Banjer...

Borneonews/Waeti

BANJER. Pangkalan Bun dapok banjer muneh rupa ni. Setemon ni mak perlu asal ngelaya ni wai (drainase) ni buyun. Ya, guwai ni tatakota rik Dinas PU.

Pangkalan Bun sai Betik

PANGKALAN BUN, ibukota ni Kabupaten Kotawaringin Barat -- rangku beguai tanno -- mangsa Penghargaan Adipura 2007 sebagai kota paling kecah se-Kalimantan.





Foto-foto Borneonews/Waeti


Betik muneh Pangkalan Bun. Pangkalan Bun sai Betik, reno. (Hehehe... Dasar Lampung. Lambar api?).

Kidang, nyak tanno kan jadi ulun Pangkalan Bun.

Bangga muneh geh.

Temadan...

TEMADAN kik mak timuat.

Borneneonews/Surya Sriyanti


Putra-Putri Pariwisata Kalteng 2007 jak Kotawaringin Barat Sutrisno Priantono, siswa SMAN 1 Pangkalan Bun rik Restarum Ekawati, siswa SMKN 1 Pangkalan Bun. Tian ruwa juga tinobatko jadi Putra-putri Persahabatan delom Festival Budaya Isen Mulang di Palangkaraya, Kalimantan Tengah, Kamis (24/5).

Kasi muneh.

Kantek sai Adu Belamban

KANTEK sai, Ritanti Aji adu belamban jama kundang ni, Arief, di Semarang, 31 Maret 2007.

Ya ji sai nyani tulisan (profilku) waktu ya maseh beguwai di Kantor Bahasa Provinsi Lampung (KBPL).

Adu saka nangon nyak mak petungga sekati nyak di Pangkalan Bun. Komunikasi juga muneh. Sampai ya tenggalan sai ngirim e-mail nambi.

Kekalau bahagia terus.

Parle Reti ni Cawa

Wakil Ketua DPRD Kobar Jamaludin (Borneonews/Budi Surakhmat)


CAWA ugu luwot. Tanno, Wakil Ketua DPRD Kotawaringin Barat Jamaludin sai ngawak.

"Wartawan kik aga wawancara jama DPRD soal guwai rik malalah jelma lamon, musti jama unsur ketua," ani.

Kontan gawoh ngundang reaksi jak praktisi hukum Eko Sumarno rik anggota DPRD bareh ini injuk Aminullah (Fraksi Bintang Pembangunan), DYL Prayitno (FPDIP), rik Kaspul Anwar (F Partai Golkar).

Cawa bareh jak anggota DPRD atau legislatif, yaddo de parlemen. "Parlemen kan asal kata ni jak bahasa Yunani, "parle" sai reti ni "cawa"," ani Eko Sumarno.

Lah, wakil rakyat kik mak kasi cawa, kecuali ketua-ketua ni -- injuk kehaga ni Jamaludin -- kan lain wakil rakyat? Kik reno aga jadi api DPRD Kobar?

Dasar budol. Mak ngereti api-api kok jadi Wakil Ketua DPRD?

Konser Kapten? Tetap Mak Nonton!

Borneonews/Andro Desembery


BAND Kapten konser delom rangkaian Panggung Kreasi Akhir Sekolah (Pangkreas) di Stadion Sampuraga, Pangkalan Bun, Minggu (20/5). Mak kurang siwa lagu jak ruwa album ni tian injuk 'Pemburu Cinta', Preman Cinta', 'Wanita Berhati Baja', 'Jaga Jarak', Skill Macho', 'Dengar', 'Malaikat Cinta', rik 'Lagu Sexy' dilantunko band sai dijaga Zacky (vokal), Arief (bass), rik Q-Wee (drum) inji delom konser jeno.

Reno kabar ni. Nyak ingkah mangsa cerita. Soal ni mak nonton. Hehehe...

Kapan ya pentas teater atawa baca puisi di Pangkalan Bun? Kik wat jelas nyak nonton.

Perai, Perai, Perai...

KEMIS, 18 Mei tanggal suluh, libur nasional Kenaikan Yesus Kristus. Jumat, 19 Mei cuti barong. Sabtu, 19 Mei hari sai kena apit, tekecit, ya libur juga.

Seno ani Kepala Subbagian Kepegawaian Bagian Umum Pemerintah Kabupaten Kotawaringin Barat Sri Supatmi, sai ngutip Keputusan Barong Menteri Agama, Menteri Tenaga Kerja dan Transmigrasi, rik Menteri Pendayagunaan Aparatur Negara. Terus, ditindaklanjuti jama Surat Gubernur Kalimantan Tengah Teras Narang rik Surat Bupati Kotawaringin Barat Ujang Iskandar.

Minggu, 20 Mei? Kan nangon libur.

Perai, perai, perai...

Payu ram ngerayako perai!

Kik wat urusan jama pemerintah kabupaten, rani Senin gawoh. Kantor-kantor tutup. Pegawai negeri mak kerja, kecuali guru atawa perawat rumah sakit.

Koran mak perai ya?

Macet!

MINJAK pagi sekitar jam walu. Mak dapok pedom lagi.

Bingung api aga guwai seradu jak nganik mie. Langsung goh mandi. Mit kantor.

Niat aga nulis esai rik ngirim mit koran bareh. Kidang, mak jadi-jadi. Selepas luhor, malah kedugok. Numpang pedom di kamar ni Bayu di mess kebelah kantor. Sampai Ashar.

Alhasil, gegoh gawoh jama di lamban riya.

Nulis mak jadi-jadi.

Macet!

Hadiah Rancage 2008 pakai Sastra Lampung?

KEKALAU Hadiah Rancage 2008 adu nyakup epak bahasa: Sunda, Jawa, Bali, Lampung. Nyak unggal bulan petungga Kang Ajib (Ajib Rosidi) rik tim Rancage mani nyak nutuk aktif di Pusat Studi Sunda (PSS) sai dipimpin Kang Ajib. Keni pandai jama kantek-kantek di Lampung nyin tiyan fastabiqul khairat nulis delom bahasa Lampung. Contoh ni Bali, tian testimuli andah ni Rancage. Kekalau Lampung dapok minjak muneh.

Inji kabar betik jak Irfan Anshory. Ya ji kenalan pas nyak browsing soal budaya Lampung, pehalu blog ni. Ternyata ya ulun Lampung muneh jak Talangpadang, Tanggamus. Adu jadi jelma balak di Bandung. Sai nyanyi nyak riyang, ya maseh peduli muneh jama sastra atawa budaya Lampung secara umum ni.

Jelas gawoh, kukabarko inji jama tian di Lampung.

Zul, ani Irfan, pengurus Rancage nanya, selama lima tahun terakhir wat pira buku sai radu terbit delom bahasa Lampung? Kik wat minimal telu aga dikurukko mit penilaian Rancage 2008.

Sengingokku, sebareh jak buku puisi ruwa bahasa Lampung-Indonesiaku, Momentum, wat buku puisi muneh karya ni Sutan Purnama sai adu diterbitko.

Reti tinggal sai buku lagi, cukuplah sebagai syarat minimal turuk penilaian Hadiah Rancage 2008.

Kebetulan muneh, Direktur Penerbit Matakata Y. Wibowo (hahaha, setemon ni kantek juga mani nyak manajer administrasi ni) adu ngehubungi kemungkinan nerbitko buku puisiku Mak Dawah Mak Dibingi.

Ya, kalau riya sastra Lampung dapok kuruk penilaian Rancage.

* * *

Cerita bareh. Buku Talangsari 1989, Kesaksian Korban Pelanggaran HAM Peristiwa Lampung (Lembaga Studi Pers dan Pembangunan dan Sijado, 2007) sai ditulis Fadilasari tibahas di BBC Siaran Indonesia pukul 13.00 GMT atawa pukul 20.00 WIB. Reno kabar jak Machsus Thamrin liwat milis Teknokra.

Langsung gawoh ku klik BBC Indonesia.

"Dunia Buku tanno, ngebahas peristiwa Lampung 18 tahun sai radu. Fadilasari, wartawan Tempo (setemon ni tanno koresponden Metro TV) nulis buku Talangsari 1989," ani Asep Setiawan jak BBC Indonesia. Dst...

Kadu ni wawancara jama Fadilasari (penulis buku), Usman Hamid (Koordinator Kontras), rik Zulkarnain Zubairi (editor sai penerbit di Lampung). Sai terakhir kan gelar asliku. Hahahaa...

Numpang ngetop cutiklah, La.

Muwak ni Diwawancarai BBC

JAK Magrib nambi (7/5), nyak lupa ngurikko ha-pe. Ya, jam siwa lebih ampai ingok HP. Mati jak jeno.

Waktu kuurikko, SMS ni Ren kuruk, "Bela pulsa Ren. Sai ngejawab asisten Abang mulu. Abang mit dipa?"

Mak saka jak seno, Fadilasari, penulis buku Talangsari 1989 nelepon. Pakai nomor kantor. "Kak Julnya, urikko pai HP-mu," ani.

"Adu kuurikko," aku.

Kadu ni ya ngehubunginya liwat HP. Rupa ni Fadilasari ngerekomendasiko wartawan BBC Indonesia ngewancarai nyak delom kaitan ni jama buku Talangsari ni. Selain nyak, Ila sai nulis buku rik Ketua Kontras Usman Hamid adu diwawancarai.

Kutunggu-tunggu, mak dihubungi-hubungi. Ampai pukul sebelasan dibingi, nyak dihubungi. Jadi do, nyak kena wawancara BBC via telepon pakai acara "Dunia Buku". Ampai muwak ni diwawancai BBC.

Sebagai editor Penerbit Matakata, Bandar Lampung!

Gegoran juga cutik. Kidang syukor lancar.

Mak perlu kuucakko api sai ditanya. Pokok ni sekitar buku ni Fadila rik soal pelanggaran hak asasi manusia (HAM).

"Mantap," ani Y. Wibowo, Direktur Penerbit Matakata, pas kukeni kabar nyak diwawancarai BBC jeno.

Kompak kik Jama-jama Mangsa Bagian

KRITISISME? Injuk ni ingkah wat di dunia akademis gawoh.

Contoh ni, tanno, Pemerintah Kabupaten Kotawaringin Barat ngajuko 12 Rancangan Peraturan Daerah (Raperda). Sekaligus.

Jeno, pemandangan umum jak epak fraksi di DPRD Kotawaringin Barat. Nyaris mak ngedok kritik. Mak wat wada. Sunyin ngedukung. Ngucakko mehelau.

Eksekutif, legislatif, yudikatif gegoh, sang lapahan. Kadu ni pema-pema: KKN!

Kompak kik jama-jama mangsa bagian.

Repa laju ni kik reji?

Ingkah Nyepok-nyepok Alasan...

MINGGU-MINGGU ini nyak lamon cawa buku. Soal ni, kik nutukko cawa ni rumpok, buku nangon penting. Pepatah sai klasik ngucakko: Buku sekapan ni dunia.

"Nyak terok nyani sai buku rik sai anak. Mani, ingkah jama cara seno do ram dacok ngatasi kematian: Benda sai tisani jak kertas rik benda sai tisani jak daging. Main-main cinta gawoh, ingkah nyani kebangikan riya, yaddo de hal sai ugu; mak wat hasil sai tiakuk jak seno. Kidang, kematianku ngedok reti kik wat sai ngegantiko nyak rik ngelajuko kehurikanku. Rik nyak nulis buku, lain pakai nyapai sukses tanno, kidang wat harapan, seribu tahun sai hadap buku seno paling mawat kuruk daftae kepustakaan atau delom catatan kaki," ani Umberto Eco.

Reno do. Hara penting ni buku.

Perpusda Kobar perlu nambah buku mani koleksi buku ni cutik rik lamon buku saka. (Borneonews/ Waeti)

Kidang, alang sedih kik ngeliak kondisi ni perpustakaan di lamon daerah sai mak nambah-nambah koleksi buku ni.

Rani ini goh, Ethi ngeberitako penambahan buku di Perpustakaan Daerah (Perpusda) tetunda uleh ni spek buku sai mak terinci delom proposal sai diajuko Perpusta.

Proposal Perpusda, ani Kepala Seksi (Kasi) Kurikulum Dinas Pendidikan dan Pengajaran (Dikjar) Kobar Bahrudin Hamdi, musti tiuyunko pai nyin nyantumko jumlah halaman buku, jenis kertas ni, gelar ni pengarang, dan penerbit ni. Ngilu tambahan buku 1.200 biji sai nilai ni Rp100 juta.

Tanggapan ni Kepala Perpusda? Ethi sai adu janji, mak dacok ngewawancarai mani semakkung ya sampai di perpus, jelma ni adu lijung kihung induh mit dipa.

Ingkah calon pustawakan Enny sai cawa adu nyantum gelar ni pengarang, penerbit, jumlah buku, rega ni buku rik judul buku yang tipesan delom proposalnya. Nangon mawat nyantumko jenis kertas rik jumlah halaman unggal buku sai tikilu.

"Ah, seno nyepok-sepok, jenis kertas api lagi? Jelma seno nyepok-sepok gawoh," ani.

Sekekejung tahun 2006, buku perpusda mak nambah. Ingkah tahun 2005 nambah 500 buku. Tanno, Perpusda ingkah ngedok koleksi buku saka 13.000.

Temon, Bu. Alasan gawoh.

Buku Heboh

FADILASARI adu nerbitko buku Talangsari 1989, Kesaksian Korban Pelanggaran HAM Peristiwa Lampung (Lembaga Studi Pers dan Pembangunan dan Sijado, 2007) sai tiulah jak skripsi ni di Fakultas Ilmu Sosial dan Ilmu Politik (FISIP) Universitas Lampung (1999).

Nambi (30/4) ti-launching di kudan ni Rektorat Unila.

Heboh! Sampai jadi headline ni Lampung Post rik Radar Lampung.

Bukuku kapan terbit ya?