai urik di kota lunik, sai lingkungan masyarakatni maseh teikok jama adat sai tececok kuat, perasaan temeranjakni Zuraida mak murunggak-runggak.
"Hui, bang kicik angon!" Rambe cawa mecohko pepemaan.

>> WAT SAMBUNGANNI…