Ram Ingkah Berencaka....

MEI bela.

Recaka mulang mit Lampung tetunda-tunda. Rencaka awal Mei, mundur tengah, malah akhir Mei.

Akher ini, seradu pasti acara pengenian Hadiah Sastra Rancage di Universitas Padjadjaran (Unpad), Sabtu, 14 Juni 2008, ngilu cuti 4-14 Juni. Ngehadiri Rancage berangkat jak Lampung langsung berangkat mit Pangkalan Bun luwot.

Rencaka adu matang, kidang wat halangan. Ulun tuha sai bakas ni Eko Rahmawanto di Kediri tiopname di rumah sakit. Mendadak Eko berangkat ilung Palangkaraya Kemis (29/6) dibi ngejar pesawat pagi ilung Jakarta. Anak-kajong ni nyusul muneh mulang, Sabtu.

Jejama bedua nyin ulun tuha ni Eko geluk munyai.

Sekam telu manak kemungkinan mulang, Kemis (12/6). Singgah pai mit Bandung nerima Hadiah Rancage Sabtu ni (14/6). Ampai laju mit Lampung.

Temon nihan. Ram ingkah berencaka, Tuhan sai nantuko ni.

Catetan: Innalilahi wa inna ilaihi rajiun. Sekitar pukul 12.30 WIB nyak mangsa SMS jak Eko. Bak ni mak lagi.

Adi Ismet

PETUNGGA jelma Lampung di Pangkalan Bun jelas muhanjak nihan.

Cerita ni, Selasa (27/5) pagi-pagi, Aidil adu ngurau lapah. Jadido sekam ruwa midor-midor di Jalan Abdullah Mahmud, renglaya di kebelah rang sekam minok.

Gelar memidoran. Mejong pai sekam ruwa di hadap ni lamban sai.

Basa ni ngeleliak, mubil plat suluh KH 4 .. liwat rik kuruk mit garasi ni lamban seno.

Bakas sai luar jak mubil. Injuk ni nyak kenal.

"Dija, Pak," sekalian goh kutagu.

"Iya," ani. "Jak Lampung?"

"Kemiling," aku.

"Nyak jak Talangpadang," ani luwot.

Iya ji nangon kukenal.

Adi Ismet. Nyak pandai ya sewaktu ngepos di Pengadilan Negeri (PN) Tanjung karang. Ya salah sai hakim di isan.

Mak saka nyak di Pangkalan Bun, kabar ni Ketua PN Pangkalan Bun ganti.

"Kepala PN sai baru jak Lampung," ani Andri Saputra.

Waktu bulan puasa tahun ampai no, nyak sekilas petungga ya pas acara Buka Barong Persatuan Wartawan Indonesia (PWI) Kotawaringin Barat. Kik cerita ni, terakhir semakkung mit Pangkalan Bun, ya tugas di PN Kotabumi, Lampung Utara.

Peta Wisata Lampung

Kalteng Expo 2008

JAK Minggu antak Selasa nyak di Palangkaraya, ibu kota Provinsi Kalimantan Tengah. Nutuk Kalteng Expo 2008 delam rangkain ngerayako HUT Kalteng ke-51.







Harian Borneonews barong jama Tanjung Lingga Group turuk di stand ni Kotawaringin Barat delom even inji.

Mbak Ida Ariani sai ngator akomodasiku. Nyak minok di Hotel Lampang.

"Api reti ni," tanyaku.

"Timbul," ani Heri Fauzi.

"Mirip jama Lampung. Kik Lampung reti ni ngapung," aku.

"Ya gegoh," ani Heri luwot.

Inji foto-foto ni Heri Pauzi rik Eko Widodo.

Dadakan mit Palangkaraya

"MIT Palangkaraya dadakan mak api-api kan?" ani Eko.

"Mak api-api," aku.

Penyanaku ya sai aga mit Palangkaraya, ibu kota Kalimantan Tengah (Kalteng) nutuk Kalteng Expo.

Eh, nyata ni nyak.

Ya adu, jemoh sekam telu manak barong gawoh berangkat.

Ya, kasi muneh. Liburan sambil ngeliput.

Kidang, ani Ren, repot ga. Kasian Aidil. Jadi, nyak berangkat tenggalan.

Masa di Borneo Tilapok

SETEMON ni surat tugasku di Borneonews, Pangkalan Bun adu bela 6 Mei 2008 ampai no.

Wat isu sekam (nyak rik Eko) aga titarik jak Borneo. Kidang, ani Saur Hutabarat pas kutanya sewaktu ya ratong mit Pangkalan Bun, "Mak ngedok masalah. Adu tiurus."

Reti ni, masa guwai di Borneo tilapok.

Kik Eko -- kabar jak Denny/MI -- titambah telu tahun luwot. Kik nyak, induh ya mak pandai.

Seruyan 'Negeri' Induh Kidah

NYAK kebagian ngedit berita-berita jak Kabupaten Seruyan. Inji kabupaten aneh-aneh.

Rani, Kemis (8/5) -- barong jama Kabupaten Lamandau, Sukamara, rik Katingan di Provinsi Kalimantan Tengah (Kalteng) -- ampai jak pilkada.

Cerita-cerita lucu jak Seruyan wat-wat gawoh. Injuk Bupati Seruyan Darwan Ali sai mak aga cuti pas kampanye pilkada pak ada wat SK Gubernur Kalteng sai ngucakko ya cuti. Kidang, mak urung ya ngucakko cuti juga seradu kena sorot mit dipa-ipa.

Darwan Ali ji besangan jama Tarmidi (tian nyingkat pasangan inji: Data) nyalon luwot jadi Bupati Seruyan jak PDIP rik pepira partai bareh. Lawan ini Guntur HAA-Bambang Sudono calon jak Partai Golkar.

Darwan cuti kan reti ni wakil bupati ni, Rasyidi Harun otomatis jadi Pejabat Sementara (Pjs) Bupati Seruyan. Kidang, induh muneh pegawai dudi, termasuk Sekkab, Asisten Sekkab, rik kepala-kepala dinas/instansi mak nerima Rasyidi Harun jadi Pjs Bupati.

Waktu Rasyidi Harun inspeksi mendadak (sidak), kepala-kepala dinas malah 'lijung' atawa segok. Repa muneh.

Sai nyani nyak heran muneh, waktu nyoblos, Kemis (8/5) sai kandidat Bupati, Guntur HAA mak nutuk mileh. Ya, malah di Sampit, Kabupaten Kotawaringin Timur (Kotim).

Alasan ni, ya mak ngedok KTP Seruyan. Aneh kan? Masa aga jadi Bupati Seruyan, kidang kuk KPP Seruyan goh mak ngedok.

Lucu ni, ani Guntur, "Pasangan Turba (Guntur-Bambang) taat hukum. Dapok gawoh nyak nyani KTP Seruyan. Kidang kik nyak nyani reti ni nyak wat ruwa KPT jak Sampit rik Seruyan."

Temon-temon 'negeri' induh kidah.