Kembang di Balik Bukit (03)

Cerita Besambung | Fajar Sumatera | Rabu, 18 Januari 2017 | Halaman 12

Kembang di Balik Bukit (03)
Andy Wasis

"Hui, ngapi bang geluk-geluk?" cawa Zuraida.
"Ah... mawat." Rambe ngimut. Ia ngelegohko lapahni. Ngejari jimpangni Zuraida.
Angin pegunungan behembus pepelegohan,ngamborko uncuk-uncuk buwokni Zuraida.
Sesampaini di lamban Rambe ngehalu inani ampai nihan adu jak mutil kol rik nyabut gantang. Culukni inani maseh latap ditanoh. Hiting bebintik-bintik di tagakni. Pudak tuhani inani inji ngejajakko kewuwahan. Pengliak matani miyos nuntong sanak bakasni sai ampai mulang jak sekula. Gantang rik kol tabor di bah lamban.
Biasani ngediki dibi aga wat mubil bak terbuka sai ratong pakai ngusung sanini gulai jelma ramik. Mubil seno keliling jak lamban mit lamban, ngumpulko sanini gulai. Kaduni diusungni mit pasar.
"Akher-akher inji niku keliakan beubah," ani ina kala Rambe ngebuka tudungni mi di mija mengan.
Rambe ngeliak inani, "Wat api, Ina?"
Bebai seno injukni ngehariko perubahan perangaini anakni. Sanak inji putok, pikerni. Api nihan sai nyani keputokanni. Inani mak pandai. Seno sai jadi tanda tanya di atini.
"Kik amamu maseh wat, beliyawan pasti gering ngeliak niku serebok lagi aga tamat sekula," ani inani dedaleh mejong di hadapanni. Kaduni ia nyuduko sang pinggan mi pakai sanak bakasni seno.
Rambe menok inani. Ia ngewaterko ulun tuhani inji, sai kik mulai ngebimbing amani santor miwang. Luh mak aga taru gugor jak matani. Rambe beupaya ngalehkp kicikan.
"Kebun kahwa neram keliakan adu mulai ngembang, ya Ina."
Bebai lima puluh tahunan ini tedangut serebok. Ia ngusap luhni.
"Naiya," luar sang pelok cawa jak bangukni, kaduni, "Keliakanni tahun inji batang-batang kahwa neram aga nguwah rebu."
Rambe terus nyuba ngembangko riangni atini ina.
"Nyak ngebaca koran, ani berita regani kahwa tahun inji cakak."
Ina nuntong Rambe. Injinjukni ia mak percaya api sai diucakko anakni seno. Kesakaan regani kupi rebah ireh, sehinggo kelamonan petani kahwa ngaleh guaian mit tanomana bareh atawa ngaku damar di pullan-pullan.
"Temon, Ina. Regani kahwa cakap langgar nihan," ani Rambe.
"Alhamdulillah!" timbalni ina.
Kaduni Rambe ngelajuko cawani, "Kik regani kupi mehelau, repong sai cutik inji dapok pakai ngebiayai kuliahku nanti."
"Naiya, naiya," ani ina maya, "repa ya riya sekulamu musti tilajuko."
Rambe ngeraduko menganni. Adu jak ngebasuh culukni, ia minjak jak rang mejongni.
"Aga mit dipa niku?" inani nanya.
"Nyak aga ngeliak repong."

RUWA
Kemutik-kemutikni kembang mulai mecul jak unggal rumpun kahwa. Warna andak kembang kahwa udi minjak di hantara bulung ujau. Rambe hanggum, inji do hasil guai balakni. Sang bidang tanoh jama batang-batangni kahwa tuha teninggalni amani, tanno adu jadi repong sai miyos.
Rambe ngepikko tundunni di batang meranti di watas repong. Matani ngeliak mit unyinni repong. Di hadapanni jama bulung ujau rik kembang-kembang bewarna andak. Ia yaddo sanak ngura sai tepaksa nahan letupan-letupan kenguraanni. Ia sanak ngura sai latap diidealisme langgar. Begeluk jak amani mak lagi, ia mulai ngurako batang-batang kahwa di repong inji. Ia beguai senemon. Kanjak mulang sekula sampai di ia beguai. Tanno, ia mulai ngerasako wah guai senemonni. Batang-batang kahwani mulai ngembang. Pepira bulan lagi aga nguwah rik kaduni ia aga ngunduhni. Rambe ngimbusko hengas. Ampai nihan aga minjak, wat muli sai mundah jak rumpun kahwa.

>> WAT SAMBUNGANNI…