Lalang-Lalang Terus...

NYAK lalang-lalang terus.

Cerita ni di Pangkalan Bun kan wat lokalisasi Kalimati.

Stt, repa keliak ni nyak mak wat mit dudi. Nyak ingkah pandai cerita ni.

Lokalisasi ji kan adu saka aga tialehko mit ... aduh, lupa rang ni. Sai jelas nangon mejaoh rik renglaya ni maseh tanoh campor batu. Rencana saka, kidang mak juga maleh-maleh.

Lamon sai ngedesak Kalimati tialehko geluk. Malah kik dacok, titutup sekalian.

Lain hak maleh. Malah jelma Pangkalan Bun hiruk polemik (baca: setangkar) di koran. Biasa, pro-kontra soal Kalimati.


Ketua MUI Kobar Muhammad Chabib rik Kabag Sos Pemkab Kobar Majeri (Borneonews/ Andri Saputra)


Argumen ni sai setuju Kalimati tialehko (titutup) jelas. Mak perlu diucakko dija. Ulun-ulun ni muneh jelas: Ketua MUI Muhammad Chabib, Ketua Majelis Jemaat Gereja Kristen Evangelis (GKE) Pendeta Martua Sinagaustadz, anggota DPRD jak partai-partai Islam, aktivis keagamaan, kadu ni nambah muneh Ketua Lembaga Masyarakat Dayak dan Daerah Kalimantan Tengah (LMMDD KT) M Syamsuddin HAD rik Pangeran Muasjidin Syah jak Istana Kuning.

Inji sai lucu: Prostitusi atawa pekerja seks komersial (PSD) dilindungi konstitusi (Pasal 34 ayat 1 UUD 1945). Nutup lokalisasi dapok-dapok ngelanggar hak asasi manusia (HAM) (rangkuman cawa ni Lurah Kalimati, Ketua Paratai Demokrat Subagio, rik sai terakhir, Kabag Sosial Pemkab Majeri).

Tanggapanku? Hahahaa... Temon-temon nyani nyak lalang-lalang.

Mak kebayang WTS dilindungi undang-undang rik ngebok lokalisasi gegoh jama ngelawan HAM.

Dipa Ompung Silamponga?*

way, antakko nyak
mit negeri asalku
di cukut ni pesagi

sekalabrak
mati berak ni

petungga
buay belunguh
buay bejalan di way
buay nyerupa
buay pernong
buay bulan

numpang nanya:
"dipa ompung silamponga?"

jak andalas
liwat jawa
sampai muneh
borneo
petungga ulun
sebuai**
lamban langgar
pangkalan lada***

"dipa ompung silamponga kidah?"

.........

-------
* puisi makkung jadi
** gelar ni pekon di kabupaten kotawaringin barat, kalimantan tengah
*** gelar ni kecamatan di kabupaten kotawaringin barat, kalimantan tengah

Kik Batu Rasa Coklat...

Foto: Yusuf Adji/PR


NYAK ngedit berita jelma nganik jelma (kanibalis).

Kik di Lampung wat Sumanto, di Borneo wat Marhatap (31).

Marhatap tanno ditinjuk pelisi seradu nyani warga Pekon Anjir Mambulai Barat KM 1, Kecamatan Kapuas Hilir, Kabupaten Kapuas, Kalimantan Tengah (Kalteng) heboh mani ngehalu mayit upi delom keadaan mak lengkap, Jumat (16/2).

Kuboran upi beni Arifin kusuk masai injuk jak tibungkar.

Mak mesaka jak ngeliak mayit Arifin lebon, jelma pekon ngehalu upi seno di sabah kidang mak utuh, cukut kiri sampai batas paha lebon wat kas tipelok pakai candung tajom.

Pelisi sai nyelidik ngehalu Marhatap basa ni nganik pelokan ni badan ni upi no.

Ya ngaku ngemaling tullan paha kiri ni upi pakai jimat nyin menang menang ucul manuk sai risok diguwaiko ni.

"Cukut kiri ni kupelok pakai lading, daging ni kupanggang kadu kukanik," ani Marhatap.

Telan ni dibungkus ni pakai kain kunjer sai diakuk ni jak kuboran. Kadu ni digantungko di sesai. Pakai jimat nyin menang ucul manuk.

Longan!

Jak longan ni tinimbang jelma sai nganik batu injuk sai kuliak di RCTI bingi ji.

"Injuk rasa coklat," ani bakas sai ngalahko ruwa pinggan batu serani.

Repa rasa ni nganik jelma, dang tanya jama Marhatap.

Di Mess Riya

JEMOH, Minggu (18/2) rani Imlek.

Rani inji libur. Kidang, aga mit dipa?

Di mess riya dibingi dirani.

Adu Pandai Lungkop Tenggalan

AIDIL adu pandai lungkop tenggalan, ani Ren liwat telepon.

"Kapan mulang?" ani luwot.

Aduh, jadi tiram jama anakku. Dipa pepira rani ji temon-temon guwai biak mani Jakarta banjer, internet macet, jaringan Media mak dapok tibuka, kadu ni Henri rik Deni mulang mit Jakarta, jelma IT ni mak ngedok di Bun, Edi mulang muneh mit Jakarta.

Pangkalan Bun angi... Mak ngedok toko buku... mak ngedok hiburan rik rang nyantai ngetokko buya.... Sunyin ni nyani nyak tambah tiram jama anak-kajong.

Dang-dang, nyak sampai di lamban, Aidil adu rangkang. Tanno goh adu pandai kisit-kisit. Kik mak tiliakko, dapok-dapok gugoh jak katil.

Tanno, mak aga lagi titaban.

"Mak bebas," ani.

Jadi tipik ko riya di kasor, kidang musti titunggu.

Serebok lagi ayah mulang. Ayah tiram.

Hhhh...

EPAK halaman luwot.

Aduh, lamon sai salah-salah rik lupa ni. Untung Pak Min (Katiminanto) jak monting ngeliakko sai salah.

Jadi, selamat... selamat...

Ngetokko nafas kejung.

Hhhh...

Istana Kuning

HIRUK-HIRUK Pemerintah Kabupaten Kotawaringin Barat (Kobar) aga ngebangun Taman Kota Pangkalan Bun Park. Padahal, sai adu wat goh tanno tikacaiko.

Di Pangkalan Bun wat Istana Kuning. Istana temon rang ni raja Kerajaan Kotawaringin, kerajaan Islam Melayu di Kalimantan Tengah.

Kerajaan Kotawaringin cecok tahun 1679. Raja kesai ni Pangeran Adipati Antakusuma, sai bangsawan jak Kerajaan Banjar.

Tahun 1814, tinilai anjak strategis ni, ibukota Kerajaan Kotawaringin tialehko jak Kotawaringin Lama (Astana Alnursary) mit Pangkalan Bun (Istana Kuning).

Inji kan sejarah. Masa kik aga tilupako.

Injuk ni Pemkab Kobar kurang sadar jama masalah inji. Bukti ni kondisi Istana Kuning tanno kurang tirawat.

Padahal, Istana Kuning di Pangkalan Bun dapok jadi rang ulun bewisata sejarah-budaya, malahan jadi museum.

ISTANA KUNING. Masa kik aga tilupako? (Foto-foto: Borneonews/Waeti)

Jadi kan mak perlu nyani gedung baru aga pakai museum injuk ani Kepala Subdinas (Kasubdin) Pembinaan Seni dan Budaya Dinas Pariwisata dan Seni Budaya Kobar Sandin sai ngucakko mak ngedok duit kik aga ngebangun museum.

Ya mawat?

Kalau Mak Jadi

BANG, kapan mulang?

Ren nanya pas kutelpon.

Repa muneh, ampai pira rani di Bun.

"Jemoh," aku, "Kidang, lain nyak. Deny gelar ni."

Nyak muneh tiram jama keti sai kukahuti. Kidang repa kik tugas ni di ija.

Aduh... repa kik luar atoran ni ingkah dapok mulang telu bulan sekali?

Kalau mak jadilah.

Api Ubat ni?

API ubat ni nyin semangat?

Bingi inji ngerjako telu halaman luwot.

Internet Media maseh ngadat....

Guwai mak dacok tepik pak repa ya.

Koran jemoh musti terbit.

(Naiya, nangon ni koran main-main?)

Uuooh, buya becong....

Sunyin ni Hiruk

JAKARTA banjer!

Mak ingkah jelma ibukota sai hiruk. Sunyin ni repot.

Kantor Media Group di Kedoya kebanjeran. Media Indonesia mak terbit ruwa rani Sabtu-Minggu (3-4/2). Induh jemoh ni.

Sekam di Borneonews, juga kena dampak ni. Mani Media Indonesia mak terbit, sekam musti ngerjakan sunyi ni halaman tenggalan. Biasa ni kan, walu halaman jak Media Indonesia, walu ni lagi sekam kerjako tenggalan.

Kidang, Media Indonesia mak terbit, ngakuk halaman ni jak ipa?

Mak kuwa kik ngerjako 16 halaman, Borneonews terbit 12 halaman gawoh. Asli tenyani tenggalan, adu ruwa rani. Induh jemoh...
Ah, tiram jama tian di Lampung.

Jakarta banjer! Jaringan telekomunikasi, kuruk telepon juga macet. Walah... pira kali nyuba nguhubungi Aidil tian, mak kuruk. Kuruk ruwa kali, kadu ni nyuba luwot mak dacok.

Jakarta banjer, sunyin macet.

Salah Urus di Culuk ni Jelma sai Nangon Salah

"LAMPUNG terus," komentar ni Kresna ngeliak nyak browsing soal Lampung terus.

"Iya, nyak tiram jama Lampung," aku.

Temon! Pangkalan Bun nangon kota sai bekembang. Kik aga beusaha -- maksud ni wiraswasta atawa wirausaha -- halok rang inji dapok nyani ram maju.

Kidang, waduh... Pangkalan Bun keliwat mangi jak guwai seni, apilagi sastra. Mak ngedok komunitas seniman atawa sastrawan. Mak ngedok tradisi intelektual. Soal ni, mak wat universitas.

Jadi, di Pangkalan Bun... ya kerja! Kik mawat, ya pedom bangik. Utok jadi mekudul mani mak wat tiasah.

Nyuba nulis esai.... Macet!

Browsing lagi. Nyepok berita-berita sastra-seni-budaya. Hasil ni, ngeribok tenggalan jama ulah ni jelma sai ngaku seniman di pekon dudi.

Cawa tenggalan, "Repa laju ni kesenian kik diurusko jelma sai setemon ni mak ngereti kesenian?"

Kidang halok adu zaman ni ya? Mak ubah ni olahraga sai santor salah urus mani santor diurusko jelma sai mak ngereti jama olahraga.

Nyak ingkah ngingok cawa ni Nabi Muhammad Saw. , kira-kira bunyi ni: "Kik sai urusan dicancan jelma sai lain ahli ni, tunggu gawoh kehancoran ni."

Astaga naga....